Oct 26, 2017

အရင်အတိုင်းပဲလား … ရန်ကုန်



ရန်ကုန်ဟာ ကျမရဲ့ မွေးရပ်မြေ...။
စည်ကားတဲ့လမ်းတွေပေါ် မက်မက်မောမော လျှောက်ခဲ့တာပဲ။
မြို့လယ်ခေါင်ကစ ဆင်ခြေဖုံးမြို့သစ်တွေဆီအထိ... ချစ်ခဲ့တာပါပဲ။
ပြီးတော့ ကျောင်းတက်ခဲ့ရာ ရန်ကုန်တက္ကသိုလ်ဝင်း၊ ဆရာမ လုပ်ခဲ့ရာ လှိုင်တက္ကသိုလ်၊ နေခဲ့ဖူးတဲ့ စက်မှုတက္ကသိုလ်ဝင်း... အားလုံးဟာ စွဲလမ်းစရာ..။
ဒီလိုပါပဲ... ဘယ်သူမဆို ကိုယ့်ဇာတိမြေကို ရှာကြံစွဲလမ်းကြမှာပါပဲ..နော်။
ရန်ကုန်ရဲ့ဘ၀ထဲ မွန်းကျပ်မှုတွေ ဘယ်အချိန်လောက်က စရောက်လာခဲ့သလဲ.. မမှတ်မိချင်တော့။ သတိထားမိတဲ့အချိန်မှာတော့ အုံ့မှိုင်းမှောင်ဝေနေတဲ့ နိမိတ်ပုံကို တွေ့လိုက်ရပြီ။
ရပ်တည်ရာ ဘ၀အခန်းကျဉ်းလေးတောင် မှောင်လို့..........

"ငါ့အခန်းလေးထဲမှာ အလင်းတန်းများ ပျောက်ကွယ်...
ကြာလာရင် အမှောင်နဲ့ နေသားကျတော့မယ်...
ငါ့အခန်းထဲကနေ အပြင်ကို ထွက်...
ရန်ကုန်မြို့ကြီးလည်း ငါ့အတိုင်းပဲ..."

စာသင်ခန်းထဲက တပည့်တွေမျက်လုံးက အေးစက်မှောင်မိုက်..
သူတို့က ပညာရချင်တာမဟုတ်ဘဲ ဘွဲ့တခုသာ ရချင်ကြတာတဲ့။
ဒါဟာ တန်ဖိုးမဟုတ်ဘူးလို့ ကျမပြောတဲ့အခါ သူတို့က လက်မခံချင်ကြ။
စာမေးပွဲအဖြေလွှာပေါ်မှာ မေးခွန်းတွေ ချည်း ရေးကူးပေးလိုက်တဲ့ ကျောင်းသားလည်း စာမေးပွဲ အောင်တဲ့ ခေတ်တစ်ခေတ်ကို ကျမ တက္ကသိုလ်ဆရာမ ဘဝမှာ ဖြတ်ခဲ့ရဖူးပါတယ်။
န၀ဒေးရဲ့ကဗျာဖြေခိုင်းတာကို နတ်သျှင်နောင်ကဗျာရေးထည့်ထားလည်း စာမေးပွဲ အောင်ပါတယ်။ အင်္ဂလိပ်မြန်မာ ပထမစစ်အကြောင်းမေးတာကို ဒိုင်အာခီအုပ်ချုပ်ရေးပဲရလို့ ဖြေခဲ့တယ် ဆိုတဲ့သူ ကိုလည်း အအောင်ပေးရမယ်တဲ့။ အဲဒီတချိန် အသေအချာ ရှိခဲ့တယ်။ အထူးသဖြင့် ရန်ကုန်မှာ
နောက်တော့ အောင်စာရင်းထွက်တဲ့အခါ မဖြေနိုင်ခဲ့တဲ့ကျောင်းသားတွေက အောင်စာရင်းပေါ်က သူတို့နာမည် တွေကို အော်ဖတ်ပြီး ဆရာမတွေရှေ့မှာ လှောင်တောင်တောင် ရယ်ကြ။
အဲဒီအခါ ကျမရဲ့ ကိုယ်ပိုင်အခန်းလေးက မှောင်အတိကျ..။
ကိုယ့်ရဲ့ဆရာမဘ၀ထဲ..ရှက်ရွံ့ကြေကွဲလာ..။
ဒါဖြင့် ကျမရဲ့ နံဘေးဝန်းကျင်မှာကော..။
ကျူရှင်တ၀ိုင်း (xx) သိန်း... ရုံးးတွေမှာလည်း အဆင်ပြေချင်ရင် (xx) သိန်း.. ဆေးရုံမှာလည်း (xx) သိန်းလောက် တော့ပေး..။ ဘာပဲ မဟုတ်တာ လုပ်လုပ်ရတယ်.. ပေး(xx)သိန်း..။ ဒီလိုနဲ့ အမှောင်ထုက တဖြည်းဖြည်းသိပ်သည်း ကြီးစိုးလာခဲ့။
ရိုးသား ကြိုးစားမှုက ထမင်းလာ မကျွေးဘူးဆိုပဲ..။
အဲဒီအခါ ကျမကိုယ်တိုင် အမှောင်နဲ့ ကျင့်သားရမှာ ကြောက်လာခဲ့။

+++++

"ငါ့အတ္တကို အိတ်နဲ့ ထုပ်လိုက်တယ်...
လူမမြင်အောင် ယူကာ အမှိုက်ပုံးလေးထဲထည့်...
ကွဲသွားတဲ့ ငါ့ရင်ခုန်သံတွေ ပြန့်ကျဲ...
ရန်ကုန်မြို့ကြီးးလည်း ဒီအတိုင်းပဲ..."

ရိုးသားဖို့ ကြိုးစားတဲ့အခါ ဘ၀ထဲမှာ ရေဆာရတာ.. ထမင်းဆာရတာတွေ များလာတယ်။
ကျောင်းသားတွေက "ရော့ဆရာမ..ကျူရှင်လခ" လို့ ခပ်ပြုံးပြုံးပေးတဲ့အခါတွေမှာ
အတ္တက တကယ်ပဲ အမှိုက်ပုံးထဲ ရောက် ရောက် သွားခဲ့တယ်။
ရှက်စရာကောင်းလိုက်တဲ့ဘ၀လို့ ခံစားရတဲ့အခါ အမှောင်ထဲ တိတ်တဆိတ် ကြေကွဲ...။
အတ္တတခုလုံး အမှိုက်ပုံးထဲ ရောက်သွားချိန်မှာ လူကတော့ စိန်ရောင်ရွှေရောင် ပြိုးပြိုးပြက်ပြက် လက်ပ..လို့၊ ရန်ကုန်မြို့ကြီးရဲ့ လမ်းတွေပေါ် ပပလွှားလွှားလျှောက်ခဲ့..။
ကဲ... အဲဒါကကော တကယ်ပဲ ကျေနပ်ဝင့်ကြွားစရာလား။
(ရင်ထဲမှာတော့ တိတ်တိတ် အသည်းကွဲနေခဲ့ရတာ ကိုယ်သာ အသိဆုံးပေါ့)

+++++

"ငါ အချိန်တွေ ဖြုန်းတီးပစ်ခဲ့တယ်...
တမင်တကာ ကာရံထား...
ဒီတံတိုင်းများ ခြားရင်းနဲ့...
ဘ၀ရဲ့ ထွက်ပေါက်အဖြေမှန်ကို ရှာဆဲပဲ...
ရန်ကုန်မြို့ကြီးလည်း နာဖျားဆဲ..."

နှစ်လေးဆယ်..။
ရန်ကုန်မြို့ကြီးဆီမှာ မွန်းကျပ်လွန်းလို့ဆိုပြီးတော့ ..
သူ့ဆီကနေ မကြာခဏ ခွာ ခွာပြီး မြန်မာပြည်တနံတလျား.. သွားသွားလာလာ..လည်လည်ပတ်ပတ်။
အိမ်ပြင် ခဏဘ၀ထဲ ပျော်ပျော်ပိုက်ပိုက်နေခဲ့။
ပြီးတော့လည်း အချိန်တန်ရင် အိမ်ရှိရာ ရန်ကုန်မြို့ကြီးဆီကို ပြန်..။
ကိုယ့်အခန်းကျဉ်းလေးဆီကို ပြန်..။
ဘ၀ကျဉ်းမှောင်မှောင်လေးဆီ ပြန်..။
ခပ်မှိန်မှိန်အပြုံးတွေဆီကို ပြန်...။
ကျပ်ကျပ်သိပ်သိပ်ရယ်သံတွေရှိရာ ပလက်ဖောင်းတွေဆီကို ပြန်..။

+++++

"ငါအချိန်တွေ ဖြုန်းတီးပစ်ခဲ့တယ်...
အိမ်အပြင်မှာ လုံခြုံလည်း အိမ်ထဲက နှင်းကျတယ်...
ဘ၀ရဲ့ ထွက်ပေါက် အဖြေမှန်ကို ရှာဆဲပဲ...
ရန်ကုန်မြို့ကြီးလည်း အရင်အတိုင်းပဲ.."

ဘာပဲဖြစ်ဖြစ်.. ရန်ကုန်ကို စနစ်တကျ ခင်းကျင်းပေးဖို့ ကြိုးစားခဲ့ဖူးပါတယ်။
တကယ့်အလှဆိုတာနဲ့ ချစ်ခြင်းမေတ္တာစေတနာဆိုတာတွေကသာ လောကကို အလှဆင်နိုင်မယ် ဆိုတာကို လူငယ်မျိုးဆက်တွေနားလည်လက်ခံဖို့ ပြင်ဆင်ပြသခဲ့ဖူးပါတယ်။
ဗင်ဂိုးက ချစ်ခြင်းမေတ္တာအတွက် နားရွက်ဖြတ်ခဲ့တာဟာ.. လှောင်ပြောင်ရယ်မောစရာ မဟုတ်တဲ့အကြောင်း..၊
မြို့မငြိမ်းက လူတွေက သူ့ဦးနှောက်နဲ့ မတန်တော့ဘူးလို့ ခံစားရတာကြောင့်ပဲ ပြေးလာတဲ့ ကားအောက် ခေါင်းထိုးထည့်ခဲ့လေသလားဆိုတာတွေ တွေးပြီး အနုပညာရှင်ရဲ့တန်ဖိုးကို နားလည်သင့်တဲ့အကြောင်း...၊
ရိုးသားလို့ ဆင်းရဲရတာဟာ နှာခေါင်းရှုံ့စရာမဟုတ်တဲ့အပြင် ထုတ်ဖော်ချီးကျူးဖို့တောင် လိုတယ် ဆိုတဲ့အကြောင်း..။
ကောက်ကျစ်ယုတ်မာမှုကို ကိုယ်တိုင်မပြုပေမဲ့ ဒီအတိုင်းလက်ပိုက်ကြည့်နေတာဟာလည်း အလိုတူ ရာရောက်ကြောင်း..၊
"ပြည်သူဟာ ကိုယ်နဲ့တန်တဲ့အစိုးရကိုပဲ ရတယ်"ဆိုတဲ့စကားအတွက် 'ဒီနေ့လူငယ်တွေမှာ တာဝန် ရှိတယ်ဆိုတဲ့ အကြောင်းတွေ... အများကြီး ပြောပြီးတဲ့နောက်မှာတော့.... ရယ်သွမ်းသွေး သံတွေ ကြားထဲက ထွက်ပြေးခဲ့ရ။
အဲဒီအခါ.. လက်တွေ့ဘ၀ အိမ်ခန်းကျဉ်းလေးထဲမှာ... နှင်းမုန်တိုင်းတွေ သည်းသည်းကျ..။

+++++

"လူတိုင်းကမင်းကို ချစ်တော့ချစ်ကြမယ်...
ပြန်အဆင်ပြေမှာပါ စိတ်မကောင်းမဖြစ်နဲ့ကွယ်...
မင်းအပြစ်မဟုတ်ခဲ့တာ ငါတို့ နားလည်...
ရန်ကုန်မြို့ကြီးရယ် မငိုလိုက်နဲ့..."

ကျမကိုယ်တိုင်တောင် ရန်ကုန်မြို့ကြီးက စိတ်ပျက်စရာလို့ ညည်းညူငြိုငြင်ဖူးခဲ့ပါတယ်။
ကြည့်ပါဦး... ကျမလည်း သူ့အပေါ်မှာ ရက်စက်စော်ကားခဲ့တာပဲ..။
တကယ်မှာတော့ သူ့ခမျာက လူတကာ ပြုသမျှ နုရသူ။
ဗိုလ်အောင်ကျော်.. ဗိုလ်ချုပ်တို့ သွေးတွေ ပေကျံခဲ့ရရှာတာလည်း သူ..။
၆၂ သွေးတွေလည်း သူ့ဆီမှာပဲ ကျခဲ့။
၇၄..၇၆ သွေးတွေချွေးတွေလည်း သူ့ဆီမှာပဲ ကျခဲ့။
ရှစ်လေးလုံးသွေးတွေလည်း..
ရွှေဝါရောင်သွေးတွေလည်း...
ပြည်သူတွေရဲ့ ဘ၀ထဲ ငတ်ရသမျှ မျက်ရည်တွေကလည်း သူ့ဆီမှာပဲ ကျခဲ့..။
တော်လှန်သွေးတွေလည်း သူ့အပေါ်မှာပဲ ကျခဲ့။
ဒီလောက်ပုန်ကန်တဲ့မြို့ ပျက်သွားအောင် ပစ်ထားလိုက်ကြစမ်း.. ဆိုတဲ့ အာဏာရူးတွေရဲ့ အမုန်းကလည်း သူ့အပေါ်မှာပဲ ကျရောက်ခဲ့..။
နောက်ဆုံး ကိုယ်တိုင်တောင် သူ့အပေါ် အပြစ်ပုံချလို့ စွန့်ခွာ ထွက်ပြေးခဲ့။

+++++

သစ်ပင်အကျိုးအကြေတွေ... ယင်တလောင်းလောင်းအမှိုက်ပုံတွေ.. ။
အလုပ်လက်မဲ့ လေလွင့် လူငယ်လေးတွေ.. ကလေးအလုပ်သမားလေးတွေ..။
ထမင်းငတ်နေတဲ့ သက်ကြီးရွယ်အိုတွေ..။ ခိုးစား လုစားနေရတဲ့ ၀န်ထမ်းတွေ..။
စနစ်တကျ အဖျက်ဆီးခံခဲ့ကြရလို့ စိတ်ဓာတ်ကျိုးကျေနေရှာတဲ့ မြို့ကြီးသူ မြို့ကြီးသားတွေ..
မိဘ ဆရာ အဿပြာပူးပေါင်း ကလေးပညာကောင်း.. ဆိုသလို ပိုက်ဆံကိုပဲ မျက်စေ့စုံမှိတ် ကြည့်နေရလို့ အနန္တောအနန္တ ငါးပါးဆိုတဲ့နေရာမှာ အထိုင်ရခက်နေတဲ့ ဆရာတွေ..။
စိတ်ညစ်သမျှ ဒါချလိုက်ရင် မေ့တယ် ဆိုတဲ့ စိတ်ကြွဆေးပြားတွေ...။
ပါတီမှာ ဘာကျွေးမှာလဲ.. ထုံးစံအတိုင်း ကြယ်သီး ပေါ့..တဲ့။
ကြယ်သီးညတွေထဲမှာ ဘ၀ဆိုတာ ပျော်စရာ.. ခေါင်းလေးတခါခါနဲ့ ငြိမ့်လို့ဆိုပဲ..။
လူစုလိုက်ပါ.. ၁၀ယောက်ပြည့်ရင် တစ်ဝိုင်းစာလုပ်ပေးမယ်ဆိုတဲ့ ကိုယ်လုံးတီး မြန်မာမ ပြပွဲတွေ..။
'အကို ကျမကိုခေါ်ပါ ဈေးဦးမပေါက်သေးလို့ပါ.. လျှော့ပေးပါ့မယ်'ဆိုတဲ့ ဈေးရောင်းပွဲတွေ..။ 
လက်ဘက်ရည်ဆိုင် ထိုင်သလို ဘီယာဆိုင်ထိုင်တာလည်း ယဉ်ကျေးမှုပဲလား။
KTV ဆိုတာ သီချင်းဂီတ ဝါသနာပါသူတွေ .. အပန်းဖြေ စိတ်ပြေ သီချင်းတွေ ဆိုဖို့ပဲလား..
ရိုးသားနေလို့ မရတဲ့ခေတ်ဗျ... မရူးစမ်းပါနဲ့ .. ဆိုတာတွေ။
ကမ္ဘာမီးလောင် သားကောင်ချနင်း.. ဆိုတာတွေ။
တော်ပါသေးရဲ့..၊ သမီးလေးက လှလို့.. ကျမတို့ အသက်ရှူချောင်နေတာ.. သမီးရဲ့ 'စပွန်စာ' က မဆိုးဘူး ဆိုတာတွေ။
အဲဒါတွေကို ရန်ကုန်မြို့ကြီးက ရွက်ထားရတာ..။
သူ့ခမျာလည်း နံစော်ပေပွလို့..၊ ရီဝေမူးယစ်လို့..၊ နာကျင်ကြေမွလို့ ရှိနေရှာမှာ..။

+++++

လောလောဆယ်မှာတော့ ဘာမှမတတ်နိုင်သေးတဲ့ဘ၀တွေ..။ တွေ့နေရဆဲ..
ကျမ မွေးဖွားခဲ့... ကြီးပြင်းနေထိုင်ခဲ့... စွန့်ပစ်ထွက်ပြေးခဲ့တဲ့ ရန်ကုန်..။
သူ့ဘ၀ မိတ်ကပ်ရောင်လေးတွေ နည်းနည်းပြောင်း.. သာတောင့်သာယာသလို ရယ်သံလေးတွေ ကြိုကြား ကြိုကြား စွက်လို့..။ ခုရော .. တကယ် ပျော်နေရပြီလား ရန်ကုန်ရေ

"လူတိုင်းကမင်းကို ချစ်တော့ချစ်ကြမယ်...
ပြန်အဆင်ပြေမှာပါ စိတ်မကောင်းမဖြစ်နဲ့ကွယ်...
မင်းအပြစ်မဟုတ်ခဲ့တာ ငါတို့ နားလည်...
ရန်ကုန်မြို့ကြီးရယ် မငိုလိုက်နဲ့..."

++++

ကျားပေါက် ရဲ့ အရင်အတိုင်းရန်ကုန်ဆိုတဲ့ အဲဒီ သီချင်းလေးက လွန်ခဲ့တဲ့ ၁၀နှစ်လောက် ကတည်း က ကျမကို ဆွဲဆောင်ခဲ့တယ်.. ကျမ ထားပစ်ခဲ့တဲ့ ရန်ကုန်ကို ကျမ စိတ်ထဲ ပြန် ရောက် အောင် ဒီသီချင်း လေးက ပစ်ထည့်ခဲ့တယ်။ ကျားပေါက်က ဘယ်လို ခံစားချက်နဲ့ဆိုခဲ့တယ် မသိနိုင် ပေမဲ့ ခံစားသူတွေ ဘက်ကတော့ ကိုယ့်အမြင် အတွေးနဲ့ ခံစားမြဲမဟုတ်လား..။
ခုဆိုရင်ပဲ ဒီသီချင်းလေးတောင် ဆယ်စုနှစ်တစ်ခု ချဉ်းခဲ့ပြီ။ ရန်ကုန်မြို့ကြီး ပြန်အဆင်ပြေပြီလား.. ဒါမှမဟုတ်ငိုနေရဆဲလားဆိုတဲ့ မေးခွန်းကတော့ ကျမ ရင်ထဲမှာ ခုထိ ခုန်ပေါက်နေဆဲ

https://www.youtube.com/watch?v=7FSTdrymR2M

၃၁ သြဂုတ် ၂၀၁၇။



Sep 21, 2017

" စိတ်ကူးယဉ်ကြရအောင်လား ဂျွန်ရေ…"


ဘယ်သူဟာ သေခြင်းအတွက် အဆင်သင့်ဖြစ်လဲ စဉ်းစားရင် ပထမဆုံး သတိရတာ.. ခင်ဗျားပါပဲ ဂျွန်.. Kurt Cobain လို သေခြင်းကို ကိုယ့်ဘာသာ မရွေးချယ်ခဲ့ပေမဲ့ အနုပညာ နဲ့ လူသားဖြစ်တည်မှု ကို ခန့်ညားလေးစားတဲ့ ခင်ဗျားဟာ သေခြင်းအတွက် အဆင်သင့် ရှိနေခဲ့ ပြီးသားလို့ ယုံတယ်.. ငြိမ်းချမ်းရေးကို ချစ်တာဟာ လူသားဖြစ် တည်မှု ကို ချစ်တာပဲဆိုတာ..       ခင်ဗျားပြလို့ ကျမ တွေ့ခဲ့တာ သိလား။ ဘာအရေးကြီးလဲ စဉ်းစားတော့ ဒီကနေ့ ကို တည့်တည့် ရင်ဆိုင်ဖို့သာ အရေးကြီးတာလို့ ကျန်ရစ်သူ ယိုကိုဆီက ကျမ ရတယ်။
ယိုကိုကြောင့် Beatles တွေ ပြိုကွဲခဲ့တယ်လို့ စွပ်စွဲရင် ကျမကတော့ လက်မခံချင်ပါဘူး။ လူ တစ်ဦး တစ်ယောက်ကြောင့် ဂီတ အမြုတေကြီးတစ်ခု ပြိုကွဲခဲ့တယ်တဲ့လား.. ဒါဆို ရော့ခ် ဘုရင် ၄ပါး ရဲ့ ဂီတ ဂုဏ်သိက္ခာ နဲ့ ချစ်ခြင်းတရားရဲ့နက်ရှိုင်းမှုကို ထိခိုက်ပါ့မယ်… ။ အချစ် ဆိုတာရယ်.. အနုပညာ ရယ်ဟာ တူတူပဲ.. တခါတလေမှာ နားလည်ရ ခက် လောက်အောင် လျို့ဝှက်တယ် .. မဟုတ်လား..။ တခါတလေမှာ အနုပညာဆိုတာ .. အချစ်ဆိုတာတွေက သူ့ဘာသာ သီးခြားဖြစ်တည် တတ် ပါတယ်။ ဒါနဲ့ပဲ ဂျွန် နဲ့ ယိုကို နှစ်ယောက်တည်းဟာ အနုပညာဖြစ်ခဲ့နိုင်ပါတယ်။ သူတို့နှစ်ယောက်ဟာ အနုပညာကို အခြေခံတဲ့ အချစ်နဲ့ပဲ စစ်ဆန့်ကျင်ရေးတွေ.. ကမ္ဘာ ငြိမ်းချမ်းရေးကိစ္စတွေ အတူတူ လုပ်ခဲ့ကြတယ်။ အရေးကြီးတာက ဂီတ နဲ့ အနုပညာ နဲ့ သူတို့ရဲ့ အချစ်နဲ့ လောကကို သာယာစေခဲ့ဖို့ပဲ မဟုတ်လား။ ရပါပြီ.. ဂျွန် နဲ့ ယိုကိုကို ကြည်ဖြူလို့ ရပါပြီ။ ဘာမှ များများ မတွေးဘဲ နေကြစို့။
++++
လောကထဲ နေရထိုင်ရ ခက်လာရင်လည်း ခင်ဗျားကိုပဲ သတိရတာပဲ ဂျွန် .. ဘာပဲဖြစ်ဖြစ် ခင်ဗျားနဲ့ ယိုကို ရင်ဆိုင်နိုင်ခဲ့ကြ တယ်။ ခင်ဗျား ယောဂကိုလည်း တွေ့ခဲ့တယ်.. ယောဂီ ကိုလည်း ကြုံခဲ့တယ်..။ ကြေကွဲ နာကျင် ရတာတွေ ကြေမွ ပျောက်ရှရတာတွေ .. ကိုယ့်ကိုယ် ကိုအတွက် လုပ်ချင်တာလုပ် တာတွေ.. လူသားတွေ အပေါ် ထားတဲ့ ခင်ဗျားရဲ့ အချစ်တွေ.. ။ ခင်ဗျားဟာ အနုပညာပါပဲ ဂျွန်.. ။ ဒါနဲ့ .. ခင်ဗျား သစ္စာရော မဲ့ခဲ့ဖူး သလား..။ သစ္စာမဲ့ ခံခဲ့ရဖူး မှာတော့ သေချာသလောက်ပဲ … ။ အနုပညာသမားမှန်ရင်၊ တစုံတယောက်.. ဒါမှမဟုတ်.. ဒါ့ထက်မကရဲ့ သစ္စာဖောက်မှုကို ခံခဲ့ကြရတာ လောကနိယာမ တစ်ခုလိုပါပဲ။ အဲဒီ သစ္စာ ဖောက် ခံရမှုကို အံတုတဲ့ အနုပညာတွေ ဖန်တီးနိုင်ရင် ဒါ အမြတ်ပဲနော်။
ဂျွန်ရယ်.. ခုထိတော့ ကျမ နှလုံးသားမှာ ဘယ်အရာကမှ ခင်ဗျားရဲ့ Imagine ကို မကျော် နိုင် သေး.. ခင်ဗျားပြောခဲ့ဖူးသလိုဆို ခင်ဗျားရဲ့ ယိုကိုဆီက မြစ်ဖျားခံတာပါဆိုတဲ့ Imagine က ခုထိ ကျမကို တမြည့်မြည့် နာကျင်နေစေဆဲ…။ အို.. လူအများ ကြီးကို နာကျင်နေစေ ဆဲလည်း ဖြစ်နိုင်ပါတယ်..။ ခင်ဗျားပြောတဲ့ I'm not the only one … I hope someday you'll join us .. ဆိုသလို။ 
ဂျွန် .. ခင်ဗျား စိတ်ကူးယဉ်ခဲ့သလို ဘာတိုင်းပြည်.. ဘာနယ်နိမိတ်.. ဘာလူမျိုး.. ဘာ ဘာသာရေး အစွဲမှ မရှိတဲ့ ကမ္ဘာ ဆို ရင် သိပ်နေလို့ ကောင်းမှာပဲလို့..။ ဒါပေမဲ့ ငြိမ်းချမ်းတဲ့ တရားကိုယ် သဘော တော့ ရှိဖို့ လိုမှာပေါ့ နော်။ ဒါမှပဲ လူတိုင်းက ဘာကိုမှ မမက်မော.. မလုယက်.. မဖျက်ဆီး .. ခိုက်ရန် မဖြစ်.. မသတ်မဖြတ် ဘဲ ငြိမ်းချမ်းခြင်းထဲ မွေ့လျော်လို့ အနုပညာ   တွေသာ ဖန်တီးကြမယ်.. မကောင်း ဘူးလား..။ အနုပညာသမားစစ်ရင်တော့ ငြိမ်းချမ်းရေးကို ချစ်မှာပဲ လို့လည်း ယုံတယ်..။    ဟုတ်တယ်မို့လား ဂျွန် …။
Imagine there's no country
It isn't hard to do
Nothing to kill or die for
And no religion too
Imagine all the people
Living life in peace...
++++++++
ဒီလို တွေးလို့ စိတ်ကူးယဉ်ဆန်လှတယ်လို့ ဝေဖန်ကြမယ်ဆိုလည်း ဒီလို ငြိမ်းချမ်းကြည်လင်တဲ့ စိတ်ကူးမျိုးကတော့ ယဉ်ကြရုံပေါ့ ဂျွန်ရယ်.. လက်တွေ့အဖြစ်အပျက်အားလုံးရဲ့ အစ က စိတ်ကူးယဉ်ခြင်းပဲ မဟုတ်လား။ အနည်းဆုံး စိတ်ကူးယဉ်ဖြစ်  ပြီဆိုရင်ကိုပဲ .. အစ တစ်ခု ပျိုးပြီ မဟုတ်လား။
ဒါကိုသာ နားလည်နိုင်ပြီ ဆိုရင်တော့ ကျမတို့အားလုံး သီချင်းတပုဒ်ကို အတူဆိုလိုက်ကြဖို့သာ..။
You may say I'm a dreamer
But I'm not the only one
I hope someday you'll join us
And the world will be as one
+++++++
ဒါပေမဲ့ ဂျွန်ရေ… ခု ကမ္ဘာကြီးကတော့ဖြင့် ကြာလေလေ.. ပိုဆိုးလေလေ..။ ငြိမ်းချမ်းမှုဟာ နေရာ အနှံ့မှာ အခြိမ်းခြောက် ခံနေရတယ် … ။ မေတ္တာတရားက အစော်ကား ခံနေရ တယ်..။ ဂုဏ်သိက္ခာ တွေက အလှောင် ပြောင် ခံနေရတယ်…။ နည်းပညာအောက်မှာ အသိပညာတွေက မှိန်ဖျော့..။ လက်နက်မျိုးစုံအောက်မှာ လူ့အသက်တာ ဆိုတာတွေ က စမ်းသပ်ပစ်ကွင်းတွေဖြစ်လာ..။ တန်ဖိုး ဆိုတာကလည်း အဖိုးတန်မှု မဟုတ် တော့။ အချစ်ဆိုတာက အသက်ရှူသံပြင်းပြင်းနဲ့ လောဘ.. လို့ အဓိပ္ပါယ် ထွက်လာပြီ။ ပိုဆိုးတာက တချို့ အနုပညာတွေကို ဟားစရာ ရှုတ်ချစရာလို့ သတ်မှတ် လာကြတဲ့ ကိစ္စပဲ.. ။   ပြောကြတာတော့ ကမ္ဘာကြီးက ရွာကြီးဖြစ်လာပြီဆိုပဲ ဂျွန်ရယ်..။ အင်း ကျမ မြင်တာတော့ ကမ္ဘာကြီးက ရွာလောက်သာသာ နီးစပ်လာချိန်မှာ အမုန်းမီးတွေ အလွယ်တကူ ကူးစက် လာတာကိုပဲ မြင်ပါတယ်။ မေတ္တာတရား ကတော့ဖြင့် ကူးစက်      ခဲလေခြင်း ဂျွန်ရေ…။ 
ဆာလောင်မွတ်သိပ်ခြင်းတွေ မတော်လောဘတွေ ဝေးရာ.. တစ်ယောက် နဲ့ တစ်ယောက် သွေးသား ရင်းလို ချစ်ကြည်ကြဖို့ရာတဲ့လား…။ ဂျွန်ရေ… ခုတော့.. ကျမမှာ ဂျွန့်ကို လွမ်းဆွတ်ရတာ ကလွဲလို့ ဖြေ ပြေစရာမရှိ…။
Imagine no possessions
I wonder if you can
No need for greed or hunger
A brotherhood of man
Imagine all the people
Sharing all the world...

+++

ဗုဒ္ဓကတော့ ပြောထားတယ် ဂျွန်.. ကိုယ်တစ်ဦးချင်း ကောင်းဖို့ အဓိက လုပ်ပါ တဲ့။ ဟုတ်တာပေါ့ နော်.. အဲလို လူအများကြီးက တစ်ဦးချင်းကောင်းဖို့ လုပ်လာရင် လူကောင်းတွေ အများကြီး အများကြီး ရှိလာ မှာ။ အဲလိုနည်းနဲ့ပဲ တစက်တပေါက်ချင်း စုရာက အေးမြတဲ့ ရေပြင်ကြီး.. သဲတစ်ပွင့်ချင်း စုရာက သာယာ ပြန့်ပျူးတဲ့ သဲသောင်ပြင်ကြီးလို… ပျော်စရာ ကမ္ဘာကြီး ဖြစ်လာမှာပေါ့နော်..။
အင်း.. ပြောနိုင်ပါတယ်..။ ကျမတို့ စိတ်ကူးယဉ် အိပ်မက် မက်နေတယ်.. လို့။
ဒါပေမဲ့ ဒီလို စိတ်ကူးယဉ် အိပ်မက် မျိုးတော့ လူတိုင်း လူတိုင်း လူတိုင်း ကို မက်စေချင်တာ မဟုတ်လား ဂျွန်….
You may say I'm a dreamer
But I'm not the only one
I hope someday you'll join us
And the world will live as one ..

+++++

ဒီနေ့တွေမှာ သိပ်လွမ်းတာပဲ ဂျွန် ..
စိတ်ကူးယဉ်တတ်တဲ့ ကျွန်မက ခုနေ ဂျွန်သာ ရှိနေသေးရင် .. ယိုကို နဲ့ တွဲလို့ ကမ္ဘာ့ငြိမ်းချမ်းရေး အတွက် အဖြူရောင်တွေ လွှမ်းခြုံထားမယ့် တနေရာရာမှာ အဝတ်ဖြူတွေ ဝတ်လို့ပဲ.. Imagine သီချင်းကို စန္ဒယားတီးပြီး ဆိုရင်း ဆန္ဒပြဦးမယ်လို့ ယုံတယ်။ အဲလိုဆို ကျွန်မလည်း ဂျွန့်အနား အရောက်သွားပြီး ပူးပေါင်းအားဖြည့်မယ်.. ဒါဟာ အနုပညာသမားတို့ရဲ့ ယုံကြည်ရာပဲ မဟုတ်လား ဂျွန်..။ အဲလိုနဲ့ပဲ ခင်ဗျားကို ပိုသတိရတော့တာပဲ ဂျွန် ..  ခင်ဗျားရော .. ကောင်းကင်ဘုံမှာ နေလို့ ပျော်ရဲ့လား ဂျွန်…

မေငြိမ်း
၂၈ ဇွန် ၂၀၁၇။

John Lennon ရဲ့ ၇၇ နှစ်ပြည့် မွေးနေ့ (အောက်တိုဘာ ၉ ရက် ၁၉၄၀) အတွက် သတိတရ… Idea Magazine



Aug 17, 2017

မိုးရေ..


ကိုယ့်နားက မြင်ကွင်းအားလုံး မှိုင်းညို့နေပြီး တချိန်တည်းမှာပဲ စိမ်းစိုအေးချမ်းနေတယ်..။ မိုးတွေအဲလို ရေပါပါနဲ့ ဆက်တိုက်ရွာတာကို ဘ၀တလျှောက်လုံး ကြုံခဲ့ဖူးသမျှ တခါမှ စိတ်ပျက်စရာကောင်းလိုက်တာလို့ မတွေးမိခဲ့ဖူးတာကိုလည်း သတိရတယ်။
ဘယ်အရွယ်ကတည်းက မိုးနေ့တွေကို ချစ်ခဲ့တာပါလိမ့်…။
ကျမက မိုးနဲ့ပတ်သက်ရင်…
မိုးစက်မိုးပေါက်တွေ..
အပြိုင်အဆိုင်ပွင့်ကြတဲ့ပန်းတွေ..
မိုးရေစိုတဲ့ တောင်ပံတွေကို ဖွားဖွားထအောင် သုတ်သင်ခါထုတ်နေတဲ့ ငှက်ကလေးတွေ..
ပြီးတော့ မိုးရဲ့ရနံ့ ..မိုးရဲ့ လေပြေ.. မိုးရဲ့ အငွေ့အသက်.. မိုး ဆိုတဲ့ အမည်နာမ.. အားလုံးကို ချစ်တာ။
မိုးတွေ သည်းသည်းရွာပြီဆို.. ခုချိန် အသက် ၅၀ကျော်ထိအောင် ကျမ ငြိမ်ပြီး စိတ်ကူးယဉ် ကောင်းတုန်း။
ဒါပေမဲ့ မိုးကို အနုစိတ် ခံစားတတ်လာတာကတော့ အရွယ်ရောက်မှပါ။
အထူးသဖြင့်ပြောရရင်တော့.. တက္ကသိုလ်ရောက်မှ။
ကျောင်းသူဘ၀.. မိုးရွာပြီဆို.. အင်းလျားကန်ဘောင်ဆီ အပြေးသွားပြီး မိုးရေတွေ ရေပြင်ပေါ် မြားတံ လို ကျနေတာကို ခဏခဏ ထိုင်ကြည့်ဖူး။
၈၈ မတိုင်ခင်... တံတားဖြူက ခရမ်းပြာဆိုတဲ့ လဘက်ရည်ဆိုင်လေးထဲမှာ ထိုင်ရင်း မိုးသည်းသည်းအောက်က ကန်ပေါင်ဆီကို ဆိုင်လေးရဲ့ နံရံသစ်ချောင်းတိုင် ကျဲကျဲတွေကြားကနေ ငေးရင်း ကျမရဲ့ ပထမဆုံး လုံးချင်းဝတ္ထု သီချင်းနှင်းဆီကို ရေးခဲ့တာ ..။
အဲသည်တုန်းက … ခရမ်းပြာမှာ.. ကိုနေ၀င်း ရှိတတ်တယ်။ ကိုရဲလွင် ရှိတတ်တယ်။ တခါတခါ ကိုခင်ဝမ်း ရှိ တတ်တယ်။ တခါတခါ ခိုင်ထူး ရှိတတ်တယ်။ အဲဒီလူတွေကို နတ်ဘုရားလို ယုံကြည် ကိုးကွယ်ကြတဲ့၊ ရန်ကုန် တက္ကသိုလ်ထဲက စာရေးဆရာ ကဗျာဆရာ ပေါက်စတွေ ရှိတယ်။ အဲဒီထဲမှာ စာရေးဆရာပေါက်စ.. ကဗျာရေး သူ ပေါက်စ.. တစ်ဦးတည်းသော မိန်းကလေး..ကျမ ရှိတယ်။ ခရမ်းပြာဟာ..စာပေ ဂီတ စတဲ့ အနုပညာတို့ ဆုံရာ အရပ်လေးတခု။ မိုးသည်းတဲ့နေ့တွေဆို တဆိုင် လုံး စားပွဲပြည့် လူရှိနေပါလျက်နဲ့ လူမရှိသလို ငြိမ်တိတ် အေးချမ်း..သီချင်းအေးအေးသံလေး တချို့သာ လွင့်ပျံနေတတ်တာ။
၎နှစ်နီးပါးနေခဲ့တဲ့ ဘားအံ.. ၅နှစ်ကျော်နေခဲ့တဲ့ မော်လမြိုင်.. နှစ်နေရာစလုံးက မိုးကောင်းတဲ့ ဒေသတွေ…။ ရက်ဆက် မိုးတွေ သည်းသည်း ရွာလို့ မိုးရေအေးစက်စက်တွေထဲ လမ်းလျှောက်ရရင် ချမ်းတဲ့ကြားက ပျော် ခဲ့ ရတာပါပဲ။ မော်လမြိုင်မှာတုန်းကဆို .. မိုးတွေ သိပ်ရွာမှပဲ တမင်တကာ ဘယ်သူမှ မရှိတဲ့ စက်စဲကမ်းခြေဘက်သွားပြီး မိုးသံ လေသံ တဝုန်းဝုန်းကို မခိုင့်တခိုင် ဗိုလ်တဲလေးရဲ့ ပြတင်းပေါက်က ငေးရင်း နေခဲ့သေးတာ။ ခုတောင် မျက်နှာပေါ် မြားတံလို ခပ်ပြင်းပြင်းလာစိုက်တဲ့ မိုးစက်တွေရဲ့ အတွေ့ကို ပြန် ခံစားလာရသေး။
++++
ခုလည်း ဇာတိမြေနဲ့ အဝေးကြီးမှာ ရေခြား မြေခြားမှာ ဆိုပေမဲ့ ရေမြေက တူတူလို .. မိုးစက်တွေ အဖြူပဲ… မိုးရေအောက်က ပန်းတွေလည်း မိုးစက်တွေလေးအိလို့ မျက်ရည်တွေ တွဲရဲခိုနေသလို လွမ်းစရာ ကောင်းတာလည်း တူတူပဲ။
အိမ်ခေါင်မိုး အုတ်ကြွပ်မိုးပေါ် မိုးရေကျသံ တပေါက်ပေါက်ကို ကြားနေရတာ သဘောကျလိုက်တာ။ အိပ်ရာပေါ် စောင်ပုံအောက်ကနေ နားထောင်နေမိတဲ့ မိုးသံဟာ ဘားအံက သစ်သားအိမ်လေးရဲ့ သွပ်မိုးပေါ်ကျတဲ့ အသံနဲ့ ဘာမှမကွာ..
ရွာက အိမ်ရဲ့ အုတ်ကြွပ်ခေါင်မိုးပေါ် ကျတဲ့ အသံနဲ့လည်း တူတူ။
မော်လမြိုင် တောင်ဝိုင်းတက္ကသိုလ်ကျောင်းဝင်းထဲက ဆရာများအိမ်ရာ တန်းလျားလေးရဲ့ ခေါင်မိုးပေါ်က မိုးသံ..
အို… ရန်ကုန်က အမေ့ သစ်သားအိမ်လေးရဲ့ သွပ်မိုးပေါ်ကျတာလည်း ဒီမိုးသံ ပါပဲ..။
ကျမအတွက် မိုးရေစက်တွေနဲ့ မိုးရဲ့ တေးသံတွေဟာ ကမ္ဘာ့အရှေ့ ခြမ်းဖြစ်ဖြစ်.. အနောက်ခြမ်းဖြစ်ဖြစ် တူတူပါပဲ။
အေးမြပုံ.. ပြီးတော့ မိုးရနံ့…
ခုဆို အိမ်ရှေ့က စံပယ်ပင်လေးလည်း အဖူးတွေဝေ.. သပြေပင်လေးကလည်း အညွန့်တွေ ချိုးချိုးပြီး ပန်းအိုး နိုင်နိုင်ထိုးပစ် တာတောင် အညွန့်သစ်တွေ တလူလူတက်လို့..။
ဟော… မျက်နှာချင်း ဆိုင်က အိမ်လေးကို လှမ်းကြည့်လိုက်တော့ ပန်းအိရုံလေးက မိုးစက်တွေ အောက်မှာ အိုင့်ကျနေတာ.. ရန်ကုန်တက္ကသိုလ် ဓမ္မာရုံဘေးက ပန်းအိရုံလေးနဲ့ ဘာမှမကွာ..။
ကျမရှေ့မှာက ခြံဝမှာ စိုက်ထားတဲ့ သပြေပင်ရဲ့ ရွက်နုညိုညိုတွေက ကျမကို မျက်နှာမလွှဲနိုင်အောင် ဖမ်းစားထားတယ်။ မိုးရေစက်တွေအောက်မှာ သပြေညို အညွန့်တွေကတော့ ခေါင်းထောင်ကြော့လို့ ။ သူ့ဘေးမှာက အဖူးအငုံတွေ အလုအယက် ဝေနေတဲ့ စပယ်ရုံ..။ နက်ဖန်မနက်ဆိုရင် ဖွေးလှုပ် ကြိုင်လှောက်နေအောင် ပွင့်ကြတော့မှာ…။ ဇီဇ၀ါပင်ကတော့ ဒီမိုးမှာ နည်းနည်း ဆွံ့သွားတယ်။
အိုးထဲ ပွင့်ရလို့ ထင်ပါရဲ့..။ အချုပ်ချယ်ခံရတဲ့ ဘ၀တခုလို.. အစွမ်းကုန် မပွင့်နိုင်.. မဝေဆာနိုင် ရှာတာ…။
လေအေးအေးတသုတ်က ဖျတ်ကနဲ ဝှေ့သွားတယ်။
မိုးနံ့က လတ်ဆတ်သန့်စင်လိုက်တာ။
အိမ်တံခါးကို တွန်းဖွင့်ပြီး ခြံထဲဆင်းတော့ မိုးစက် အေးအေးတွေ ကိုယ်ကို လာပက်ချိန်မှာ အသက် ၅၀ကျော် မိန်းမတယောက်ရဲ့ အနေအထားကို မေ့သွားတယ်။ ကျမတသက်လုံး ချစ်ခဲ့ စွဲလမ်းခဲ့တဲ့ မိုးရေတွေကတောင် ကျမကိုယ်ပေါ်မှာ မပြောင်းမလဲ ရှိနေသေးတာပဲဟာနော်..။ မြက်ခင်းထဲ မိုးရေ ရွှဲရွှဲကြောင့် ကျမရဲ့ ခြေဖ၀ါးတွေက စိုအိနစ်ဝင်သွားတယ်။
မိုးကောင်းကင်ဆီကို မျက်နှာမော့လိုက်တော့ အေးမြမြမိုးစက်တွေက အပွင့်လိုက် အပေါက်လိုက် ပစ်ပေါက် လိုက်သလို ကျလာတယ်…။ အဲဒီအခိုက် ရင်ထဲမှာ အေးသွားလိုက်တာ..။ လတ်တလောအပူတွေတောင် ငြိမ်းလို့…။
ကိုယ့်မြေကို ပစ်ပြီး ထွက်သွားခဲ့တာ ဆိုတဲ့ ပြစ်တင်ဝေဖန်သံတွေ…
သာတောင့်သာယာနောက်ကို မကြောက်မလန့် လိုက်သွားခဲ့တဲ့ လောဘ တဲ့။
နယ်စည်းမခြား အနုပညာသမား.. ဆိုတာလေးကို သတိရမိပြန်တော့.. စိတ်ကူးယဉ်သာယာချင်သူခမျာ မလွတ်လပ်မှုကို ဘယ်လိုမှ သည်းမခံနိုင်ခဲ့တာပါလို့ .. တစ်ယောက်တည်း ကျိတ်ကြေကွဲခဲ့သမျှ… ခုလို မိုးရေအောက်မှာ တော့ အပူတွေ ငြိမ်းသွားသလို။
ခနနေလို့ အိမ်ထဲ ပြန်ဝင်တဲ့အခါ ဗလ ရဲ့ မိုးသံတွေကြားမှာ စန္ဒယားတီးကြမယ်သီချင်း ကို အကျယ်ကြီး ဖွင့်ပြီး နားထောင်ချင်သေးတာ။
အဲဒီအခါ…
ဟိုးအဝေးကြီးဆီကို လွမ်းဆွတ်ရတဲ့ မိုးနေ့တွေ…
ကြုံခဲ့ဖူးတဲ့ မိုးရေတွေကြားက မုန်တိုင်းဆန်ခဲ့တဲ့ အမိုးအကာမဲ့ ဘဝတစ်ခု..
ညစ်ညစ်ပတ်ပတ်မိုးရေတွေထဲ ရုန်းခဲ့ရတဲ့ မြို့ပြရဲ့ လမ်းတွေ..
ဒီမိုးကာလတွေထဲ ဒဏ်ရာအနာတရအထိမ်းအမှတ်တွေလည်း ရှိခဲ့ကြတာပဲ။
ဒါပေမဲ့လေ.. ဘယ်လောက်ပဲ မိုးကြောင့် နာကျင်ခံစားခဲ့ရတာတွေ ရှိခဲ့လည်း မိုးစက်တွေကို ထိတွေ့ရတိုင်းမှာတော့ မိုးရဲ့ အေးမြ ဖြူစင်မှုကိုသာ ခံစားပါတယ်။ မိုးက အပြစ်မရှိပါကွယ်..။
ရွာပါမိုးရယ်.. ရွာလိုက်ပါ….။
အဲဒီလို စိမ့်နေ အေးနေအောင် သိပ်သိပ်သည်းသည်း ရွာမှပဲ မိုးလို့ ပီသတော့မပေါ့နော်…။
++++++
ဟော.. မိုးသည်းသည်းက တဖြည်းဖြည်း ပါးသွားတယ်။ လေတချက် အဝှေ့မှာ မိုးမှုန်တွေ လွင့်လာ…။ တိတ်ဆိတ်နေတဲ့ နေ့လယ်လမ်းပေါ်မှာ ကျမတယောက်တည်း…။ နဘေးမှာ.. ရှဉ့်ညိုလေးတကောင်.. ကျီးကြည့် ကြောင်ကြည့်နဲ့…။ မြက်ခင်းပေါ်မှာ မိုးရေထိလို့ အိနွဲ့နေတဲ့ အရိုင်းပန်း ၀ါဝါ လေး တွေက လေနဲ့အတူ ငြိမ့်လို့..။
အဲဒီခဏလေးမှာ… ရှိရှိသမျှ စိတ်ဖိစီးမှုတွေကို ခဏမေ့သွား… စိတ်ပျက်စိတ်ညစ်စရာ ခံစားချက်တွေကို မေ့သွား… လက်တွေ့ တဒင်္ဂအချိန်လေးကို ခဏမေ့သွား…။ ပြီးတော့ မိုးမှုန်တွေနဲ့အတူ လွင့်လို့… အဲဒီ မိုးမှုန် တွေ ရဲ့ လှည့်စားမှုထဲမှာ ကျမက ဘာပညတ်မှ ရှိမနေတဲ့ မြေပေါ်က ပကတိလူသားတစ်ယောက်သာပဲ။ မကောင်းဘူးလား။
+++++
ဖြစ်ချင်တော့ ဒီမိုးက ကမ္ဘာ့အနောက်ခြမ်းရဲ့ နွေခေါင်ခေါင်ထဲ ရွာတဲ့မိုးပါ.. ကိုယ်ကပဲ ခံစားတတ်သူမို့ထင်ပါရဲ့ မိုးဟာ ကိုယ့်အပါးမှာပဲ ငြိမ့်ငြိမ့်လေး တမင်ရွာနေသလို..
အဆိုတော်ဗလကတော့ .. ဆိုခဲ့တယ်.. ယဉ်တကိုယ်မိုးတဲ့…။ ရင်မှာ တမင်လာ ရွာတဲ့မိုးလား.. အလည်လွန်သူရဲ့ ခြေဆန့်ခရီးလား.. တုန်ရီနေပြီ အမှတ်တရ နိမိတ်ပုံထဲ..
++++
မိုးက သူ့ဘာသူရွာပေမဲ့ ခံစားသူအပေါ်လိုက်ပြီး လွမ်းစရာ ကောင်းလိုက်.. ပျော်စရာကောင်း လိုက်.. တမ်းတစရာကောင်းလိုက်.. ကြောက်စရာကောင်းလိုက်.. တခါ တခါ ကျတော့ မိုးရေတွေထဲ နောင်တ တွေလည်း ပါလာတတ်သေးတာ။ နောင်တတွေကို အတင်းဇွတ်မေ့ပစ်တော့ ကဗျာတစ်ပုဒ်ရတယ်။ ကဗျာက ထားခဲ့ရသူတွေကို မေ့လိုက်ချင်တဲ့ ကဗျာပေါ့။
အဲလို ခွေခွေခေါက်ခေါက်နဲ့
အဲဒီထောင့်ချိုးလေးထဲမှာ
ပိတ်မိနေတာလား
ပိတ်ထားနေတာလား
ဆုံခြင်းဆိုတာက အဲလို ကြေးကြီးသလား
ချစ်ခြင်းတွေအများကြီး ပေးရုံနဲ့ မလုံလောက်ဘူးလား
ငြိတွယ်ခြင်း နဲ့ တံတားထိုးရုံနဲ့လည်း မရောက်နိုင်ဘူးလား..
အမြဲလို…. ကြည်ရွှင် သာယာခြင်းတွေနဲ့ ဝေးလံသီခေါင်ရ
ဒုက္ခသစ္စာအကြောင်း ကောင်းကောင်းသိပါပြီဆိုလည်း သက်သာရာမရ
နောင်တမှာ နောက်မကျခဲ့လည်း
ကံတရားရဲ့နောက်ကျမှုထဲ အဖန်ဖန်
ဘယ်လောက်မှမလိုပါဘူး..
စိမ်းလန်းသော မိုးရက်တွေထဲ..
လွမ်းဆွတ်ခြင်းဘာဝနာကို အေးအေးမြမြ မှတ်နိုင်ရုံ… ။

ကဗျာကို နာမည်တော့ မပေးဖြစ်တော့ဘူး။

၉ ဇူလိုင် ၂၀၁၇။

Jul 23, 2017

ချစ်ရသူတွေကို လွမ်းမောခဲ့ရသော တက္ကသိုလ်နွေညများ



အဲဒီမနက်ခင်းမှာ မိုးဖွဲဖွဲလေး ရွာတယ်။ မိုးရွာတာကို အင်မတန်ကြိုက်တဲ့ ကျမအတွက်တော့ ဟားဗတ်မြေကို နင်းတဲ့နေ့မှာ မိုးရွာနေတာကိုက ကျမနှလုံးသားထဲက သံမှိုတစ်ပွင့်ဖြစ်တဲ့ မြသီလာကို ပို သတိရစရာဖြစ်စေ ခဲ့တာပေါ့။ အမေရိကန်တို့ရဲ့ ဟားဗတ်ကရော.. သူတို့အတွက်တော့ စိမ်းလန်းအေးမြသော ကျောင်းတော်ရာပဲ မဟုတ်လား။ တက္ကသီလ.. ကောင်းသော အကျင့်အကြံတို့ ရှာမှီးရာ ဆိုတဲ့အဓိပ္ပါယ်ရရာ တက္ကသိုလ်။ လန်းဆန်းတက်ကြွမှုတို့ ရှင်သန်ရာ မြေ။

တကယ်တမ်း သူ့မြေကို စနင်းချိန်မှာ လူတကာက သူ့ရုပ်တုရဲ့ ခြေထောက်ကို ကိုင်ရင် ဟားဗတ်ကို ပြန်လာရ တယ် လို့ ယုံကြတဲ့ ဟားဗတ်တက္ကသိုလ်အဓိပတိကြီး John Harvard ထက် ကျမ သတိရနေတာက Mark Zukerburg ကိုပါ။ အဲဒီ လူငယ်လေးက ကမ္ဘာ့လူသန်းပေါင်းများစွာကို လွှမ်းမိုးသွားတဲ့ facebook Network ကို သူ့သူငယ်ချင်းတွေနဲ့အတူ ဒီမြေပေါ်မှာပဲ စတင် ဖွင့်လှစ်ခဲ့တာ။ အဲဒီ ၂၀၀၄ တုန်းကဆို Mark က အသက် ၂၀ တောင် မပြည့်သေးတာ။ အဲဒီလူငယ်လေးရဲ့ ထွင်လိုတဲ့ စိတ်ကူးစိတ်သန်းတွေ ဘယ်လို ပွင့်လန်းခဲ့သလဲ.. ဘာကြောင့် ပွင့်လန်းခဲ့လဲ.. အဲလို စဉ်းစားမိချိန်မှာ ကျမ မျက်ရည်လည်လာမိတာ ဘာကြောင့်လဲ မသိပါ။ ဟားဗတ်က အဲလိုနဲ့ ကျမကို စတင်ညှို့ယူခဲ့ပါတယ်။

သစ်တော်ပင်တွေနဲ့ စခဲ့တဲ့ ဒီကျောင်းဝင်းကြီးမှာ Ivy နွယ်ပင်တွေ လှလှပပ တွယ်တက်နေတဲ့ ရှေးကျ ခန့်ညား တဲ့ အဆောက်အဦးကြီးတွေရှေ့မှာ ကျမဟာ တိုးတိတ် ငြိမ်ဝပ်သွားခဲ့ရတယ်..။ မခြောက်သွေ့ပါဘဲနဲ့ အေးချမ်း ဆိတ်ငြိမ်နေတဲ့ ကျောင်းဝင်းဟာ တိတ်တဆိတ်နဲ့ပဲ အရှိန်အဝါကြီး လှတယ်။ ကျောင်းပိတ်ရက်မို့ ကျောင်းဝင်း က တိတ်ဆိတ်နေပေမဲ့ ကြီးမားခန့်ထည်လှတဲ့ စာကြည့်တိုက်ကြီးနဲ့ သေသပ်တဲ့ သစ်ပင်အုပ်တွေထဲမှာ ဒီဒီ တို့ ဂျေဆန်တို့ အီလီယော့ တို့ သီအိုဒို တို့ရဲ့ စကားသံတွေ ကျမ ကြားတယ်။ ပါမောက္ခ ဂျွန်ဖင်လေ ရဲ့ ဂန္ဓဝင် စာပေ ပို့ချနေတဲ့ အသံကြားတယ်။ ဒင်နီ ရဲ့ စန္ဒယားသံကိုလည်း တိုးသဲ့သဲ့ကြားတယ်။
တချက်တချက်တော့ ဒီလမ်းတွေပေါ် ဘရက်အိုဘားမားလည်း လျှောက်ခဲ့တာပဲ.. ဘီလ်ဂိတ်လည်း လျှောက်ခဲ့ တာပဲ။ မာ့ခ် ဇူကာဘတ် ရဲ့ ခြေရာ တွေလည်း လတ်ဆတ်တုန်း ရှိဦးမှာလို့ သတိရတယ်။ တနေရာမှာတော့ အနီ အဝါ လိမ်မော် အရောင် ၃မျိုး ရောနေတဲ့ မေပယ်ပင်ကို ငုံထားးတဲ့ အဆောက်အဦး လေးတစ်ခုကို တွေ့လို့ အနားကပ်သွားကြည့်တော့ ပြုံးနေတဲ့ JFK ကို တွေ့တယ်။ JFK’s Harvard , Harvard’s JFK တဲ့လေ။ အမေရိကန် ရဲ့ သမ္မတ ၈ ယောက်ကို မွေးထုတ်ခဲ့တဲ့ ဒီကျောင်းကြီးမှာ JFK ကို အထူးတလည်ဆန်ဆန် တွေ့ လိုက် ရတာ စိတ်လှုပ်ရှားစရာပါပဲ။

ဟားဗတ်ရဲ့ လမ်းတွေပေါ် လျှောက်ရင်း ကျောင်းအဆောက်အဦးတွေရဲ့ ဟိတ်ဟန်ကလွဲလို့ ဘာပကာသန အခင်းအကျင်းအပြင်အဆင်မှ ရှိမနေတဲ့ သဘာဝသစ်ပင် ပန်းပင်တွေထဲ သာယာနေတဲ့ ဒီ ရှေးအကျဆုံး ကမ္ဘာ့ အကျော်ကြားဆုံး ကျောင်းကြီးဟာ ပကတိရိုးစင်းတဲ့ အပြင်အဆင်နဲ့ ဂန္ဓဝင်ဆန်လိုက်လေ။ အဲဒီ သစ်တော် ပင် တွေ မေပယ်ပင်တွေအောက်မှာ သူတို့တွေ လဲလျောင်းရင်း ထွင်ဥာဏ်တွေ စိတ်ကူးဥာဏ်တွေ ကွန့်မြူးလာ ခဲ့ကြလေသလား။ ရုတ်တရက် ရလာတဲ့စိတ်ကူးထဲမှာ ကိုးကားလေ့လာစရာများလိုလာရင် အပြေးလေး သွား ရှာဖတ်စရာ စာကြည့်တိုက် ၇၀ ကျော်က အဆင်သင့် ရှိနေလေတော့ ဘာမှ ကြောင့်ကြစရာမလိုဘဲ ဆက်ပွားများ ရုံပေါ့။ အဲဒီအခါ ဒီကျောင်းဝင်းထဲ စာကြည့်တိုက်ပေါင်း ၈၀ နီးပါး ရှိတယ်ဆိုတဲ့ အသိကလည်း ကျမကို သိမ်ငယ်စိတ်နဲ့အတူ ကြည်ညို အားကျ စိတ်ကိုပါ ဖြစ်ပေါ်နေစေခဲ့ပါတယ်။ သုတေသနလုပ်လိုတဲ့သူတွေကို အထူးပံ့ပိုးတဲ့ ကျောင်း ဆိုတဲ့ အသိ ဟာ ကျမရဲ့ အလွမ်းတွေကို တိုးစေတယ်။ ကျေးဇူးပြုပြီး ဘယ်သူတွေကို လွမ်းသလဲ မမေးပါနဲ့။ ဘယ်ကို လွမ်းသလဲ မမေးပါနဲ့။

ဒီလိုပြောတော့ဖြင့် ဟားဗတ် ဆိုတာက ချမ်းသာကြွယ်ဝသူတို့ရဲ့ ကျောင်းကိုးလို့ ပြောစရာ ရှိလာပါမယ်။ ကျမ သိသလောက်တော့ ချမ်းသာကြွယ်ဝသူတွေ ဈေးကြီးပေးပြီး တက်ရတဲ့ ဒီကျောင်းဟာ ငွေကြေးမတတ်နိုင်တဲ့ ထူးချွန်ကျောင်းသားတွေကိုလည်း ကူညီထောက်ပံ့ကြေးတွေ.. ထူးချွန်ဆုကြေးတွေ ပေးပြီး ပညာသင်ပေးတဲ့ အစီစဉ်တွေလည်း ရှိတာပါ။ ဟိုးဟိုးကျော်လောက်အောင် တော်ဖို့ တတ်ဖို့တော့လည်း လိုပါလိမ့်မယ်။ ဒါကြောင့်ပဲ ဟားဗတ်ဟာ သိပ္ပံပညာရှင် အကျော်အမော်တွေ .. နိုဘဲ ဆုရှင်တွေ .. တီထွင်သူတွေ .. ပါရမီရှင် အနုပညာသမားတွေ .. သန်းကြွယ်သူဌေးတွေ..အများကြီး ပေါက်ဖွားခဲ့ရာ မြေလည်း ဖြစ်လာတာပါ။ ဒါကြောင့် ပဲ ဟားဗတ်ဟာ အမေရိကန်ပြည်ရဲ့ ဟားဗတ်ပေမဲ့ ကမ္ဘာ့နှလုံးသားတွေ ပျိုးထောင်ရာမြေ ဆိုလည်း မမှား လောက်ဘူး ထင်ပါတယ်။

++++

ဟားဗတ်မှာ ကံကော်ပင်တွေ .. စိန်ပန်းပင်တွေ.. ရေတမာပင်တွေ မရှိပေမဲ့ ချစ်သူစုံတွဲတွေတော့ ရှိမှာပါ။ ဒါပေမဲ့ တံခါးတွေ ဖွင့်ထားတဲ့ ကျောင်းကြီးရဲ့ အကြိုအကြားတွေ သစ်ပင်အုပ်တွေကြားမှာ ထီးတွေကွယ်ထားတဲ့ ချစ်သူစုံတွဲတွေတော့ ရှိမနေပါဘူး။ ဟားဗတ်တဝိုက်မှာ ကျမ တွေ့ခွင့်ရခဲ့သလောက်တော့ လွတ်လပ်ပေါ့ပါးတဲ့ ဟန်နဲ့ လူငယ်လေးတွေ။ အနည်းဆုံး စာအုပ်တစ်အုပ် လက်မှာကိုင်ထားတဲ့ လူငယ် လူလတ် လူကြီးတွေ..။ ဟားဗတ် တဝိုက်မှာ အမှိုက်ပုံးတွေ.. ထရန်စဖော်မာသေတ္တာတွေ.. လမ်းဘေးက ခုံတန်းလေးတွေမှာ ပန်းချီတွေ ရေးထား တာ.. ဂရပ်ဖတီတွေ ဆွဲထားတာ တစ်ခုမလပ်။ ဟားဗတ်လမ်းပေါ်က ကော်ဖီဆိုင်.. အအေးဆိုင်လေးတွေက ပန်းခြံအသေးစားလေးတွေလို .. အပြင်အဆင်နဲ့။ ဟားဗတ်ပရိဝုဏ်ဟာ ပန်းချီကားပဲ။
Ivy နွယ်တွေ တက်နေတဲ့ တိုက်တာ နံရံတွေ.. အနားမညီတော့တဲ့ ပြတင်းပေါက်ဘောင်လေးတွေကိုတောင် ပြန် မတည့်ဘဲ စနစ်တကျ ထိန်းသိမ်း ထားတဲ့ ၁၇ ရာစုက အဆောက်အဦးတွေဟာ အဟောင်းရဲ့ ဂန္ဓဝင် အလှနဲ့။ ဒီဝန်းကျင်တဝိုက်မှာ ခဏတာ လမ်း လျှောက်ရင်း ကျမတောင် ဆွတ်ပျံ့တဲ့ ခံစားချက်နဲ့ ကဗျာတွေ စာတွေ ရေးချင်စိတ်တွေ စိမ့်ဝင်လာတယ် ဆိုမှ တော့.. ဒီဝန်းကျင်မှာ နှစ်နဲ့ချီနေခွင့်ရခဲ့သူတွေ .. အထူးသဖြင့် သူတို့ဟာ ကမ္ဘာ့အတော်ဆုံး ကျောင်းသား တွေလည်း ဖြစ်တာမို့ ဘယ်လောက်များ ကောင်းကျိုးပညာ အဖြာဖြာတွေ တိုးပွားခဲ့ကြလေမလဲ။ ဒါဟာ ကျမ အတွက်တော့ မျက်ရည်စို့စရာ အလွမ်းတစ်ခုပါပဲ။

ဟားဗတ်ထံပါးမှာ ပညာရပ်တွေရဲ့ ဖိအားကြောင့် စိတ်ဖိစီးခဲ့ကြသူတွေလည်း ရှိခဲ့မှာ ဆိုပေမဲ့ အောင်မြင်သူနဲ့ ကျရှုံးသူမှာ အောင်မြင်သူတွေများခဲ့လို့သာ ဟားဗတ် ဟာ ဟားဗတ်ဖြစ်နေတာ မဟုတ်လား။ ကျောင်းကောင်း ဆိုတာဟာ ကိုယ်နှစ်သက်ရာ ဘယ်လို ပညာရပ်ကို မဆို .. စိတ်ကြိုက် လေ့လာသင်ယူခွင့်၊ စိတ်ကြိုက် ဆင့်ပွား ဖန်တီးခွင့် ၊ စိတ်ကြိုက် ရှာဖွေဆည်းပူးခွင့် နဲ့ စိတ်ကြိုက် ထုတ်ဖော်ပြောဆိုတင်ပြခွင့်တွေ အပြည့်အဝရှိရာ အရပ် ပါ။ ဒါကပဲ ကျောင်းပညာရေးရဲ့ ပန်းတိုင်.. ရည်မှန်းချက် မဟုတ်လား။ အနည်းဆုံးတော့ ဒါဟာ ပညာရေး နဲ့ ပတ်သက်တဲ့ စေတနာလည်း ဖြစ်ပါတယ်။ အဲဒီ စေတနာကို ဟားဗတ်ရဲ့ ပရိဝုဏ်ထဲမှာ ကျမ အလိုလို နားလည် ခံစားရတယ်။

ဟားဗတ်ရဲ့ ဝိဉာဉ်တွေကပဲ လွှမ်းမိုးလို့လားမသိ.. ဟားဗတ်တည်ရှိရာ Cambridge မြို့လေးနဲ့ Boston မြို့တွေ ကလည်း ခေတ်မီ မြို့ပြလက်ရာတွေကို ရှေးဟောင်းအငွေ့အသက်တွေကို မထိပါးဘဲနဲ့ ဗိသုကာပညာကို သုံးပြီး စနစ်တကျ တွဲဖက်ပြီး ခမ်းနားနေစေတာ တွေ့ရပါတယ်။ ရှေးဟောင်း လက်ရာတွေကို လက်ဆင့်ကမ်း ထိန်းသိမ်းတာဟာ ကိုယ့် တိုင်းပြည်ကိုယ့်လူမျိုးရဲ့ ယဉ်ကျေးမှုအဆင့်အတန်းသမိုင်းကို ထိန်းတာပဲ ရယ်လို့ သူတို့ နားလည်ခဲ့တာ နှစ် ၃၀၀ တောင် ကျော်ခဲ့ပြီပေါ့လို့ တွေးတော့ ပုဂံကို နှမျောတသ စိတ်က ဆို့နင့်လာ စေတယ်။ စာပေပညာ၊ ဒဿနိကပညာရပ် ၊ နိုင်ငံရေးပညာ၊ သိပ္ပံပညာ၊ တရားဥပဒေ၊ စီးပွားရေးပညာ၊ အင်ဂျင်နီယာအတတ်ပညာ၊ ဆေးပညာ၊ ပြည်သူ့ကျန်းမာရေး ပညာရပ်တွေလိုပဲ ပန်းချီ ပန်းပု နဲ့ ရုပ်ရှင်၊ ဂီတ တွေ ဟာလည်း ထပ်တူအရေးပါတယ်ဆိုတာကိုလည်း ဟားဗတ်က သိတယ်။ ဒါကြောင့်ပဲ ဟားဗတ်မှာ Henry Moore ရဲ့ ရုပ်တုကြီးက အခန့်သားနေရာရနေတာ မဟုတ်လား။ ဒါကြောင့်ပဲ ဟားဗတ်ဝန်းကျင်မှာ အနုပညာ လက်ရာ ခြေရာတွေက တူတူတန်တန် နေရာရနေတာပဲ မဟုတ်လား။

+++++

အနုပညာ နဲ့ ယဉ်ကျေးမှုကို တန်ဘိုးသိသူတွေ ဟားဗတ်ကို ရောက်သွားတာလား။
ဟားဗတ်ကို ရောက်သူတွေက အနုပညာ နဲ့ ယဉ်ကျေးမှုရဲ့ တန်ဘိုးကို သိသွားတာလား။
သေချာတာတော့ အဲဒီ ယဉ်ကျေးမှု နဲ့ အနုပညာကို သိမှုဟာ ဟားဗတ်ကို လူတွေရဲ့ နှလုံးသားထဲ စွဲထင်စေပြီး သူ့ကို ကူညီစောင့်ရှောက်ဖို့ စေတနာတွေ ပေါက်ဖွားလာစေပုံရတယ်.. အဲလို ကျမ ယုံတယ်။
သူ့ရဲ့ အေးချမ်းတည်ငြိမ် တဲ့ ကျက်သရေဟာ လူတွေမှာ ရှိတတ်တဲ့ အဖျက်စိတ်ကိုလည်း ငြိမ်ဝပ်သွားစေနိုင် တယ်။
သူ့ရင်ခွင်မှာ ဆည်းပူးရနိုင်တဲ့ အသိပညာ အတတ်ပညာတွေဟာ ချစ်ခြင်းမေတ္တာ စေတနာနဲ့ ယှဉ်တာမို့ လောကကို တတ်စွမ်းသမျှ အကျိုးပြုမယ့်သူတွေ မွေးဖွားလာမယ်။
ကမ္ဘာလောက အတွက် ကောင်းရာကောင်းကျိုးဖြစ်နိုင်စေမယ့်အကြောင်းအရာတွေကို သုတေသနပြုမယ့် သုတေသီတွေကို အားပေးပျိုးထောင်တာမို့ အရေးကြီးလှတဲ့ လူ့သမိုင်းတွေ အထင်ကရ ကျန်ရစ်မယ်။
ပညာရဲ့ တန်ဘိုးဆိုတာဟာ လူ့ဘောင်လောက တိုးတက်စည်ပင်ရာ ငြိမ်သက်အေးချမ်းရာပဲလို့ ဟားဗတ်က ပြောတယ်။
ကြိုးစားချင်ပါလျက်နဲ့ ငွေကြေးမတတ်နိုင်လို့ဆိုတဲ့ ပညာရှင်တွေကို ပြုစုပျိုးထောင်ရမယ်လို့ ဟားဗတ်က ပြောတယ်။
ငွေကြေးချမ်းသာတဲ့ပညာရှင်တွေဟာ ကိုယ်ချင်းစာစိတ်နဲ့ အလှူတွေလုပ်တယ်လို့ ဟားဗတ်က ပြောတယ်။
ပါမောက္ခဆိုတာ ကိုယ်သိတဲ့ပညာတစ်ခုကို နက်နက်ရှိုင်းရှိုင်းသိမှ သူများကို ဖြန့်ဝေဖို့ လုံလောက်တယ်လို့ ဟားဗတ်က ပြောတယ်။
ပါရဂူဆိုတာ ပညာရပ်ထဲ ရူးသွပ်ပြီး စာကြည့်တိုက်ထဲ ခေါင်းစိုက်လို့ သူ့ဆီကနေ သုတေသန အသစ်အသစ်တွေ ထွက်လာတဲ့ပညာရှင် လို့ ဟားဗတ်က ပြောတယ်။
တက္ကသိုလ်ဆိုတာ ပညာရေးကို ခုံမင်နှစ်လိုပြီး ပညာရပ်နဲ့ အသက်မွေးလိုသူတွေကို သေသေချာချာ ပညာပေး ဝေတဲ့ .. ပညာရစေတဲ့ နေရာဌာန ဖြစ်တယ်လို့ ဟားဗတ်က ပြောတယ်။
တကယ့် ပညာရှင်တွေရဲ့ သုတေသနလုပ်ငန်းမှာ ငွေကြေးလိုအပ်ချက်ဟာ ကြောင့်ကြစရာ ခလုတ်ကန်သင်း တစ်ခု မဟုတ်စေရဘူးလို့ ဟားဗတ်က ပြောတယ်။
တကယ့်ပညာတတ်တို့ရဲ့ ကျောင်းပရိဝုဏ်ဆိုတာ အေးဆေးလွတ်လပ်တဲ့ .. တိတ်ဆိတ်ငြိမ်သက်တဲ့ .. စိမ်းစို လန်းဆန်းတဲ့ .. ယဉ်ကျေးသိမ်မွေ့တဲ့.. တက်ကြွရှင်သန်တဲ့.. နိမိတ်ပုံတွေ သက်ဝင်ရာအရပ်ပဲလို့လည်း ဟားဗတ်က ပြောတယ်။
ဒါနဲ့ပဲ ဟားဗတ် ဟာ ဟားဗတ်အဖြစ် နှစ် ၃၀၀ ကျော်ခဲ့ပြီ။

+++++

ဟားဗတ်ကအထွက်မှာတော့ ကျမရဲ့အလွမ်းတွေက ဦးတည်ရာ ပြောင်းသွားကြတယ်။
မအအောင် သမိုင်းသင်ရမယ်ဆိုတဲ့ သုတေသီကြီး ကို လွမ်းတယ်၊ တဟီတီသွားရအောင်ဆိုတဲ့ အလှဗေဒ စာဆိုကြီးကို လွမ်းတယ်။ ဟားဗတ်ကို တွယ်ငြိတဲ့ စာဆို ဧည့်သည်ကြီး ကို လွမ်းတယ်။ ဒါး သန်လျက် နဲ့ ပန်းပွင့် ပိုင်ရှင်ကြီးကို လွမ်းတယ်၊ မဟူရာ မေတ္တာရှင်ကြီးကို လွမ်းတယ်။ သမုဒယမော်ကွန်းဆရာကိုလည်း လွမ်း၊ စာပေလူကြမ်းမင်းသားကြီးကိုလည်း လွမ်းတယ်။ ကရဝိတ်သ်မြူးဇစ်ကြီး ကို လွမ်းတယ်၊ စိတ္တဇပန်းချီ စာရေးဆရာ အနုပညာရှင်ကြီးကို လွမ်းတယ်။ အတ္တပုံဆောင်ခဲကြီးကိုလည်း လွမ်းခဲ့ရပါတယ်။


၅ ဇွန် ၂၀၁၇။


Jul 8, 2017

မှောင်ချိန်မတန်ခင် … ဆုတောင်း




စစ်ကိုင်းလမ်းဆိုတာ မန်းလေး စစ်ကိုင်းအသွားလမ်းကို ပြောတာပါကွာ.. လို့ ဘယ်သူပြောပြော ကျမအတွက် တော့ အင်းဝဆောင်ရှေ့ကနေ ဖြတ်လျှောက်ပြီး သိပ္ပံစားသောက်တန်း (Science Canteen) လွန်ရင် စစ်ကိုင်း လမ်းကို ရောက်ပြီပဲ။ တူတူပဲ မဟုတ်လား။ အဲဒီစစ်ကိုင်းလမ်းမှာ ချိန်းထားတဲ့ သဲမြေပင်အိုရိပ်လည်း ရှိတယ် ပေါ့။ အမြဲလိုလို တိတ်ဆိတ်အေးချမ်းနေတတ်တဲ့ အဲ့ဒီလမ်းလေးဟာ တကူးတကသွားမှ ရောက်ရတာပါ။ အဲဒီလမ်းကျောရိုးလေးပေါ်ကနေ အင်းလျားလမ်းဂိတ်ပေါက်ဘက်ထွက်ပြီး လမ်းတစ်ဘက်ကို ဖြတ်ကူးလိုက်ရင် သစ်ပင်ကြီးတစ်ပင်ကို ငုံပြီး ဆိုင်ခန်းလေးဆောက်ထားတဲ့ ခေမရဋ္ဌ် ရှမ်းခေါက်ဆွဲဆိုင်ကို သွားရတာ။ ၁၉၈၅-၈၆ ဝန်းကျင်မှာပေါ့။ အဲဒီဆိုင်လေးမှာ ဆရာစိုင်းခမ်းလိတ် နဲ့ စိုင်းထီးဆိုင်ရဲ့ သီချင်းတွေက တိုးတိုးလေး လွင့်ပျံ.. ကြိုးကြား ကြိုးကြား ကြားရမှာက ကိုနေဝင်း နဲ့ ခိုင်ထူး.. ဂျေမောင်မောင် တို့ရဲ့ ဂီတတွေ အဲဒီတုန်းကမှောင်ချိန် မတန်ခင် လင်းတဲ့ နေ့တွေမှာပေါ့။

ကိုနေဝင်းရဲ့ သိုဝှက်ထားတတ်တဲ့ သီချင်းတွေကို ခိုင်ထူးဆိုပြီဆိုရင် အဲဒီသီချင်းထဲ ခုန်ဝင်ပြီး အဖြေရှာကြ.. ဆန့်ထွက်တွေးခဲ့ကြ.. ကိုယ်လိုသလို ခံစားရင်း စီးမျောငြိမ့်ငြောင်းခဲ့ကြ။ လူငယ်တွေနဲ့ အနုပညာဟာ အဲလို ထိတွေ့ဆက်စပ်ပြီး နူးညံ့ သိမ်မွေ့ခဲ့ကြ။ အဲဒီခေတ်တွေမှာ လူငယ်အများစုဟာ ယဉ်ကျေးမှု မှာ သက်ဝင်ခဲ့တယ်။ တက္ကသိုလ်ဝန်းကျင်က ချစ်ခြင်းမေတ္တာဆိုတာ ငြိမ်းကျော်ဝတ္ထုတွေမှာ တွေ့ရတဲ့ လက်ဖျားကို ခပ်ဖွဖွဆုပ်ပြီး ကားလမ်းဖြတ်ကူးတာ.. ချစ်သူရဲ့ နဖူးဆံစပ်က ဥရောပနံ့သာခဲရဲ့ ရနံ့ ကို တိတ်တိတ်လေး ခိုး ရှူရှိူက်ရတာ.. ကျောင်းစားသောက်တန်းမှာ ချစ်သူနှစ်ယောက် ဖျော်ရည်တစ်ခွက်ကို စုပ်ပိုက်နှစ်ချောင်းနဲ့ နှစ်ယောက် မျက်နှာချင်း ဆိုင်သောက်ခွင့်ရရင်ကို အတော်ကျေနပ်ပျော်ရွှင်ရတဲ့ခေတ်.. ဘယ်လောက် ချစ်စရာ ကောင်း လိုက်ပါသလဲ။ ဒါကြောင့်ပဲတောင်ခြေတနေရာ ဘုရားမြတ်ရှေ့မှာ သူရယ် ကိုယ်ရယ် နှစ်ဦးသားတောင်းဆုချွေ .. ကိုယ်စီ လက်ထဲ ပန်းမြတ်သစ္စာ.. သူလေ ယူငင် ပေါင်း၍အတူစုစည်းဆိုတာလေး တွေက ရင်ထဲ ထုတ်ချင်း ပေါက်ခဲ့ကြတာ။ ပြန်မရနိုင်တော့ဘူးလား.. ခုချိန်မျိုးမှာ

+++++

ကျောင်းခဏပိတ်လို့ ခွဲရတာမျိုး မဟုတ်ဘူးကွ.. ကောင်မလေးက အပြီး ပြန်သွားရတာ..
ရင်ခုန်သံတွေ တိုးတိတ်သွားပြီပဲလို့ ပြောထားတာ..
သံဇကာအလယ်မှာ တစ်ယောက်တစ်ဘက်.. လို့ ပြောထားတာ..
ကံဆိုတာ ပြောရခက်တယ်အသည်း.. ပြန်မဆုံနိုင်သေးသရွေ့တော့ တို့တစ်ပွေတည်း .. လို့ ပြောထားတာ..
လမ်းခွဲဖို့ ရထား ရှိုက်သံဆွဲတဲ့။ သူတို့ ခွဲကြရတော့မှာ။
နေရယ်သာတဲ့ နေ့ရက်နေ့တွေ တရံတခါ ဆီမှာ ရှိခဲ့ဖူးပါရဲ့တဲ့။
အတူနေတာ အချစ်ရဲ့ နိဗ္ဗါန်ပဲ .. တဲ့။
ငိုသံလိုလို သဲ့သဲ့တစ်ချက်သာ ကျန်နေသူမှာ ကြားလိုက်ရတယ်.. တို့ရေ တို့ ဝေးပြီ
ကြည့်စမ်း.. တို့နှစ်ယောက်သိပ်ချစ်ကြတယ်ဆိုတဲ့ စကားလုံးတွေ ပြောပြမနေဘဲ.. ဒီလူ တစ်စုံ.. တဲ့။ တို့ရေ.. တို့ .. ဝေးပြီ တဲ့။ နှစ်ယောက်တစ်စုံ.. နှစ်ယောက် တစ်ကိုယ်.. တို့ နဲ့ သူ မဟုတ်ဘူး.. တို့ နဲ့ တို့ပဲ..
အဲဒီလို တေးရေးဆရာက ပေးတဲ့ စကားလုံးတွေကို အသေးစိတ်ခံစားသက်ဝင်ကြတဲ့ လူတွေ.. အဲဒီခေတ်ထဲ တပုံတပင် ရှိခဲ့တာ။
 ကိုယ်ချစ်တဲ့ ကောင်မလေးကို မတို့ရက် မထိရက် .. ငေးကြည့်ရင်း မြတ်မြတ်နိုးနိုး စွဲလမ်းတဲ့ ကောင်လေးတွေ အများကြီး ရှိခဲ့တဲ့ ချစ်ခြင်းမေတ္တာခေတ်တစ်ခေတ်ဟာ ဘယ်တုန်းကစလို့ မှိန်ဖျော့ ပျောက်ကွယ် သွားခဲ့တာ ပါလိမ့်။
သတိရနေမိတဲ့အထဲမှာကြင်နာသူကိုယ့်အနား ရှိနေခိုက်ဟာ ဘဝရဲ့ အသာယာဆုံး အခါ
ဒီအချိန်မှာ ကိုယ်ကြည့်ရင်းနဲ့ သူ့အပေါ် သနားလာမိတယ်မကျင်လည်ခဲ့ဖူးတဲ့ သူစိမ်းနယ်ထဲ စိတ်အားငယ်လှရော့မယ်..”  ဆိုတာလေးတွေလည်း ပါတာပေါ့။
ချစ်သူတွေဆိုတာမှာ တစ်ယောက်အနားတစ်ယောက်သာယာဖို့ .. တစ်ယောက်အတွက် တစ်ယောက်က ကိုယ်ချင်းစာ ခံစားနေဖို့က အဓိကပဲဆိုတာကို အဲဒီ တေးသားတွေဆီက ရတယ်။ စိတ်ခံစားချက်ထက် လက်တွေ့ကျမှုကို ပိုဦးစားပေးလေ့ရှိတဲ့ ယောက်ျားတွေရဲ့ သဘာဝထဲမှာ ချစ်တဲ့သူအပေါ် ကိုယ်ချင်းစာတဲ့ ခံစားချက်လေးထည့်လိုက်ရင် ဘယ်လောက် ပြည့်စုံသွားလဲ လို့ ခြင်္သေ့လည်ပြန် ကို ပြရင်း ကျမတို့ ချစ်သူတွေကို ညှိယူဆွေးနွေးခဲ့ကြတာဘယ်လောက်ချိုမြိန်တဲ့ ဓလေ့လဲ။ ကျမတို့ရဲ့ ချစ်သူတွေကလည်း သူတို့ကြိုက်တဲ့ တေးရေး နဲ့ တေးဆို တို့ရဲ့ အနုပညာနဲ့ ထုံမွှမ်းထားတဲ့ သတင်းစကားမို့ လက်ခံနိုင်ကြတယ်။
တကယ်ပဲ အခါများစွာ ချိုမြိန်သာယာခဲ့ကြတဲ့ နေရယ်သာတဲ့ နေ့ရက်နေ့တွေ တရံတခါဆီမှာ.. ချစ်သူတွေ ကြားမှာ ရှိခဲ့ကြဖူးပါတယ်။

++++

ဆံပင်တွေကို လေနဲ့ မှုတ်မယ် ချစ်လို့.. ကြင်နာစွာ နဖူးလေးနမ်းမယ်.. ချစ်လို့ဆိုတဲ့ သီချင်းလေးတွေကို မရယ်ရက်ခဲ့ကြပါဘူး။ ချစ်သူရဲ့ သစ္စာရှိ .. ချစ်သူ၏ အပါးတော်မြဲ .. ထီးတော်မိုး .. ပန်းတော်ဆက် .. သက်တော်စောင့် အမှုတော်ထမ်းနေ.. ကိုယ်ရံတော် တပ်မှူးလေး…” အချစ်ရေ့.. သနပ်ခါးလေး လှအောင်လူးပြီးရင် ကိုယ့်အကြောင်းတွေးနေပေါ့ကွယ်..”ဒီလို မချစ်ဘူး မပြောပါနဲ့.. မင်းလုပ်သမျှအားလုံးကို ကျေနပ်လို့ တကယ်ပါ တစ်သက်လုံးချစ်နေမှာ မျှော်လင့်ရင်းစောင့်ရသူ ကြေကွဲအောင် မလုပ်နဲ့..”
 အဲလို ကောင်လေးတွေ တကယ်ရှိခဲ့တယ်။
မင်းကြောင့် မင်းကြောင့်ပါကွယ်.. အရမ်းလည်း ချစ်တတ်ပြီ .. မင်းကြောင့် မင်းကြောင့်ပါနော်.. လွမ်းလည်း လွမ်းတတ်ပြီ..”
ကိုကို အချစ်ရေ.. ဒီလိုပဲ တို့ကတော့ ခေါ်မှာပဲကွယ်.. ထာဝစဉ်လေ မင်းကြိုက်သလို ချစ်မယ်.. မင်းချစ်သလိုချစ်တယ်.. ချစ်မယ်.. ကို အချစ်ရေ.. ဟေး ကိုကို အချစ်ရေ..”
အိပ်စက်တဲ့အချိန်လည်း အိပ်မက်ထဲထိအောင် အပြုံးလေးနဲ့ အလည်လာပြန်သည် .. အိပ်မရတော့ပါဘူး.. အချစ်ရူးလေးနိုးလာ.. ရင်ခုန်သံတောင် မြန်လာပြီ”  
ဆိုတဲ့ ကောင်မလေးတွေလည်း တကယ်ရှိခဲ့တယ်။ အချစ်ဆိုတာထဲ မေတ္တာဓာတ်မပါဘဲ ပူပြင်း လောင်မြိုက်တဲ့ ချစ်ခြင်းမျိုးတွေလည်း သဘာဝအလျောက် ရှိပေမဲ့ နည်းပါးခဲ့ပါတယ်။
အဲဒီကာလလေးဟာ ခုလို ချစ်ခြင်းမေတ္တာဓာတ်တွေ လျော့ပါး ခြောက်ခမ်းတဲ့ ကာလမျိုးမှာ ပိုလို့ လွမ်းစရာ။

+++++

ကိုယ်တိုင် ကြုံခဲ့ဖူးတဲ့ ချစ်ခြင်းတခုဟာလည်း ပူပြင်းခဲ့ဖူးတာ သတိရတယ်။ အဲဒီ အချစ်မျိုးကျတော့ ရအောင်လည်း စွန့်ခွာချန်ထားခဲ့တယ် .. ပြီးတော့ တကယ် ဘာမှ သေချာ မမှတ်မိတော့လောက်အောင်လည်း မေ့ပစ်လိုက်တယ်။ အို.. သူဟာ ကိုယ့်ကို ပူပြင်းလောင်မြိုက်စေခဲ့ဖူးသူ.. အရှက်အနာကို ပေးခဲ့သူ ဆိုတာ လောက်ကိုပဲ မှတ်ထားလိုက်ပြီး ကျန်တာကို မေ့သွားစေနိုင်ခဲ့တယ်။ ဒါဟာ ချုပ်ငြိမ်းအေးချမ်းခြင်း တရား တစ်မျိုးပဲ မဟုတ်လား။

တကယ်တမ်းကျတော့ လူငယ်ဘဝဆိုတာ နူးနူးညံ့ညံ့ ညင်ညင်သာသာ နဲ့ .. အထူးသဖြင့် ရည်းစားဘာဝ ဆိုရင်လည်း ပျော်ပျော်ရွှင်ရွှင် ကြင်ကြင်နာနာသာ ရှိသင့်တာ။ ကိုယ်သာ ကံမပါလို့ ငယ်ရည်းစားတွေနဲ့ အကြောင်းမပါခဲ့ပေမဲ့ ကိုယ့်နားက သူငယ်ချင်းအများစုကတော့ သူတို့ ချစ်တဲ့ ကျောင်းနေဖက် ရည်းစားတွေနဲ့ အကြောင်းပါပြီး ခုထိ ခရီးတူတူလျှောက်ဆဲသူတို့ရဲ့ ချစ်သူတွေနဲ့ အပြန်အလှန် ချစ်ကြင်ကြဆဲ.. စိတ်ကြည်နူး စရာ။ ခုခေတ် လူငယ်တွေရော အဲဒီလို ချစ်ခြင်းတွေ ရှိတာ သိကြရဲ့လား.. ယုံရော ယုံကြလား.. ကျမ အဲဒီ ခံစားချက်ကို လွန်ခဲ့တဲ့ ဆယ်နှစ်ကျော်က ရွှေအမြုတေမှာ ဝတ္ထုလေးတစ်ပုဒ်ရေးခဲ့ဖူးတာ ခဏခဏ သတိရတယ်.. “အချစ်ဆိုတဲ့ ဝတ္ထုဆိုတဲ့ ခေါင်းစဉ် နဲ့။ အဲဒီ ဝတ္ထု ထဲမှာလည်း ချစ်ခြင်းတရားကိုပဲ လွမ်းဆွတ် ခဲ့ရတာ.. အဲဒီအချိန်တွေတုန်းကတောင် ခုလောက်ထိ မေတ္တာတရား မခေါင်းပါးကြသေးဘူး ထင်ပါတယ်။

ထူးအိမ်သင်က … ‘ရင်ခုန်ရင် …. အချစ်ပဲကွယ် ရိုးရိုးသားသားချစ်တယ် …. နှလုံးသားချင်းလည်း နားလည် အကြင်နာဆုံးလေးရယ် ….. ဝေးသွားလည်းပဲ ချစ်ရဦးမယ် ဝေးသွားလည်းပဲ သတိရလို့ နေမယ် …. ’ တဲ့ ။
ပြီးတော့လည်း  ‘ကေခိုင်ချစ်ရင် စာကျက်မယ်ဆိုတဲ့ ကောင်လေး
မီ့ကိုချစ်ရင် ဆေးလိပ်ဖြတ်ဆိုတဲ့ ကောင်မလေး
စာမေးပွဲအောင်ရင် အဖြေပေးမယ်ဆိုတဲ့ ကောင်မလေး
မနေနိုင်လို့ပါ အချစ်ရဲ့ …. မင်းအနား ရောက်ရောက်လာတာဆိုတဲ့ ကောင်လေး ….
မင်းပေါ့ပုံမှန်အသက်ရှုနေတဲ့ သေသူတစ်ယောက်ကို ပြန်လည်လူလားမြောက်စေခဲ့တာ’ ဆိုတဲ့ ကောင်မလေး
စံပယ်ပွင့်တွေရေ … အချစ်တွေနဲ့ ဖျားနာသွားတဲ့ အထိ ငါ့အပေါ်ရွာချလိုက်ပါကွယ်ဆိုတဲ့ ကောင်လေး
မြတ်နိုးမှု တခုတည်းနဲ့သာ နွယ်ကြိုးကို ခိုင်အောင်ချည်ခဲ့တယ်ဆိုတဲ့ ကောင်မလေး
မသုံးရသေးတဲ့ နေ့စွဲတစ်ခုမှာ.. အချစ် မင်းနဲ့ငါ ဥယျာဉ်အသစ် ထူထောင်မယ်ဆိုတဲ့ ကောင်လေး ….
ကြည့်ပါဦးအချစ်တွေအချစ်တွေ တွေ့မည် ။ ဘယ်လောက် မွှေးပျံ့လိုက်ပါသလဲ။ ပြီးတော့ ဘယ်လောက် လွမ်းဆွတ် တသစရာ ကောင်းလိုက်ပါသလဲ။ အဲဒီမှာလေအချစ်ဆိုတာဘယ်လောက် သန့်ရှင်း ဖြူစင်လိုက်ပါသလဲ။
အဲလိုတွေ ရေးခဲ့ဖူးပါတယ်။ အဲဒီအချိန်မှာကို ဒီလို ချစ်စရာကောင်းတဲ့ ချစ်ခြင်းတွေ ပျောက်ရှစ ပြုနေခဲ့ပြီပဲ။
မှောင်ချိန်မတန်သေးခင်လား။ ခုရော မှောင်ချိန်တန်နေပြီလား။ လင်းခွင့် ရှိသေးလား..

++++++

အချစ် နဲ့ သွေးသားကိစ္စ ဆက်စပ်နေပေမဲ့ သွေးသားကိစ္စကတော့ အချစ်နဲ့ မဆက်စပ်လှပါဘူးကွယ်။ ဒါ အစဉ်အဆက် ပြောခဲ့ကြတာပဲ။ တို့ စဉ်းစားရမှာက တို့လိုအပ်တာ ဘာလဲဆိုတာပါ။
အချစ်ကို ဘယ်သူ့ဆီက ရမလဲ။
သွေးသားကတော့ အတော်များများဆီက ရနိုင်ပါတယ်။
အချစ် ကိစ္စ နဲ့ သွေးသားကိစ္စ ဘယ်ဟာက ကိုယ့်အတွက် ပိုအရေးကြီးလဲ.. ပိုတန်ဖိုးကြီးလဲဆိုတာ ရွေးကြရဖို့ပါပဲ။
ကိုယ်ရွေးတာကို ကိုယ်ရမှာတော့ သေချာတာပေါ့ကွယ်.. ။ ကိုယ့်ရွေးချယ်ချက်အပေါ် ကိုယ်တိုင် လေးနက်ယုံကြည်ဖို့.. နောင်တမရဖို့တော့ လိုတာပေါ့။

++++++

အမှောင်ခေတ်ဆိုတာ မေတ္တာတရား မရှိတော့တဲ့ခေတ်.. ချစ်ခြင်းတရား ခေါင်းပါးလာတဲ့ ခေတ်ပေါ့။
ဒါကို ကေအေတီလည်း မြင်ခဲ့တယ်.. မဒီလည်း မြင်ခဲ့တယ်။
အားလုံး အားလုံး ချစ်ခြင်းတရားကို ယုံပါ.. အားလုံး အားလုံး ပေးဝေကာစားသုံး .. အချစ်များနဲ့ ခံစားချက်တို့ မလိုသူ .. ထူးဆန်းလွန်းသတဲ့ ဒီကမ္ဘာကြီးထဲမှာ.. တဲ့။ သူတို့ဒီလို ယုံခဲ့တယ်။
ချစ်ခြင်းမေတ္တာဆိုတာ ချစ်သူစုံတွဲတွေအတွက်တင်မဟုတ် လူအားလုံးရဲ့ ကြားမှာ ရှိတာပါလေ..
ကျမ သူငယ်ချင်းဆရာ ဆရာမတွေ ချစ်သူမထား .. အိမ်ထောင်မပြု.. ဒါပေမဲ့ သူတို့ တပည့်လေး တွေဟာ သူတို့ရဲ့ သားသမီးတွေ.. သူတို့ဆီမှာ မေတ္တာတရားတွေ ချစ်ခြင်းတရားတွေ ပွင့်ဝေ
အရေးကြီးတာက ဒါပါပဲလေ.. နေရာတိုင်းမှာ ချစ်ခြင်းမေတ္တာတွေ ပန်းလို ဝေမှ .. အမုန်းတွေ ဝေးမယ်.. အမုန်းတွေ ဝေးမှ ဒေါသတွေ ဝေးမှ ငြိမ်းချမ်းရေးတေးတွေ ဆိုနိုင်မှာ မဟုတ်လား..
ခုချိန်ထိ ကိုဇာလျန်း နဲ့ ကိုခိုင်ထူးရဲ့ စစ်နဲ့ ငြိမ်းချမ်းရေးသီချင်း ခေတ်စားနေသေးတာကိုလည်း မကြိုက်ချင် ပါဘူးလေ..။ ခုထိတော့ အမုန်းတွေကသာ နီးပြီး .. ချစ်ခြင်းမေတ္တာကတော့ တို့ရေ တို့ဝေးပြီလို့ ဆိုညည်းနေရဆဲ..။ အဲဒီအခါ ဒိုးလုံး ကို လွမ်းတယ်.. သူ့ရဲ့ ဆုတောင်း ကို ခဏခဏ သတိရရတယ်..
ဘုန်းကြီးပါစေ.. အသက်ရှည်စေ.. အားလုံး စိတ်လည်းချမ်းသာစေ.. ငါဆုတောင်းရင်း မေတ္တာတရားတွေ ပွားများချင်သေးတယ်….လူသားတွေ တောင်းဆုချွေ .. အို တို့ကမ္ဘာကြီးဟာ လှပဖို့ ငြိမ်းချမ်းဖို့ တို့တွေ ဆုတောင်းမှာ။ 

၁၁ မေ ၂၀၁၇။