လွတ်လမ်း (ဇာတ်သိမ်း)

တဖြည်းဖြည်းနှင့် သူနှင့်နုက ဝေးဝေး လိုက်လာသည်။ သူ့အနုပညာခန်းလေးထဲကို နုက ယောင်လို့မှ ၀င်မလာ သလို နု၏ အခန်းတို့ကလည်း သူ့အတွက် တံခါးတွေ ပိတ်ပြီ။

သူကတော့ နုအားလပ်သည့် အချိန်ကလေးတွေမှာ အရင်ကလို နုအပါးမှာ တယောထိုးရင်း၊ ပန်းချီကားရေးရင်း၊ သားကို ချော့မြူရင်း၊ မြို့မငြိမ်းနဲ့ ဇနီးဒေါ်သန်းသန်းရဲ့ အကြောင်း၊ ဆာ့တ်နဲ့ ဒီဗူးဗွားတို့အကြောင်း၊ ဂျွန်လင်နွန်နဲ့ ယိုကိုအိုနိုတို့ အကြောင်းတွေပြောပြရင်း အနုပညာ သမားစစ်စစ်တို့ရဲ့ ဇနီးမယားတွေကို တော်လေး၀၀င်အဖြစ် သတ်မှတ်သင့်ကြောင်းတွေ ပြောပြ ချင်နေဆဲပင်။

သို့ပေမဲ့ နုကတော့ ငြင်းဆန်ခဲ့ပြီ။ ငြင်းဆန်သည်ထက် ပိုလို့ပင် ဆန့်ကျင်ပြတ်တောက်ကာ နုက သူ့ကို စိမ်းခဲ့ပြီ။ နုက သားကိုပင် သူနှင့် ကင်းအောင် ထားတတ်ခဲ့ပြီ။ သားအပေါ် သူက စိတ် မ၀င်စားဟု နုက စွပ်စွဲခဲ့၏။ အေးချမ်းသော လွတ်လပ်စေလိုသော ချုပ်ချယ်ထိန်းသိမ်းခြင်းကို မုန်းသော သူ၏ မေတ္တာထားပုံကို နုက အေးစက်သတဲ့။ ရှင်က အရူးပဲတဲ့။ စင်စစ် စော်ကားသော စကားဖြစ်သော်လည်း သူ နုကို စိတ်မဆိုးပါ။ ဒါ အမှန်ပဲ မဟုတ်လား။

သူက အနုပညာ၌ ရူးသွပ်သူလေ။ ရူးသွပ်ခြင်းဟာ တကယ်တော့ စစ်မှန်ခြင်းရဲ့ ပြယုဂ်ပဲ။ ဟန်ဆောင် အလိမ်အညာတို့ဖြင့် ဖွဲ့စည်းသော လောကမှာ မှန်လွန်းသော လူကို အရူးလို့ သတ်မှတ်ကြစမြဲပဲ မဟုတ်လား။ သူနေထိုင်ခွင့်ရသော နယ်ပယ်က တဖြည်းဖြည်းနှင့် ကျဉ်းကျဉ်းလိုက်လာသည်။ နု မျက်နှာမှာလည်း အရေးအကြောင်းတွေ အလျင်အမြန် ရောက်လာသည်။

`အိမ်မှာ ဘယ်လောက် ကျပ်တည်းနေသလဲ၊ ရှင်သိရဲ့လား´

နုအသံက ငိုကြွေးသံတွေ လှိုင်းထနေ၏။ သို့ပေမဲ့ တကယ်တမ်းတော့ နု မငို။

`ကျမ တယောက်တည်း ရုန်းရတာ ခုပုံအတိုင်းသာ နောက် တနှစ်လောက် ဆက်သွားရရင် ကျမ ရူးရင်ရူး၊ မရူးရင် ကိုယ့်ဘာသာ သတ်သေမိတော့မယ်´

နုအသံက တိုးတိမ်သွားသော်လည်း သူ့အတွက်တော့ အကျယ်လောင်ဆုံး ပေါက်ကွဲမှုပေပဲ။

ထိုအခါကျမှ ထိန့်လန့်ရကောင်းမှန်း သိခဲ့ပြီ။ နုသည် အသက်နှင့် မမျှအောင် အိုစာနေခဲ့ပြီပဲ။

'ကိုယ်ဘာလုပ်ရမလဲဟင် နု၊ ပြီးတော့ ကိုယ်ဘာမှ မလုပ်တတ်ဘူး ထင်တယ်´

သည်တော့မှ နုက ချုံးပွဲချ ငိုလိုက်တော့၏။

အဲဒီ နောက်ပိုင်းမှာတော့ သူသည် ကိုယ်နှင့် အဆင်မပြေသော လုပ်ငန်းတွေထဲမှာ အံမ၀င် ခွင်မကျစွာ စိတ်ဆင်းရဲခြင်း များစွာဖြင့် ကျင်လည်ရတော့သည်။

ပြီးတော့ မယုံချင်စရာ ကောင်းလောက်အောင်ပင် ကံဆိုးစွာ ဘယ်နေရာမှာမှလည်း အဆင်မပြေခဲ့ပြန်၊ ရက်တွေ၊ လတွေ အများကြီးကို သူ အပန်းတကြီး ဖြတ်၏။ ထိုရက်တွေထဲမှာ နု၏ ငိုရှိုက်သံတွေက အကျယ်လောင်ဆုံး။

အိမ်ကဆိုင်မှာ ပစ္စည်းများ ထပ်မတင်နိုင်တော့၊ သား၏ စရိတ်က မြင့်တက်လာသည်။ သားက ပူဆာ တောင့်တတတ်သော အရွယ်။ နုကတော့ သားသမီး အလိုကို အပြည့်အ၀ ဖြည့်ဆည်းပေးသည့် မိခင်စိတ်အပြည့် ရှိသော အမေ။

သည်တော့ နုမှာ သောကတွေ များလှတော့၏။ သူကတော့ ညံ့ဖျင်းသော ယောက်ျားသာပဲ။

`ရှင်ဟာ အတော် အသုံးမကျတာပဲ´

နု၏စကားက သူ့အတွက် သေမိန့်ဆန်ခဲ့သည်။ ပြီးတော့ သူညံ့သမျှအတွက် ထိုက်တန်သော ပြစ်ဒဏ်။ ထိုပြစ်ဒဏ်ကို ခံရမှာပဲ။ သူ ရောင့်ရဲနိုင်တော့သည်။

တကယ်တမ်းကျတော့ ငိုစရာရှိ ငိုခွင့်ရသော စိတ်ဆင်းရဲသမျှ သူ့ကို ရန်ဖြစ်လိုက်ခြင်းဖြင့် ကုသခွင့်ရသော နုက ဘ၀ထဲမှာ ရှင်သန်နိုင်နေဆဲ။

သူကသာ စိတ်ကျ လောင်မြိုက်ခြင်းတို့ နင်းသတ်ခြင်း၏ အောက်မှာ အခါခါ လဲကျသေဆုံးလို့။

ညညတွေမှာ ပင်ပန်းတကြီး အိပ်ပျော်နေသော နုကို မကြာခဏ သွားသွားခိုးကြည့်ရင်း ယောက်ျားမို့ တရားဝင် ငိုကြွေးခွင့် မရသော သူ၏ ကျိတ်ငိုသံတွေကပင် ခြောက်ကပ် အက်ကွဲ လာခဲ့ပြီ။ သို့ပေမဲ့ သူ့ကို နားလည် သနားမည့်သူ မရှိ။

လွတ်လမ်းက ဘယ်မှာလဲ။ ရှာကြည့်သမျှ ဘယ်နေရာမှာမှ မတွေ့။ မူးယစ်ခြင်း၊ သွေးသားဖျော်ဖြေခြင်း ဘယ်အထဲမှာမှ မရှိ။ တကယ်လွတ်လမ်းက ငွေကြေးပဲဟု တွေးမိလျှင်တော့ တကယ် ရူးသွပ်သွားဖို့သာ ရှိ၏။

ခုတလော တယောက်တည်း စကားတပြောပြောဖြင့် စိတ်အေးချမ်းသာနေသော၊ တယောက်တည်း လွတ်လွတ်လပ်လပ် ရယ်မောနေသော၊ လမ်းလယ်ခေါင်မှာ ဘယ်သူ့ကိုမှ မမှုစွာ အော်ဆဲနေနိုင်သော ပလက်ဖောင်းပေါ် အားလျားမှောက်ကာ ငိုကြွေးနေသော စိတ်ရောဂါသည် တွေ အများကြီး တွေ့လာ၏။

သူက ထိုလူများကိုပင် အားကျနေမိသေးသည်။ ဒါဟာ လွတ်ခြင်း တမျိုးပဲ မဟုတ်လား။

ထိုညမှာတော့ နုက မျက်ရည်မရှိတော့သော မျက်ဝန်းအေးစက်တို့ဖြင့် သူ့ကို စူးစိုက်ကြည့်လျက် ပြော၏။

`ကျမဟာ ကို့အတွက် ပါရမီဖြည့်ဖက်တယောက် မဖြစ်နိုင်တော့တာ သေချာပါပြီ။ ကျမ ပတ်ဝန်းကျင်ထဲမှာ အသိမ်ငယ်ခံပြီး အငတ်မွတ်ခံပြီး လုံးလုံးမနေနိုင်ဘူး။ ခု ကျမ....ကျမဘေးက ရှင့်ရဲ့ အခန်းကဏ္ဍကို ဖြုတ်ဖြုတ်ကြည့်နေတယ်၊ ရှင်မပါဘဲ လောကထဲမှာ နေလို့ ဖြစ်အောင် နေကြည့်တာပေါ့လေ၊ အဲဒါ အောင်မြင်တဲ့ တနေ့ကျရင်တော့ ရှင် ကျမကို ကွာရှင်းပေးပါ´

သူ၏ ဦးခေါင်းထိပ် ဆံပင်ဖျားမှ ပူကနဲ ကြက်သီးတွေ ဖြာကာ ထို သွေးပူရှိန်းတို့က တကိုယ်လုံးကို ဖြတ်လျက် မြန်ဆန်စွာ စီးဆင်းသွားကြ၏။ သူ့မျက်လုံးထဲမှာ ကိုယ့်ကိုယ်ကို လှံသွားတဆုံး စိုက်နစ်နေလျက် ဒူးထောက်လဲကျ သေဆုံးသွားတာ မြင်ယောင်လာသည်။ နားထဲမှပင် အာဖရိကဓလေ့ ယဇ်ပူဇော်သော ဗုံသံတွေ ကြားလာသည် ထင်၏။

ယောက်ျားတယောက်ရဲ့ ခွန်အားကို အစွမ်းကုန် ဖျက်ဆီးနှုတ်ယူလိုက်တဲ့ စကား နု ပြောလိုက် တာပဲ။

`တကယ်တော့ ရှင် ယူသင့်တာ ရှင့် အနုပညာကို ဘာမှန်းညာမှန်းမသိဘဲ အထင်ကြီးဖို့ပဲ သိတဲ့ ခပ်အအ မိန်းမ တယောက်ပဲ´

ဟု နုက ထပ်ပြောလိုက်သည့် အခါမှာတော့ သူ နုရှေ့မှ ကလေးလေး တယောက်လို ထွက်ပြေးမိတော့သည်။ ဒါထက်ပိုလို့တော့ဖြင့် မိန်းမတယောက်ရှေ့မှာ အထူးဖြင့် ကိုယ့်ဇနီးမယားရှေ့မှာ အသိမ်ငယ်ခံဖို့ မသင့်တော့ပြီ။ နုက သူ့မာန၊ အထူးသဖြင့် သူ့အနုပညာကို အစွမ်းကုန် စော်ကား ထိခိုက်ခဲ့ပြီ။ ဒါကိုတော့ သူ လက်မခံလိုပါ။ သူ၏ ထားခဲ့ဖူးသမျှ ငဲ့ညှာ သည်းခံမှုတို့သည် နုအပေါ် ထားသော ချစ်ခြင်းမေတ္တာ တခုတည်းကြောင့် ဆိုတာကို နု မသိလေခြင်း။

ခုတော့ လမ်းဆုံးပြီ။

.......................................

တောင်တန်း၏ အေးရိပ်က အခါများစွာကလို သူ့ကို ကြိုဆိုဆဲ။ ဟိုးတချိန်က သူ့စိတ်တွေ များစွာ အေးရိပ်ရခဲ့ဖူးသည်ကို သတိရသည်။ တောင်တန်း၏ အေးရိပ်ထုထည်နှင့် သူတော်စင် တို့၏ ဆိတ်ငြိမ်ခြင်း ထုထည်ထဲမှာ သူ ကြည်မွေ့လာပြီ။

ပြီးတော့ ထိုအေးရိပ်က အနုပညာဆန်၏။ နုနယ်သိမ်မွေ့သော ချမ်းသာခြင်းနှင့် စိတ်ကြည်နူးဖွယ် သဘာဝ အလှတို့ကို ပေးနိုင်သည် မဟုတ်လား။ ဆိတ်ငြိမ်ခြင်းက ဘာဝနာကို အားပေးသည်။ ရက်တွေ၊ နာရီတွေ သူ သိစရာ မလိုတော့။ မသိတော့။ အနေအစားဆင်းရဲခြင်းကလည်း သူ့ကို မတိုက်ခိုက်နိုင်။ ငွေကြေးတန်ဖိုးဆိုတာ လည်း မရှိတော့။ အနှောင်အဖွဲ့အတွက် လောင်မြိုက် ခဲ့ရခြင်းတို့လည်း ကင်းပ ကြပြီ။ ချစ်သော အရောင်တွေထဲ ကိုယ်တိုင်စီးဝင် ပူးပေါင်းလို့။ သူချစ်သော ဂီတ၏ အတွင်းထဲ မျောနစ်လို့။ အလင်းတွေထဲမှာ လွင့်ဝဲပျံသန်းလို့။ အနုပညာ၏ အနှစ်ထဲ စိမ့်ဝင်ရတာပဲ။ ဒါမှ တကယ့်ကို နူးညံ့နုနယ်ကာ ဆန်းကြယ် သိုဝှက်သော အနုပညာနယ်။ တရားရှာ ကိုယ်မှာတွေ့.....တဲ့။ အနုပညာရှာ တရားမှာတွေ့ဟု သူတွေးမိလာသော တနေ့မှာတော့ ခံစားခဲ့ ရဖူးသည့် အထွတ်အထ်ိပ် ပီတိတို့ထက် များစွာ မြင့်မားလွန်မြောက်သော အေးချမ်းခြင်းကို သူ တွေ့ပြီဟု သိလိုက်တော့သည်။

ထိုအခါ နုကို နှောင်ကြိုးမှ တရားဝင် ဖြေလွှတ်ပေးဖို့ သူတို့ထံ ပြန်ခဲ့တော့သည်။

..................................

(၃)

တကိုယ်လုံး ပေါ့ပါးလန်းဆန်းကာ အရာရာတိုင်းက ကြည်စင်လျက် အနှောင်အဖွဲ့တို့ ကင်းလှသည်။ ထိုအချိန်များမှာ မကြာခဏဆိုသလိုပင် ဗုဒ္ဓ၏ မျက်နှာတော်ကို ဖူးမြော်မြင်ယောင်ကာ အတ္တဘ၀အမှန် ဟူသော ဝေါဟာရတခုကို ကြားယောင် ကရုဏာသက်နေလိုက်သေး၏။

`အမြင့်ဆုံး အနုပညာတရားကို ကိုယ်တွေ့ပြီ´

နုက အနည်းငယ် မဲ့ဟန်ဖြင့် ပြုံး၏။

`ရှင်တွေ့တာ တရားလား၊ မတရားလား ဆိုတာကော ရှင်တကယ် သိရဲ့လား´

နုအသံက အနည်းငယ် တုန်လှုပ်သော်လည်း တင်းမာဆဲ။ သူကတော့ မိန်းမတယောက်၏ အတ္တကိုပင် စန္ဒရားသံဖြင့် ဖွဲ့စည်းချင်လာသေး၏။

ထိုအခိုက်မှာ ပြိုးပြက်ပီသသော စန္ဒရားသံကို သူ ခံစားလာရသည်။ ပြီးမြောက်သော အသံပဲ။ ပြီးတော့ လက်ခုပ်သြဘာတွေလို ကိုယ့်ရဲ့ စိတ်အေးငြိမ်းရာ ပီတိ။

ခုပဲ တောတန်းစပ်ဆီ ပြေးချင်လာပါပြီ။ သစ်ရွက်တို့၏ စည်းချက်၊ လေပြည်တို့၏ ဂီတ၊ သဘာဝရဲ့ ပုံတူ၊ အနုပညာတို့ရဲ့ နိဗ္ဗာန်ဟာ တရား၌ မွေ့လျော်ရခြင်း။
ဒါ အမှန်ပဲ။ သူ ကျေနပ်သထက် ကျေနပ်လာ၏။

.................................

`ကိုယ်လွတ်မြောက်ပြီ နု´

ဒါဟာ ကိုယ့်ရဲ့ လွတ်လမ်းပဲ...
ဒါဟာ ကိုယ့်ရဲ့ လွတ်လမ်းပဲ...
ဒါဟာ ကိုယ့်ရဲ့ လွတ်လမ်းပဲ...

သူ နောက်ဆုံးအကြိမ်အဖြစ် နုကို နှုတ်ဆက်ရေရွတ်သည်။ ထိုနောက်မှာတော့ သူက ကိုယ်ရောင်ကိုယ်ဝါ တင့်တယ်စွာဖြင့် လေထဲမှာ လွင့်မျောလျက် စိတ်၏ စေရာအတိုင်း တကယ်လွတ်မြောက်နိုင်ခဲ့ပြီ ဖြစ်သည်။ ။

+++++

(ပြီးပါပြီ)

လွတ်လမ်း(အပိုင်း-၂)

အိပ်မက် အပျက်မှာ..... သူ့ဘ၀ တနည်းအားဖြင့် သူ့အိပ်ခန်းထဲကို သူစိမ်းမိန်းမတယောက် ရောက်လာခဲ့သည်။ အစမှာတော့ သူက ရှက်ရွံ့သွေးပျက်လျက်။ တပြိုင်တည်းမှာ ထို့အတွက် ကိုယ့်ကိုယ်ကို အထင်သေးပြန်သည်။
ဘာပဲဖြစ်ဖြစ် ငါဟာ ယောက်ျားပဲဟုပင် မနည်း အားတင်းတွေး တွေးနေရသည်။ အဲဒီ မိန်းမက သူ့ဇနီးတဲ့။ နာမည်က `နု´တဲ့။ နုသည် လှပသည်ဟု မဆိုနိုင်သောလည်း သူနှစ်သက်နိုင်သော မိန်းမတယောက်တော့ ဖြစ်နေ ခဲ့ပါသည်။

သူက မိန်းမဆိုလျှင် ထက်မြက်သည်နှင့်အမျှ နူးညံ့သိမ်မွေ့ရမည်။ ထူးချွန်သည်နှင့်အမျှ ယဉ်ကျေးလိမ္မာရမည်။ လွတ်လပ်ပွင့်လင်းသည်နှင့်အမျှ ထိန်းသိမ်းမှန်ကန်တတ်ရမည်ဟု သတ်မှတ်ခဲ့ဖူးရာ ခု နုက အဲလို မိန်းမမျိုး ဖြစ်သည်။ နု၏ ပညာတတ်ဖြစ်ခြင်း၊ သူ စိတ်မ၀င်စားနိုင်သော သူ့မိဘ၏ စီးပွားရေးကို ကူညီနိုင်ခြင်း၊ သူ့ အပေါ် နားလည်ဟန် မျက်လုံးများ ရှိခြင်း၊ လှိုက်လှဲ ချိုသာသော ပြုံးနှုတ်ခမ်းများရှိခြင်းတို့နှင့်ပင် သူက ဇနီးအပေါ် ကျေနပ်ခဲ့ပြီ။

ထိုအခါ သူက လုံးဝ လွတ်မြောက်နိုင်ခြင်း မရသေးသည်ကိုပင် ခါတိုင်းလို မချင့်မရဲ မဖြစ်ဘဲ ရှိနေပြန်၏။

ထိုအခါ.... သူ၏ အိမ်ထောင်သည်ဘ၀က ပထမပိုင်းမှာတော့ ပျော်မွေ့ဖွယ်ကောင်းသားပင်။ တကယ်တော့ သူက မိန်းမဆိုတာကို အရင်က ရုပ်ဝတ္ထုတခုလောက်သာ သဘောထားခဲ့တာ။ တကယ့်လက်တွေ့ကျတော့ မိန်းမ ဆိုတာ သူ့အတွက်ဆန်းကျယ်လှကာ ညွှတ်နူးဖွယ် ကောင်းသော အနုပညာသစ်တရပ်လို ဖြစ်နေခဲ့သည်။

သနပ်ခါးနံ့ သင်းထုံသော၊ ရှည်ပျော့နက်မှောင်၍ မွှေးပျံ့သော ဆံခက်တို့ဖြင့် သာယာဖွယ်ဖြစ်သော၊ နူးညံ့ ချောမွေ့သည့် အာရုံကို ပေးသော၊ အရှက်တို့ ပါဝင်သော်လည်း ချိုမြနွေးထွေးသည့်အတွေ့ကို ပေးသော ဇနီးသည်က သူ့အတွက် ဘ၀ထဲက ရှင်ကွက်တကွက်လို ဖြစ်လာပြန်သည်။

သူသည် တကယ့်ကမ္ဘာသစ် တခုထဲ ရောက်သွားရသူလို နု၏ ဆံပင်တွေကို မ၀ံ့မရဲ ကိုင်တွယ် ကြည့်၊ နုပါးပြင်ကို မထိတထိ နမ်းမွှေး။ နု၏ တောက်ပ ဆွဲငင်သော မျက်လုံးတွေထဲ တိုးဝင် ကြည့်၊ နုက သူ၏ အိပ်မက်၊ ဂီတ၊ ပြီးတော့ ပန်းချီလို ဖြစ်နေတော့သည်။

တကယ်တော့ မိန်းမငယ်တယောက်၏ အယူအဆဆိုတာ သူနှင့် အင်အတန်အလှမ်းဝေး ခဲ့တာပဲ။ အိမ်ထောင်သက် နှစ်လလောက်မှာပဲ သူက အိမ်ထောင်ထဲမှာ ပျော်မွေ့လာခဲ့ပြီ။ ပန်းချီတွေ၊ ဂီတတွေနှင့် ပိုလို့ အသားကျလာခဲ့သည်။

ဒါဟာ နုရဲ့ ကျေးဇူးပဲ၊ အချစ်ရဲ့ ကျေးဇူးပဲ၊ အိမ်ထောင်ဘ၀ရဲ့ ကျေးဇူးပဲ၊ ကိလေသာရဲ့ ကျေးဇူးပဲ ဟုပင် သူ တဖွဖွ တွေးထင်နေမိပြန်၏။

သူ ပန်းချီရေးနေသည့် အချိန်တွေမှာ နုက နေရောင်ဖြာသော ပြတင်းဝ၌ ခပ်လျော့လျော့ထိုင်ရင်း အပြင်ကို ငေးနေတတ်သည်။ အဲဒီ နုကို သူက ပုံတူရေး။ သူ အိပ်ရာမှာ လှဲလို့ စာဖတ်သည့်အခါ နုက သူ့နံဘေးမှာ ၀င်လှဲလို့၊ အိပ်ပျော်သည်လည်း မဟုတ်ဘဲ မျက်လုံးတို့ကို စုံမှိတ်လို့ ငြိမ်နေတတ်၏။ သူကတော့ ပန်းချီရေး ဖြစ် ပြန်တာပါပဲ။

နုက မျက်ခွံသား သိပ်လှသည်။ မျက်လုံးမှိတ်ထားသည့်အခါ နု မျက်ခွံလေး မို့နေပုံက အင်မတန်ပြေပြစ်ပြီး ထိုမျက်ခွံသားပေါ်မှာ အစိမ်းရောင်၊ အနီရောင် သွေးကြောလေးတွေ မြင်နေရ၏။ အဲဒီ မျက်ခွံလေးတွေကို ပုံတူရေးတော့ ခက်လှသည်။ ထိုအချိန်များမှာတော့ ဖိုင်း(fine) ရေး ရတာကိုပင် သူက ပျော်မိနေတတ်ခဲ့သည်။
အဲဒီလို ပုံတူရေးသော အချိန်တွေမှာဆိုလျှင် သူက နုကို သူကိုယ်တိုင်မွေးထုတ်ထားရသော သမီးကလေး လိုလည်း ကြင်နာနေမိတတ်သည်။ အင်မတန် ဆန်းကြယ်သား၊ နားလည်ရခက် သောအချစ်ပေပဲ။

ထို့နောက်မှာတော့ သိပ်မဆိုင်လှပါဘဲ သူက သူချစ်ဖို့ နုနှင့်သူတို့၏ ရင်သွေးတွေကိုလည်း မျှော်မှန်းတတ်လာ တော့သည်။ ကိုယ်တိုင် တဦးတည်းသောသားမို့ အဖော်အပေါင်း အသိုင်းအ၀ိုင်း ငတ်ခဲ့သမျှ သူ ဖခင်ဖြစ်လျှင် တော့ သားသမီး များများ လိုချင်သည်။ နုကိုပြောတော့ နုကလည်း သဘောတူသတဲ့။

ထိုအခါ သူက ထိုနေ့မှာ သားသမီးတကယ် မရှိသေးပါဘဲ နုကို `အမေကြီး´ ဟုခေါ်ပြီး ရင်တွေပင် ခုန်လာခဲ့သေး သည်။ ထိုကာလတွေက တကယ့်ကို စိတ်ချမ်းမြေ့စရာပဲ ဖြစ်၏။ သူ ပန်းချီရေးလျှင် နုက သူ့အကြိုက် ကော်ဖီခါး ပင် ဖျော်ပေးသေး။ ပန်းချီ၌ အာရုံညောင်းလာစဉ် စန္ဒရားတီးလျှင်လည်း နုက နားထောင်နေတတ်သေး၏။ တခါတရံ နုကပင် လိုလိုချင်ချင် တယောထိုးပြဖို့ တောင်းဆိုတတ်သေး၏။ သူနှင့် နုတို့ အကြား၌ ချစ်ခြင်းအတိ ပြည့်နေသော အချိန်များဖြစ်သည်။

အဲဒီကာလတွေကို ပြောင်းလဲသွားစေသူကတော့ နုပဲ ဖြစ်သည်ဟု သူက ထင်သည်။ ဘာလို့ဆို အဖြစ်အပျက် တွေ၊ စရိုက်တွေ၊ အယူအဆတွေ ပြောင်းသွားတာက နုပဲ မဟုတ်လား။ သူကတော့ အရင်တုန်းကအတိုင်း ဘာတခုမှ မပြောင်းလဲခဲ့။ နုကတော့ `ရှင်တို့ ကျမကို မတရားသဖြင့် ညာယူခဲ့ကြတယ်´ဟု စွပ်စွဲရက်ခဲ့သည်။

...............................

အပြောင်းအလဲ၏ အစမှာ သူနှင့် နုတို့ အိမ်ထောင်သက် ဆယ်လအရမှာ နဂိုကတည်းက တရှောင်ရှောင် နေမကောင်းခဲ့သော အဖေဆုံးသွားခြင်းမှ စသည်။ အဖေ မဆုံးခင်ကတည်းက ယိုင်နဲ့ခဲ့သော အဖေ့အလုပ် မိသားစုစီးပွားရေး ပန်းထိမ်လုပ်ငန်းက အဖေဆုံးသောအခါ တပါတည်း လိုက်ပါ ချုပ်ငြိမ်းသွားခဲ့သည်။

အမြဲလို သူတို့ မိသားစုကို ဦးဆောင်ခဲ့သော အဖေ ဆုံးတော့ တသက်လုံး အပူပင်မဲ့နေခဲ့သော အမေက အဖေ့ထံမှာ စည်းစိမ်ဘယ်လောက် ကျန်ခဲ့တယ် မသိ။ စီးပွားရေးကို ဘယ်လို ဆက်လုပ်ရမယ် မသိ။ အမေ့ထံ၌ ပူဆွေးသောက သက်သက်သာ အဖေ့အမွေအဖြစ် ကျန်ခဲ့ သည်ဟု ဆိုရမည်။ သူကတော့လား အမေနှင့် ထပ်တူ (သို့မဟုတ်) အမေ့ထက်ပင် ပို၍ အပူအပင် ကင်းတတ်ခဲ့ သူမို့ အဖေနှင့် ပတ်သက်တော့ သူစိမ်းတယောက်လို ဖြစ်နေခဲ့သည်။

အဲဒီမှာ အလွန်မြန်ဆန်လှစွာ နုက အိမ်ထောင်ဦးစီး နေရာကို ရောက်မှန်းမသိ ရောက်သွားတော့သည်။ မိသားစုထံမှာ အဖတ်တင်ကျန်ရစ်သမျှ ရွှေစတို့နှင့် ရှိသမျှငွေတို့ကို စုဆောင်းလို့ နုက ဈေးထဲမှာ အထည်ဆိုင် ကလေး ဖွင့်မတဲ့။ မနက်လင်းလျှင် အမေက တချွတ်ချွတ်ဖြင့် မီးဖိုထဲ ချက်ပြုတ်။ နုက ရေမိုးချိုး၊ သနပ်ခါးလိမ်း ပြင်ဆင်လို့ ရပ်ကွက်ဈေးကလေးထဲက ဆိုင်ကိုသွား၊ နု နံဘေးမှာ သူက အိပ်ရေးမ၀ဟန် မျက်နှာတခုဖြင့် လိုက်ပါ..... ဆိုင်ဖွင့်...... အထည်တွေ ခင်းကျင်းပေး။ ပြီးတော့ အိမ်ပြန်၊ အိပ်မောကျ၊ တညလုံး အလုပ်လုပ်ခဲ့သမျှ နေ့တွေထဲမှာတော့ သူက တွင်းအောင်းမြဲ။ ခုတော့ အိမ်ထောင့်ဝန်ကြောင့် နုက သူနှင့် အနုပညာအနားမှာ သိပ်မရှိတော့။

ဘ၀ဆိုတာ စက်ဆုပ်စရာ ပုံမှန်ယန္တရားကြီးပဲဟု မြင်လာဆဲ။ သူ့စိတ်ကျညတွေ မြင်ရာမှ ရုတ်တရက် နု ကိုယ်ဝန်ရှိလာသည်။ ဟော... ဘ၀ဆိုတာ အဓိပ္ပါယ်ရှိလာပြန်ပြီ။ သူပါဝင်ဖန်တီးသော လူကလေးတယောက် ရှိလာတော့မည်။ ထိုလူငယ်ကလေး လွယ်ထားသော နုကို သူ ပိုလို့ တန်ဖိုးထားနေမိသေးသည်။

ဒါပေမဲ့ နုကတော့ လက်တွေ့ဘ၀ထဲမှာ ပြောင်းလဲစ ပြုလာခဲ့ပြီ။ ချိုသောအပြုံးတို့ ကွယ်ပကာ ခပ်ထေ့ထေ့ နိုင်သော အပြုံးဖြင့်.... `ရှင်ကတော့ ပျော်တာပေါ့၊ ကိုယ်တိုင် မွေးရ၊ ထိန်းရ၊ ပိုက်ဆံရှာရတာမှ မဟုတ်တာ´ဟု ပြောခဲ့ပြီ။

သူဘယ်လောက် ကြေကွဲ တုန်လှုပ်ခဲ့ရသလဲ....။ ထိုနေ့ရဲ့ ညမှာ နု ကိုယ်ဝန်ကြီးနှင့် အိပ်မာကျနေစဉ် သူ ပုံတူရေးထားဖူးသည့် ပန်းချီကားတွေကို တစိမ့်စိမ့်ထိုင်ကြည့်ရင်း တိတ်တဆိတ် ကြေမွ အက်ကွဲနေခဲ့ရသည်။ `ပိုက်ဆံရှာ´ဆိုတဲ့ စကားလုံးကြီးက သူ့ကို ပထမဆုံး အကြိမ်အဖြစ် ခြောက်လှန့်ခဲ့ပြီ။

သူ ဘာလုပ်ရမလဲ။ အဲဒီ မေးခွန်းကလည်း တစ္ဆေသရဲပဲ။ သားကလေး မွေးတော့ အမေက ဆိုင်ထွက်သည်။ ကလေး တဘက်။ ဗာဟီရ တဘက်နှင့် ပင်ပန်းသော နု။ ဆိုင်တဘက်၊ မီးဖိုချောင်တဘက်နှင့် ပင်ပန်းသော အမေ....။ သူကတော့ ကိုယ့်ကိုယ်ကိုပင် ရှာမတွေ့ဘဲ ဖြစ်နေပြန်သည်။ သားပုံတူတွေ... ကယ်ရီကေးချား တွေတော့ အများကြီး ရေးဖြစ်သားပင်။ သားကို နို့တိုက်နေသော နုကိုပင် Cubism ဖြင့် ပုံ ရေးဖြစ်သေး။

တရက်တော့ ဘ၀မှာ မိုးမှောင်ကြီးကျ၏။ သား ဆယ်လသားမှာ ဖြစ်၏။ အမေ ရုတ်တရက် လဲကျလို့။ အမေ ဆုံးပြီတဲ့။ သူ ကြောင် အ တုန်လှုပ်။ သေခြင်းဟာ အဲသလောက် လွယ်ကူမြန်ဆန်သတဲ့လား။ ဘယ်လောက် ပစ်စလက်ခတ်နိုင်တဲ့ လူ့ဘ၀လဲလို့။ နုကတော့ အားပါးတရ ရှိုက်ငို၏။ `အမေ နုကို တယောက်ထဲ ထားခဲ့ပြီ´ဟုလည်း ဟစ်ပြောသေး၏။ သူကတော့ နု၏စကားထဲမှာ ပိုလို့ တုန်လှုပ်သွားရသည်။ နုဘ၀ထဲမှာ သူ မရှိတော့ပြီလား။

ဈေးထဲက ဆိုင်ကလေးကို ပိတ်လိုက်ရသည်။ အိမ်မှာ ကုန်စုံဆိုင်ကလေး ရောက်လာသည်။ နု မျက်နှာက ပို၍ ကျောက်ဆစ်ရုပ်ဆန်လာသည်။ သားလေး မွေးပြီးကတည်းက နု၏ သွေးသားကို သူ မတွေ့ရတော့တာကို တခါတခါတော့ သူ သတိရတတ်၏။ ဒါပေမဲ့ ထို သတိရခြင်းထဲမှာ နု၏ အေးစက်၍ အဓိပ္ပါယ်မဲ့နေတတ်သော မျက်နှာက ပါပါလာတတ်သည်။

တညမှာ နုငို၏။

`ကျမ သိပ်ပင်ပန်းနေပြီ။ ရှင် ဒါကို မသိဘူး မဟုတ်လား။ ရှင့်မိဘက ငွေတပြားမှ မထားခဲ့တာ၊ သူတို့အတွက် အစုတ်ထုတ်ကြီးဖြစ်တဲ့ ရှင့်ကို ကျမလက်ထဲ ထားပြီး သူတို့ စိတ်ချလက်ချ ဖြစ်သွားတာတွေကလည်း ကျမကို သိပ်နှိပ်စက်တာပဲ။ ကျမကို ရှင်တို့ မတရားသဖြင့် ညာယူ ခဲ့တာပဲ´

အဲဒီညမှာတော့ နုနှင့် သားတို့ရှိရာ မိသားစု အိပ်ခန်းထဲသို့ပင် ၀င်မအိပ်ရဲတော့ဘဲ ပန်းချီခန်းထဲမှာသာ နေခဲ့ရတော့သည်။ ပြီးတော့ တညလုံး ငုတ်တုတ်၊ ခေါင်းငိုက်စိုက်ချ ထိုင်နေမိကာ ငါ ဘာလုပ်ရမလဲဟု ထပ်ကာ ထပ်ကာ စဉ်းစားနေခဲ့ရသည်။

နောက်တော့ ကိုယ်တိုင် မနှစ်သက်သော တောင်တန်း၊ ထန်းတော၊ ထုံးစေတီနှင့် တိမ်ရောင်စုံ တို့ ပါသော ပန်းချီကားတွေကိုပဲ အရောင်မျိုးစုံတို့ဖြင့် ရေးခြယ်၍ ပြခန်းတင်ရောင်းဖို့ စဉ်းစားတော့၏။ သို့ပေမဲ့ ဒါဟာ သူ ညာတာပဲ ဖြစ်မည်။ အနုပညာဆိုတာ တကယ့် ယုံကြည်ချက်ဖြင့် ခံစားချက်ဖြင့်သာ ဖြစ်ပေါ်သင့်တာဟု ယုံကြည်သူ သူ့အတွက်တော့ ဒါဟာ ဖောက်ပြန်ခြင်းပဲ မဟုတ်လား။ သူ့လက်တို့ပင် နာကျင်ကိုက်ခဲလာ သည်ထင်၏။

သူ့ရဲ့ မရောင်းရသေးသော ပန်းချီကားတွေက မီးလိုပဲ လောင်ကျွမ်းကြသည်။ လူတွေက သူတို့နားမလည်သော၊ ပြီးတော့ အနိဋ္ဌာရုံဘက် နွယ်သော၊ လှပရှုချင့်ဖွယ် မိန်းမရုပ် သို့မဟုတ် ရှုခင်းမဟုတ်သော ပန်းချီကားတို့ကို ငွေပေး၍ မ၀ယ်ကြဘူးတဲ့။ သူ အော်ရယ်ဖြစ်ခဲ့ဖူးသည်။

နောက်တော့ သူ မပြေပျောက်နိုင်သော ဒဏ်ရာတို့ဖြင့် နာကျင်ကာ စန္ဒရားပဲ ဖိတီးဖြစ်သေးသည်။ ထိုအချိန်မှာတော့ ဗျိုင်းတောင်ဆန်ဆန်သာ တီးရတာ အရသာတွေ့၏။ နောက်တော့ သီချင်တွေ ရေးမိလို့။ ရေးဖြစ်သော သီချင်းတွေက သံစဉ်ဦးဆောင်မှုဖြင့် ဖွဲ့တည်သော သီချင်းများ၊ သီချင်းကို စာသားဖြင့် အဆုံးသတ် မရဘဲ သံစဉ်ဖြင့်သာ ဆုံး၍ ရမည့်သီချင်းတွေ။

နုက `နေပါဦး... ရှင် အဲလောက် ကြိုးစားပမ်းစား လုပ်နေတာတွေက ဘာ့အတွက်လဲ။ ရှင့်ပန်းချီကားတွေ သီချင်းတွေဆီက ရတဲ့ ပိုက်ဆံနဲ့ ကျမ ရေတခွက်လောက်ပဲ ဖြစ်ဖြစ် ၀ယ်သောက်ရဖူးချင်ပါရဲ့´တဲ့။ နု၏ အဲဒီ စကားအဆုံးမှာတော့ သူက သီချင်းတွေ၊ ပန်းချီကားတွေကို မျက်နှာ ငယ်ငယ်ဖြင့် လည်ရောင်းနေသော ကိုယ့်ကိုယ်ကို မြင်ယောင်ကာ မူးယစ်ချင်လာခဲ့သေးသည်။

ထိုအခါ ဆော့ခရတ္တိစ်၊ ဂေါ်ဂင်၊ ဗီသိုဗင်၊ ဗင်ဂိုး၊ မွန်ရိုးတို့ကို အော်ခေါ် မိတော့သည်။ ဂျွန်လင်နွန်၊ မြို့မငြိမ်း၊ ပေါ်ဦးသက်၊ ကြည်အေးတို့ကို လွမ်းဆွတ်တမ်းတကာ ဘ၀ထဲမှာ သူ ကြိုးစားရမှာ... အနုပညာတွေ ဖန်တီးနိုင်ဖို့လား။ ကျော်ကြားဖို့လား ဟူသော အမေးတို့ဖြင့် ငိုကြွေးပြန်သည်။

ဘယ်မှာလဲ ....လွတ်လမ်း။

++++++

(ဆက်ရန်ရှိသေး..)

လွတ်လမ်း

ဘ၀က စိတ်ပျက်စရာကောင်းတယ်လို့ တကြိမ်မှာ တော်တော် ထင်ခဲ့ဖူးပါတယ်။ အဲဒီတုန်းက ၁၉၉၄။ လောကကြီးက ဘာမှ မပေးနိုင်။ ကိုယ်လုပ်တိုင်းလည်း မဖြစ်။ လူတွေကိုလည်း စိတ်ပျက်.... အမှန်တရား ဘက်မှာ လူသိပ်နည်း တာပဲ လို့ ထင်..။ အနုပညာသာ အားကိုးရာလို့ ထင်။ အဲဒီကာလမှာ ကျမ လွတ်လမ်းဝတ္ထုကို ရေးမိခဲ့တာပါ။ စံပယ်ဖြူမဂ္ဂဇင်း (၁၉၉၅)နဲ့ စတိုင်သစ် မဂ္ဂဇင်း (၂၀၀၅ ဇန်န၀ါရီ)တွေ မှာ ဖော်ပြခဲ့ဖူးပါတယ်။ မရင့်မာနိုင်သေးဘူးပဲဆိုဆို ခုထိလည်း တခါတလေ အဲလိုပဲ ခံစားရတတ်နေတုန်း ပါပဲ....

လွတ်လမ်း

(၁)

`ဒါကတော့ ကိုယ့်ရဲ့ လွတ်လမ်းပဲ´

ထိုစကားကို သူ ခပ်တိုးတိုး ရေရွတ်လိုက်သည်။ ပြီးတော့ ထိုသို့ ရွတ်ရခြင်း၌ အရသာတွေ့ကာ ထပ်ကာ ထပ်ကာ ရွတ်နေမိသည်။ သုံးလေးခါ ရွတ်ပြီးကာမှ သူ့ရှေ့မှာ ရှိနေသော ဇနီးသည် ကို သတိရ၏။

အို... နည်းနည်းတော့ သူ စိတ်ထိခိုက်သလို ခံစားလိုက်ရ၏။
ကြည့်လေ.... ဇနီးက အောက်နှုတ်ခမ်းကို တင်းတင်းဖိကိုက်လျက်မှပင် မျက်ရည်တို့ဖြင့်လည်း ၀ိုင်းလည်နေပြန် သော မျက်လုံးများဖြင့် သူ့ကို ကြည့်နေတာ။ အဲသည်မိန်းမ ဘာတွေ ခံစားနေရသလဲ။ သူ မသိတာကြာပြီပဲ။ အထူးသဖြင့် အဲဒီမိန်းမရဲ့ မျက်ရည်တွေ၊ အပြုံးအရယ်တွေ၊ သွေးနွေးရင်ခုန်မှုတွေ သူ မမြင်ရတာ ကြာလှပြီ။

ခုတော့ အဲဒီမိန်းမက မျက်ရည်များနှင့်....။ ပြီးတော့ နာကျင်ကြေကွဲဟန်ဖြင့်လည်း နှုတ်ခမ်းကို တင်းတင်း ကိုက်လို့။ ဒါဟာ ချစ်ခြင်းရဲ့ ပြယုဂ်လား၊ မုန်းခြင်းရဲ့ ပြယုဂ်လား၊ ဒါလည်း သူ မသိတော့။ သိလည်း မသိလိုတော့။

ပြီးတော့ ....ဒါဟာ ချစ်ခြင်းနှင့် မုန်းခြင်းတို့ ပြိုင်တူဖြစ်ပေါ်နေခြင်း၏ ပြယုဂ်လည်း ဖြစ်နိုင်သေးသည်ပဲ။
လူတွေဟာ သူရူးတွေပဲ မဟုတ်လား။
သူတို့ထံ၌ ဘာမဆို ဖြစ်ပျက်နိုင်သည် မဟုတ်လား။

...........................

`ဒါဟာ ကိုယ့်ရဲ့ လမ်းပဲ´

သူ့အသံက အောင်မြင်သူ တယောက်၏လေသံဖြင့် ၀ံ့ကြွားနေသည်ကို ကိုယ်တိုင်ပင် သိ၏။ အဲဒီစကားတွေကို ခုလို ထုတ်ပြောနိုင်ဖို့ သူဘယ်လောက် ရင်းခဲ့ရသလဲ။ အချိန်တွေ၊ ရှာဖွေမှုတွေ၊ တင်းကျပ်မှုတွေ၊ မွတ်သိပ်မှုတွေ၊ ချောင်ပိတ်ခံရခြင်းတွေ၊ မက်တာမော်ဖိုးဆစ် (metamorphosis) တွေ၊ ချည်နှောင်မှုများကို ဖြတ်တောက်ရခြင်း တွေလည်း ပါကြ၏။ ထို အရင်းအနှီးတွေထဲမှာ သူ ရုန်းကန်ဖောက်ထွက် မကြာခဏ ထွက်ထွက်ပြေး။ တခါတခါ လမ်းတွေလည်း မှားခဲ့ဖူးသည်။

(၂)

အခြေခံက `လူဘ၀ဆိုတာ ချောင်ပိတ်ခံရမှု တခု´ဟု သူ ယုံကြည်မိထားခြင်းမှ စခဲ့သည်။ အဲဒီ အယူအဆကို အသေအချာ တွေ့ရှိခံစားလိုက်ရချိန်မှ စကာ ခုချိန်တိုင် သူက ဒါဟာ အမှန်ပဲဟု ယုံကြည်ခဲ့၏။ (အယူအဆဆိုတာ သူများဆီ ချမပြခင် ကိုယ်တိုင်ကိုယ်ကျ ယုံကြည်ထားဖို့ အရေးကြီးသည်ဟု သူက ယူဆပြန်သည်။)

သူက မိဘတို့၏ တရားလွန်ဂရုစိုက်မှု၊ ထိန်းချုပ်မှု၊ ပိုးအိမ်ထဲမှာ ကြီးပြင်းအရွယ်ရလာရသူ ဖြစ်၏။ ထိုအခါ သူက ကိုယ့်ကိုယ်ကို အရွယ်ရလာသော်လည်း အရွယ်မရောက်ဟု မြင်ကာ နှောင်ဖွဲ့ခံရသော ဘ၀ထဲမှာ မပျော်ခဲ့။

သို့နှင့်.... အသက်ဆယ်နှစ်သားမျှနှင့်ပင် သူက ဘ၀ထဲမှ ချောင်ပိတ်ခံရသည်ဟု ခံစားတတ်လာခဲ့ကာ ထွက်ပေါက်ကို လိုက်ရှာတတ်ခဲ့၏။ ထိုအခိုက်မှာ သူရှာတွေ့ခဲ့သော ထွက်ပေါက်က အဖေ့စာအုပ်စင်မှ စာအုပ်တွေ ဖြစ်လာခဲ့သည်။

စာအုပ်များစွာထဲ သူမွေ့လျော်ပျော်ပါးကာ အသက်နှင့်မမျှသော စာအုပ်တွေကိုပင် နားလည်နိုင် စွမ်း ရှိလာခဲ့၏။ သမိုင်းရေးရာ၊ စိတ်ပညာဆိုင်ရာ၊ မြန်မာအနုစာပေဆိုင်ရာ။ နိုင်ငံရေးဆိုင်ရာ၊ ကမ္ဘာ့သမိုင်းဆိုင်ရာ တကယ့် အကြောင်းအရာတွေထဲမှာ သူထွက်ပေါက် ရခဲ့၏။

နောက်တော့ သူ၏ စာဖတ်နှုန်းက အဆမတန် မြင့်လာကာ အသက်ဆယ့်ငါးနှစ်သားမှာပင် ဓမ္မပဒ၊ ဗုဒ္ဓ၀ါဒပြဿနာများ၊ ဇိနတ္ထပကာသနီ၊ စွယ်စုံကျမ်းများမှသည် ဆစ်ဂမန်ဖရွိုက်ဒ်၏ စိတ်ပညာဆိုင်ရာ စာအုပ်များ၊ နန္ဒာသိန်းဇံ၏ အတွေးအမြင်များအထိ။ နောက်တော့ ကျူဘစ်ဇင်လို...၊ ဆာရီယယ်လစ်ဇင်လို....၊ နောက်ဆုံး ဂေါသစ်လို.... ပန်းချီပညာရပ်တွေ အထိ...။

တကယ်တော့ သူ့ရဲ့ ဆင့်ကဲဖြစ်စဉ်တွေက ပရမ်းပတာ နိုင်ခဲ့သလို မတန်တဆလည်း ဖြစ်ခဲ့တာ ပဲ။ ထိုအခါ သူက ကိုယ့်ကိုယ်ကို အယုံအကြည်လွန်ကာ အထင်ကြီးလွန်းသော စိတ်တို့ပါ ပွားများတတ်လာခဲ့သည်။

နောက်တော့ သူက အသက်ပင် နှစ်ဆယ်မပြည့်ခင်မှာ ဗီသိုဗင်နှင့် မိုးဇက်၏ စန္ဒရားသံတွေကို ခံစားတတ်နေခဲ့ပြီ။ နောက်တော့ ဗင်ဂိုးကို ကြိုက်၊ မွန်ရိုးကို ကြိုက်၊ မြို့မငြိမ်းကို ကြိုက်၊ ပရက်စလေရဲ့ အသံဝါကြီးကိုလည်း ဘာနဲ့မှ မလဲနိုင်ပြန်။

ထိုအခါတွေမှာ သူသည် အနုပညာနှင့် ထိတွေ့နေရသော ဘ၀ထဲမှာ အရသာတွေ့ကာ အချိန်များကို မြိန်ယှက်လာခဲ့သေးသည်။

အဲဒီ မြိန်ယှက်ခြင်းထဲမှာ နစ်မြုပ်သထက် နစ်မြုပ်၊ လူ့ဘ၀မှာ အနုပညာသာ အလိုအပ်ဆုံး၊ ဘ၀ရဲ့ အပြည့်စုံဆုံး ပြည့်စုံမှုဟာ အနုပညာထဲမှာသာရှိတယ်။ ဘာမှ မလို၊ သိပ္ပံပညာမလို၊ ရုပ်ဝတ္ထုတွေ မလို၊ ဂီတသံစဉ်တွေ၊ ပန်းချီကားချပ်တွေ၊ ရသစာပေတွေထဲမှာ အားလုံးကို ရှာ တွေ့ပိုင်ဆိုင်၏။

သူသည် အကြိမ်များစွာ သာယာလွင့်မျောလို့ အာဟာရသိဒ္ဓိပင် မြောက်နေသေးတော့၏။ ပတ္တလားခေါက်၊ စန္ဒရားတီး၊ ဂစ်တာကို Plucking တီး။ ထူးခြားသော အသံတွေလည်း တွေ့၏။

တခါတခါကျတော့ ရုတ်တရက် လွတ်မြောက်ပေါက်ထွက်ကာ Mode တွေထဲမှာ ပေါ့ပါး လွတ်လပ်ရ၏။ ဒါဟာ လူ့ဘ၀ရဲ့ အထွတ်ထိပ်သော ပီတိစည်းစိမ်ပေပဲ။

ညညတွေမှာ မီးမှောင်ချလို့ ရွှေပြည်အေးရဲ့ စန္ဒရားလက်သံတွေ၊ မိုးဇက်နဲ့ ဗီသိုဗင်ရဲ့ စန္ဒရားသံ တွေ၊ ဓါတ်ပြားဖွင့် နားထောင်။ တခါတခါတော့ ကက်ဆက်ထဲမှာ သူ့ဘာသာသွင်းထားသော မိုးဒေ၀ါ စန္ဒရားလက်သံတွေ၊ ဘုံပျံနေနန်းတွေ၊ ဘုန်းမိုးသွန်းလောင်းတွေလည်း နားထောင်မိသေး၏။

တယောက်တည်း ငြိမ်သက်တိတ်ဆိတ်လို့။ စန္ဒရားသံတွေ အပြေးမှာ စိတ်က လိုက်စီးလို့။ တလောကလုံးမှာ သူတယောက်တည်းသာ ရှိနေတော့၏။ သက်ရှိသက်မဲ့... ပတ်ဝန်းကျင်မဲ့... ဒါကိုပဲ ၀ိပဿနာဟု သူက ဆိုချင်ပြန်သည်။

တညမှာတော့ မှတ်မှတ်ရရ သူဖန်တီးထားဖြစ်တဲ့ တယောသံတွေကို ကက်ဆက်နဲ့ နားထောင်ရင်း အခန်းမှောင်ထဲမှာ ပိုလို့ ပိန်းပိတ်အောင် မှောင်ပြီး တိတ်ဆိတ်ခြင်းတို့ နက်ရှိုင်းသည့် ထုထည်ကြီးထဲ သူ စုန်းစုန်း မြုပ်ဝင်သွားခဲ့၏။

နောက်တော့......
အဲဒီ အတိတ်ဆိတ်တကာ့ အတိတ်ဆိတ်ဆုံးထဲမှာ..... ရုတ်တရက် သာယာသော တေးသံချိုမြက ညင်သာရာမှ တဖြည်းဖြည်းကျယ်လွင်ကာ ပန်းငုံတွေ တလွှာချင်း ပွင့်အာလာကြသလို၊ မြက်ပင်တွေ မြေထဲမှ တပင်ချင်း ထိုးပေါက်လာကြသလို သူ့အာရုံထဲကို စီးဝင်လာကြသည်။ ပြီးတော့ ထိုသံညောင်းက မကြုံစဖူး ထူးစွသော အသံတပါးလည်း ဖြစ်ပြန်၏။

နောက်တော့ အမှောင်မိုက်ထဲမှာပင် အေးမြလှသော ငွေရောင်အလင်းတန်းက သူ့ကို လွှမ်းခြုံပစ်လိုက်သည်။ ထူးဆန်းလှစွာပင် ထိုအလင်းတန်းကြားမှာ အေးမြခြင်းနှင့်အတူ လုံခြုံနွေးထွေး ခြင်းကိုလည်း ရ၏။

ပီတိအဟုန်ကလည်း မြင့်မားလိုက်လာသည်။ သူ့ခန္ဓာကိုယ်ထဲမှ သူကပင် လွင့်ပျံထွက်သွားပြီ ထင်၏။ ထိုအချိန်မှာ ခံစားရသော ငြိမ်းအေးခြင်းက ရမ္မက် ကိလေသာကိုပင် သတ်နိုင်နေ၏။

ကြားခဲ့ဖူးသမျှမှာ အထူးဆန်းဆုံးတေးသံ၊ အသာယာဆုံးတေးသံ၊ အဆွတ်ပျံ့ ဆုံးတေးသံ ကြည်နူးပီတိကို တစိမ့်စိမ့် ခံစားရစေသော တေးသံ။ ထိုတေးသံက ညင်းညင်းညံ့ညံ့ လွင့်ပျံ့။

အဲဒီ တညလုံး အမှောင်နက်နက်ထဲမှာပဲ သူ မျောလို့။ အိပ်ပျော်မသွားခဲ့တာ သေချာလျက်မှပင် အချိန်တို့ကို မသိတော့။ လူတို့ကိုထိန်းချုပ်သော`အချိန်` ဆိုတာထဲမှာလည်း သူ လွတ်မြောက် ခဲ့ပြန်ပြီ။

ဒါပေမဲ့ မနက်ခင်းမှာတော့ အလင်းရောင်ရဲရဲနှင့် အပြင်လောကရဲ့ ဆူညံမှုက သူ့ကို လှုပ်နှိုးလို့ သူ အိပ်ရေးဝသလို လန်းလန်းဆန်းဆန်း ပြန်နိုးတော့သည်။

တကယ်တော့ အဲဒီတော့မှ သူ သေဆုံးသွားခဲ့ရတာလို့ သူကတော့ ခံစားလိုက်ရ၏။ ဖြတ်ခဲ့ရသော ည၏ ပီတိကို လူတွေကြောင့် အထူးသဖြင့် သူ့လို မလွတ်မြောက်နိုင်သေးသူတို့ ရဲ့ ပုံမှန်လည်ပတ်မှုတွေကြောင့် သူ ပြန်လက်လွှတ်လိုက်ရတာကို သူ ခံစားသည်။

ထိုအခါ သူ လောဘကြီးလာ၏။
ခံစားဖူးလိုက်သော ပီတိ၊ လွတ်မြောက်ခြင်း ပီတိ သို့မဟုတ် ပြီးပြည့်စုံရမှု၊ ဒါကို သူ အမက်မော ကြီး မက်မောရပြီ၊ ထိုအခါ နေ့တို့က သူ့ကို စိတ်ပျက်စေခဲ့ပြီ။ နေ့တို့က ပူလောင်၊ ဆူညံ၊ မလိုအပ်တာတွေနဲ့ ဖွဲ့စည်းလို့။ လူတွေရဲ့ ရုပ်ဝတ္ထု တပ်မက်မှုကရော...။ ပြီးတော့ အဓိပ္ပါယ်မဲ့သော သင်ယူရခြင်း(ကျောင်းပညာရေး အပါအ၀င်) တွေရော၊ ဒါတွေ အားလုံးဟာ အရေးမပါတာတွေပဲ။

သူ ပတ်ဝန်းကျင်ထဲမှ လွင့်ထွက်သွားပြီထင်၏။ ပြီးတော့ သူ ပိုပျော်လာသည်။ ညထဲမှာ သူ့ဘ၀ ရှင်းသန်ခြင်း ရှိသည်။ ညညတွေမှာ သူ့အိပ်ခန်းကျဉ်းလေးကို တံခါးတွေ အလုံပိတ်၊ ခန်းဆီးတွေပိတ်၊ မီးမှောင်အောင် ပိတ်လို့။ သူက မြို့မငြိမ်း၏ သစ္စာသီချင်းကိုပဲ အထပ်ထပ် နားထောင်မိပြန်၏။

နောက်တော့ အဲလို နေ့နဲ့ည လွဲမှားစွာ နေ့အိပ်ပြီး ညမှာ လွင့်မျောသော ရက်များစွာတို့အလွန်၊ တည ဒါမှမဟုတ် အရုဏ်ချိန် ဖြစ်လိမ့်မည်။ ဘုံပျံနေနန်း စောင်းသံကို နားထောင်ဆဲ သူ့ဆံဖျားတွေ ရှိန်းမြကာသူ့အာရုံက ဖျတ်ကနဲမှောင်မိုက်သွားပြီး သူ့နားထဲမှာ စကားသံ တခွန်း ကြားလိုက်ရသလို ထင်၏။

ဘာတဲ့.... သူအာရုံ စိုက်လိုက်တော့.... `အဲဒါဟာ မှော်ပဲ´တဲ့။ တိုးတိုးသံကလေး၊ ဘယ်သူ ရွတ်လိုက်တာလဲ။

ထိုခဏမှာ သူ ၀ုန်းကနဲ ခုန်ထ၊ သူ့အာရုံမှာ လင်းပြက်ဝင်းထိန်လို့၊ ကြည်လင်ရှင်းသန့်လို့....။

ခန်းဆီးတွေ ဖယ်..... ပြတင်းတွေ တွန်းဖွင့်.... မလင်းတလင်းတလင်း အာရုဏ်ရောင်ကို မြင်၏။ အာရုဏ်ဆည်းဆာ၏ ပျို့တက်လာသော အသွေးအရောင်တွေကို ဘယ်ပန်းချီသမားက ဖွဲ့စည်းနိုင်မလဲ။ အဲဒီ အလင်းမပီ့တပီအောက်မှာပဲ သူ ထောက်ခုံနှင့် ကင်းဗတ်ကားကို ပြင်ကာ ဆေးခွက်တွေ ပြင်ကာ ကိုယ်တိုင်မသိဘဲလျက် စီစဉ်တကျနိုင်စွာ ပန်းချီရေးနေတော့သည်။

သူ့ကို ဗင်ဂိုးက စီးနင်း၊ ရေနွားက စီးနင်း၊ ဂေါ်ဂင်က စီးနင်း၊ ဒါလီက စီးနင်း၊ ပေါ်ဦးသက်က စီးနင်း၊ မြို့မငြိမ်းက စီးနင်း၊ တဂိုးက စီးနင်း၊ ဂျွန်လင်နွန်က စီးနင်း....။ ဒါမှမဟုတ် ပူးဝင်ကြတာပဲ ဖြစ်မည်။

သေချာသည်က သူဟာ သူမဟုတ်တော့။ ဒါပေမဲ့ ဘယ်သူရယ်လို့လဲ အတိအကျမသိ။ သူ့အသိမှာ ဘာမျှမရှိ။ ပေါ့ပါးလွင့်ပျံ့။ အချိန်တွေကတော့ သူ့ကို မစီးနင်းနိုင်ကြပြန်။

သူကတော့ အာကာသထဲထိအောင်ပင် လွင့်သွားတော့ပြီ ထင်၏။ အဲဒီမှာ သူစုံမက်ချစ်ခင်သော Space (ဟင်းလင်းပြင်) အရသာကိုပင် သူ ခံစားရသေးသည်။

နောက်တော့ သူ့ပန်းချီကားတွေကလည်း သူကိုယ်တိုင်ပင် အံ့သြရလောက်အောင် အမျိုးစုံလှသည်။ တချို့က အရောင်တွေချည်းပါ၏။

သို့ပေမဲ့ သေချာကြည့်တော့ဖြင့် ဆည်းဆာချိန်တွေဖြစ်နေသည်။ ညနေ ဆည်းဆာ၊ သန်းခေါင် ယံ ဆည်းဆာ၊ အာရုဏ်ဆည်းဆာ၊ မွန်းတည့်ဆည်းဆာ၊ ပူလောင်ခြင်း၊ သာယာခြင်း၊ အေးစက်သိပ်သည်းခြင်း၊ ဆန်းကြယ်ခမ်းနားခြင်းတွေ ခြုံလွှမ်းကြသော ဆည်းဆာတွေပေါ့။

နောက်တော့ မြို့ပျက်ပုံတွေ။ သို့ပေမဲ့ ခပ်ဝါးဝါး၊ မှောင်ရီရီ၊ အလဲလဲအပြိုပြိုဖြစ်နေသော ကျောက်ရုပ်ထုတွေလည်း ပါသေးသည်။

နောက်တော့ အေးခဲခြင်းကိုပြနေသော သမုဒ္ဒရာရေပြင်ပေါ်မှ ည၏အရောင်တွေ၊ အမှောင်တွေ၊ ရောထွေး ခြင်းတွေ။ တိမ်တွေကိုကျတော့ ကျူဘစ်ဇင် (Cubism) နည်းဖြင့် ရေးထား၏။

ဆာရီယယ်လဇင်မ်(Surrealism) ကားကတော့ ကောင်းကင်မှာ ကြယ်စုတွေကြားမှာ လူတယောက် ပျံသွားတာ ကိုပဲ ရေးခြစ်ထားသည်။ ပျံသွားတဲ့ သူကတော့ သူ့မျက်နှာနဲ့ပဲပေါ့။ တောင်ပံတစုံက ငွေရောင် လက်ပလို့။ ဟင်းလင်းပြင်အမှောင်ထုထည်နဲ့ ကြယ်ပျောက်တွေ ကြားမှာ သူ့ရဲ့ငွေရောင်ကိုယ်ထည်၏ အလင်းက ရင်ကို လှုပ်ခါ တုန်လှုပ်နေစေသည်။

ကြည့်စမ်း...
သူရေးသမျှ ပန်းချီကားများစွာ။ နေ့များစွာ.... ညများစွာ(သူ့အတွက် သီးသန့်ဆိုလျှင်တော့ နေ့ညဟူသည် သတ်မှတ်ချက်တို့ မလိုတော့ပြီ။)

အမေပို့ပေးသမျှ အစားအသောက်တို့ကိုလည်း အရသာ မသိဘဲ စားခဲ့လို့။ အဲဒီအချိန်မှာတော့ သူ ဘာကိုမျှ မသိ။ ခံစားရခြင်းတို့လည်း မရှိ။ ဒါဟာ ပြီးပြည့်စုံရခြင်းပဲ။ ပြီးတော့ အိပ်မက်လည်း ဆန်သေးသည်။ သို့ပေမဲ့ ထိုအိပ်မက်ကတော့ ထာဝရ တည်တံ့နိုင်စွမ်း ရှိ၏။

သို့ပေမဲ့ ထိုအိပ်မက်ကို အမေက ဖျက်ခဲ့၏။ အမေ့မျက်လုံးတို့ စိုစွတ်ဝေရီကာ အရောင်တမျိုး စွန်းပေလျက်...... `သား ဒီအတိုင်းနေလို့တော့ မဖြစ်တော့ဘူး´ဟု သူ့ကို စီရင်ချက်ချသလို ပြောပြီး သိပ်မကြာခင်မှာပဲ သူ့အိပ်မက်တို့ ပျက်ရကာ `တကယ်တော့ လူ့ဘ၀ဆိုတာ ချောင်ပိတ်ခံရခြင်း တခုပဲ′ဟု သူ စွဲလမ်းယုံကြည် လိုက်ရတော့တာ ဖြစ်သည်။

...............................

(ဆက်ရန်..)

မြေနဲ့အတူ(ဇာတ်သိမ်း)

နောက်ပိုင်းရက်မှာတော့ ဘ၀ထဲ အကျဉ်းကျရသူက ကျမတယောက်တည်းမဟုတ်တော့ဘဲ မောင်ပါ ပါလာခဲ့ပြီ။ မောင်က ကျမနံဘေးမှာ စက်ရုပ်တရုပ်လို။ ကျမကိုလည်း သိပ်မျက်နှာချင်းမဆိုင်ဘဲ နေ၏။ ကျမက အထီးကျန်ခြင်းနှင့်အတူ သင်းကွဲခြင်းကိုပါ ခံစားလာရသည့်အခါမှာတော့ ဒီအခြေအနေထဲ ဒီအတိုင်း ဆက်သွားလို့ မဖြစ်တော့ဟု ထင်လာသည်။ နေ့ရက်တို့က တနေ့ထက်တနေ့ ချောက်ချား တိတ်ဆိတ် လာဆဲ.........။ တနေ့မှာတော့ နေ့လယ်ခင်း မောင်ထမင်းပြန်မစားသည့်အကြောင်းအရာက ကျမကို ဒေါသဖြစ် စေခဲ့လေသည်။

နေ့ခင်းနေပူပူထဲ ကျမလယ်ထဲလိုက်လာမည်ကိုတော့ မောင်က စိတ်ပူလေသည်။ အိမ်နှင့် တမိုင် ခရီးလောက် ဝေးသော လယ်ကွင်းဆီရောက်ဖို့ လမ်းလျှောက်လာရသည့်အတွက် သည်တကြိမ်မှာတော့ ကျမက စိတ်ဇောနှင့် မမောမိပေ။ လယ်ထဲရောက်တော့ မောင်နှင့်အလုပ်သမားတွေ လယ်ထွန်စက်နားမှာ အလုပ်ရှုပ် နေကြ၏။ တဲမှာတော့ ပွက်ပွက်ဆူနေသော ထမင်းအိုး။ နံဘေးမှာ ငါးပိထောင်းလက်စ ငရုတ်ဆုံတလုံး။ သခွားသီးတွေ၊ ငရုတ်သီးစိမ်းတောင့်တွေနှင့်။ ခဏကြာမှ မောင့်အလုပ်သမားတယောက်က ထမင်းအိုး လာကြည့်ရင်း ကျမကို တွေ့သွားသည်။ သူက လှမ်းခေါ်မှ မောင်က ကျမဆီရောက်လာသည်။ ကျမကတော့ မောင့်ကို တုန်တုန်လှုပ်လှုပ် ငေးကြည့်နေမိသည်။

ဖျင်အင်္ကျီလက်ရှည်နှင့် ဂျင်းဘောင်းဘီနှင့် ခမောက်နှင့် မောင်က ချွေးတို့ ရွှဲနစ်လို့။ အဲဒါ ကျမ ယောက်ျားပေါ့လေ၊ အဲလိုဘ၀ထဲမှာ သူက ရိုးမြကျ နေသွားတော့မှာလား၊ ကျမရဲ့အချစ်က သူ့ကို မဖြားယောင်း နိုင်ဘူးတဲ့လား။ မောင်က ကျမကို နူးနူးညံ့ညံ့ ပြုံးပြ၏။ ဟိုးအရင်က မင်းသားတပါးလို ချစ်စရာကောင်းခဲ့သူ၊ ခုတော့ သူ့ရဲ့ရွေးချယ်မှုကြောင့် ဘာတန်ဖိုးမှ မရှိတော့သလို။

`မောင်ထမင်းပြန်မစားလို့´

မောင်က ကျမဘေးမှာ ခြေပစ်လက်ပစ် ထိုင်ချ လိုက်သည်။

`ဟုတ်တယ်... ထွန်စက်ပျက်လို့´

`ခု ပြန်စားမလား မောင်..... အိမ်မှာ အဆင်သင့်ပဲ´

မောင်က ကျမကို လှည့်ကြည့်ပြီး.....

`ခုပဲ စားလိုက်တယ်၊ ဗိုက်လည်း ဆာလာပြီ၊ စက်ကလည်း မရသေးတော့ ဒီမှာပဲ စားလိုက်တယ်၊ မောင် ဒီမှာ စားလိုက်တာနဲ့ ထမင်းတောင် ထပ် ချက်ရတာ´

သေချာတာကတော့..... အဲသည်အချိန်မှာ ကျမမောင့်ကို စကားတစုံတရာ မပြောချင်တော့ခြင်းပင်။

`မေက ဘာလို့လိုက်လာရသလဲကွာ၊ နေပူကြီးထဲမှာ´

ကျမ ဘာကိုမှ မတုံ့ပြန်ချင်တော့၊ ဒါဟာ မောင့်ရဲ့ကြင်နာခြင်းဟုလည်း ကျမ မတွေးချင်တော့ပြီ။

`ကဲ.... ကိုယ်ပြန်မယ်´

`လှည်းနဲ့ ပြန်ပါလားမေ.... မောင် တယောက်ယောက်ကို ပို့ခိုင်းမယ်လေ´

ကျမ မောင့်ကို ခေါင်းညိတ်ခေါင်းခါပင် မတုံ့ပြန်ချင်တော့ဘဲ လှည့်ထွက်လာမိသည်။ ကျမစိတ်ထဲ မောင့်ကို ဆုံးရှုံးလိုက်ရသလိုပင်။ မောင့်ဘ၀မှာ ကျမဟာ ဘာအတွက်မှ မလိုအပ်တော့။ ကန်သင်းရိုးတွေကို အဖြတ်မှာ မောင် ကျန်ခဲ့ရာဆီ လှည့်ကြည့်စဉ် မောင်က ကျမမျှော်လင့်သလို ကျမဆီ ကြည့်မနေဘဲ စပါးပင်တပင်ကို ငုံ့ကြည့်စစ်ဆေးနေသည်ကို တွေ့လိုက်သည့်အခါမှာတော့ ကျမ၏မျက်ရည်တို့က ကျလာ ခဲ့တော့သည်။ မောင်က ကျမကိုပင် နောက်ဆံ မတင်းတတ်တော့ပြီ။

တကယ်တော့ ကျမ မောင့်ဘ၀ထဲမှာ မပျော်တော့တာ`အချစ်´ ကြောင့်လည်း ပါပါတယ် မောင်ရယ်။ မောင့်ဆီမှာ ကျမအပေါ် အရိပ်ကြည့်အချစ်မှ မရှိတော့ဘဲ။ ဒါဖြင့် ကျမတို့ ဘာအတွက် ဆက် အသက်ရှင် နေကြတာလဲဟင်။ ကျမက မောင့်အတွက်...... ဒါမှမဟုတ် မောင်က ကျမအတွက်..... ဘယ်သူက ဘယ်သူ့ အတွက်မှ မဖြစ်တော့ဘူးဆိုရင် အဲဒီနှစ်ယောက်ဟာ.....။

အဲဒီညမှာပဲ ကျမတို့နှစ်ယောက်ရဲ့ ခြောက်အိပ်မက် စသည်။

..............

အဲသည်ညနေမှာတော့ မောင်က နေ့လယ်ခင်းက အရှိန်ကြောင့်ဖြစ်လိမ့်မည်။ အိမ်ပြန်စောခဲ့၏။ ပြီးတော့ ကျမနံဘေးကိုလာကာ စကားမရှိ စကားရှာ ပြောနေခဲ့သည်။

`မောင် အလုပ်နည်းနည်းပါးတဲ့အခါ မောင်တို့ဟန်းနီးမွန်းတုန်းကလို စက်စဲဘက်မှာ ရက်ကြာကြာ သွားနားရအောင်နော်..... မေ´

ဒါဟာ တို့နှစ်ယောက်ရဲ့ ရောဂါအတွက် ထိရောက်တဲ့ကုသနည်းလို့ မောင်က ထင်နေသလား။

မောင်က ကျမပခုံးစွန်းမှာ မေးတင်လိုက်၏။ ကျမ ရင်တောင် ခုန်ချင်လာသလို။ ဒါပေမဲ့ အရင်ကလို ပျော်ရမှာတဲ့လား။ ကျမစိတ်တို့ ပုံမှန် ငြိမ်သက်သွားပြန် သည်။

`ကိုယ်တို့ ဆွေးနွေးရမှာ အဲလောက် ပေါ့ပါးတဲ့ ကိစ္စတော့ မဟုတ်ဘူး မောင်´

ကျမပခုံးဆီမှာ မောင့်မေးဖျားကွာသွားသည်။ မောင်က ကြမ်းပြင်ဆီ ငေးစိုက်ရင်း အတန်ကြာ ငြိမ်သက် နေသေးသည်။

`မဟာရံတံတိုင်းထဲက `အယ်လီနာ´ကို မောင်သိပ်သဘောကျခဲ့တာ... မေ့ကိုလည်း `အယ်လီနာ့´လို မျှော်လင့်ခဲ့တယ်´

ဒါဟာ ဟိုးရည်းစားဘ၀ကတည်းက မောင် မကြာခဏ ပြောနေကျစကား။

`ဟုတ်တာပေါ့မောင်.... ဒါပေမဲ့ သူတို့ဆီက လယ်သမား၊ ယာသမားတွေရဲ့ ဘ၀ဟာ မြို့ပြလူတွေနဲ့ အဆင့်အတန်းမကွာဘူး။ မျက်ခြေမပြတ်ဘူးလေ´

`ဒါပဲပေါ့မေ.... မောင်တို့ရည်းစားဘ၀မှာ မောင် အကြောက်အကန် ပြောခဲ့တဲ့ တို့နှစ်ယောက်ကြားထဲက ကွာဟမှုဆိုတာ´

မောင်နှင့်ကျမတို့၏ စကားဝိုင်းက ရုတ်ချည်းပဲ ပုံစံပြောင်းကာ တင်းမာလာသည်။

`အဲဒီကွာဟမှုကို ဆက်စပ်ပေးဖို့ ဘယ်သူက ကြိုးစားခဲ့သလဲ၊ ပြီးတော့ ဘယ်သူက ပိုမှန်သလဲ မောင်´

နှစ်ယောက်ကြားမှာ အကြာကြီး တိတ်ဆိတ်သွားပြန်သည်။

`မေက ပိုမှန်တယ်ဆိုရင် မောင့်ရဲ့အမှားအတွက် မောင်တောင်းပန်ပါတယ်´ မောင့်အသံက ခြောက်ချားစရာ ကောင်းလှသည်။ ပြီးတော့ အဖြေတခုကလည်း တွဲပါနေသလိုပင်။

`ဒါဖြင့် တောင်းပန်တာထက်ပိုလို့ မောင့်ဘက်က....´

ကျမ စကားမဆက်နိုင်တော့လောက်အောင် ဆို့နစ်ဆဲ.... မောင်က ကျမ ဦးခေါင်းကို သူ့ရင်မှာ အပ်စေလျက် ဖက်ပွေ့လိုက်သည်။ ပြီးမှ...

`မေ့အတွက်က မြို့ပြက တကယ်လိုအပ်ပါတယ်။ မောင့်အတွက်ကျတော့ မြို့ပြကို မလိုအပ်သလို မောင့်ကိုလည်း အဲသည်မြို့ပြက မလိုအပ်ပါဘူး။ ဒါပေမဲ့ မေ၊ မောင့်လယ်မြေ အတွက်ကျတော့ မောင်မရှိလို့ မဖြစ်ဘူး။ ဟုတ်တယ်၊ ဒါဟာ မောင့်မြေပဲ၊ မောင်ပိုင်တယ်လို့ ခံစားရတဲ့မြေပဲ။ မောင့်ကို အားမာန်တွေ၊ ယုံကြည်မှုတွေ ပေးတဲ့မြေပဲ။ မြို့ပြက မပေးနိုင်တဲ့ လူ့တန်ဖိုးကို မောင် ဒီမြေမှာ ခံစားရတယ်။ လာမယ့် အနာဂတ်တချိန်မှာ မေမျှော်လင့်တဲ့ တိုးတက်တဲ့ဖွံ့ဖြိုးမှုမျိုး ရအောင် မောင် ဒီမြေပေါ်မှာပဲ ကြိုးစားမယ်။ ဒါပေမဲ့ မေလည်း မောင့်လိုပဲ ယုံကြည်ရမယ်လို့ မချုပ်နှောင်ပါဘူး။ မောင်ပြောပြခဲ့ဖူးသလိုပါပဲ။ မောင့်ဆီမှာ မပျော်တော့တဲ့အခါ မောင့်ကို အချိန်မရွေး ထားသွားခဲ့ပါလို့။ ဒါပေမဲ့ မောင်ပြောတာ တွေကိုတော့ စဉ်းစားပါ မေရယ်။ လူတယောက်ဟာ သူ့ဘ၀ကို သူယုံကြည် ရဲတဲ့နေရာမှာသာ နေချင်တယ်ဆိုတာ..... အထူးသဖြင့် ယောက်ျားတယောက် အနေနဲ့ပေါ့။ ဒီမြေကို မောင်မွေးကတည်းက သိလာရတာ၊ ဒီမြေဟာ မောင့်အပေါ် မပြောင်းလဲခဲ့ဘူး၊ မောင့်ဘ၀မှာ မောင်စိတ်ထက်တောင် ဒီမြေအကြောင်းကို ပိုသိခဲ့ရတာ.... ကျွမ်းဝင်ခဲ့ရတာ.... ပိုင်နိုင်ခဲ့ရတာ.... ဒါဟာ ယောက်ျားတယောက်ရဲ့ ရတောင့်ရခဲ ကိုယ်ပိုင်နယ်မြေ ပါ။ ဒါကို မောင်ဖက်တွယ်တဲ့ အတွက် မောင့်ကို မေကြိုက်သလို အပြစ်ပေးပါ´

မောင့်စကားသံက တိမ်ဝင်ပျောက်ကွယ်သွားသည်။ မောင့်ရင်ခွင်က မျက်နှာကို ခွာယူပြီး မောင့်ကို ကျမမော့ကြည့်တော့ မောင့်ပါးမှာ မျက်ရည်တွေ။ သို့ပေမဲ့ ကျမ မတုန်လှုပ်ချင်တော့။ မောင်ပေးသောဘ၀က ကျမကို ခါးသက်အေးစက်တတ်စေခဲ့ပြီ။ ကျမ မျက်လုံးထဲမှာ လယ်မြေတွေကို တစွဲတလမ်း ငေးမောနေတတ် သည့် ကျမ မကြာခဏ မြင်တွေ့နေကျ မောင့်ပုံရိပ်တွေကိုပဲ မြင်ယောင်ကာ ရင်ထဲမှာ တစတစ အေးခဲလာသည် ထင်၏။

`တကယ်တော့ ကိုယ်နဲ့မင်းဟာ အင်မတန် လွဲချော်နေတာပါပဲ။ တကယ်လို့ မနက် လယ်ထဲ မဆင်းခင် ကိုယ့်ပါးကိုနမ်းလို့ နေ့လယ်ခင်း ကိုယ်နဲ့အတူ ထမင်းလက်ဆုံ ပြန်စားလို့.... ညနေ အိမ်ပြန်ချိန် ကိုယ့်သနပ်ခါးနံ့ကို နမ်းမွှေးလို့ နေခဲ့ရင်တောင် ကိုယ် ဒီလောက် ချောက်ချားခဲ့မှာ မဟုတ်ဘူးမောင်။ တကယ်တော့ `အချစ်´မှာကိုက မင်းနဲ့ကိုယ်က လွဲနေခဲ့တာ။ ခုတော့လည်း မောင်က ကိုယ်တိုင်ရဲ့ စိတ်ချမ်းသာမှုကိုပဲ ရွေးချယ်ခဲ့တာပဲ´

အံ့သြစရာကောင်းသည်က ထိုညမှာ ကျမ မျက်ရည်မကျခဲ့ခြင်းပင် ဖြစ်သည်။

ဒီအဖြစ်အပျက်မှာ အပြစ်ရှိသူက ကျမဆိုရင်၊ ကျမရဲ့အပြစ်က မောင် ပေးတဲ့ဘ၀ထဲမှာ တသက်လုံး ပျော်ဖို့ မကြိုးစာခဲ့တဲ့ ပြောင်းလဲသွားခဲ့တဲ့ အပြစ်ပဲ။ ....ဆိုရင်.... မောင်ကျတော့......။

ကျမကိုယ်တိုင်က မောင့်ဘ၀ထဲ ဆင်းနေပေးခဲ့ဖူးလျက်နဲ့ မောင်ကျတော့ ကျမဘ၀ထဲကို လိုက်ကြည့် ဖို့တောင် မစဉ်းစားခဲ့တာ။ ကျမထက်ပိုလို့ မောင့်မြေ ကို ခင်တွယ်သာယာတာတွေက အပြစ်ပဲ။

ဘယ်သူက ပိုမှားသလဲကွယ်... ဒါမှမဟုတ်... ဘယ်သူက ပိုမှန်သလဲ။

တခုပဲ ကျမ မယုံနိုင်တာ။ ကျမတို့နှစ်ယောက်ကြားက ရှောင်ပြေးဖျက်ဆီးလို့တောင် မရခဲ့တဲ့ အချစ်တွေ.....။ ခုချိန်မှာ ဘယ်ရောက်သွားကြသလဲ ဆိုတာကိုပေါ့။

မောင်က `မင်းကို အမေ့အိမ်အရောက် မောင်ပို့ပေးပါရစေ´တဲ့။

လိုသေးလို့လားကွယ်...။ အရာအားလုံးဟာ မှုန်ဝါး သေဆုံးခဲ့ပြီပဲ။ မောင့်ကိုတောင် ခွဲထား ချန်ရစ်ခဲ့ရမှတော့..... ကျမဘ၀မှာ.. အပြန်ခရီးကို မောင်လိုက်ပို့ခြင်း မပို့ခြင်းကလည်း အရေးမပါတော့ပါဘူးကွယ်....

နေခဲ့ပါ မောင်ရယ်.........။

.....................

ကမ်းဦးထိပ်မှာ သူက ခိုင်ခိုင်မာမာရပ်လို့ ကျန်ခဲ့ပြီ။ ခပ်ဝါးဝါးသာ မြင်နေရသော်လည်း တောက်ပ နေသော သူ့မျက်လုံးတွေထဲက နာကျင်ကြေကွဲမှုကိုတော့ ကျမ ခံစားရပါသည်။

မောင် ဘာတွေ တွေးနေမလဲဟင်။ `မေ့ကိုလွမ်းနေတော့မှာ´လို့များ ပြောလိုက်ပါလားကွယ်......

သင်္ဘောဥသြမှုတ်တော့ ကျမရင်ခုန်သံတွေက ပိုလို့ ပြင်းထန်လာသည်။ ခုနေ အရင်ကလို မောင် တချက်လောက် နူးနူးညံ့ညံ့ ပြုံးပြလိုက်ရင်တောင် ကျမ ဆုံးဖြတ်ချက်ကို လျှော့မိမယ်ထင်ပါရဲ့ မောင်၊ ဒါမှမဟုတ် လက်ကလေး တချက် ပြကွယ်။ ကျမ မောင့်ဆီ ပြန်ပြေးလာခဲ့မယ်လေ။

အတွေးတွေထဲ ပေါက်ကွာ ဘလောင်ဆူဆဲ..... သင်္ဘောက ဗောတံတားမှ ခွာသည်။ မောင်က လက်နှစ်ဖက်ကို တင်းတင်းပိုက်ဆဲ..... တရွေ့ရွေ့... ဝေး....။ ကျမ ပျော်ခဲ့ဖူးရာ ကိုင်းခင်းတွေ သောင်ပြင်တွေ ကလည်း မှုန်ဝါး.....။

အဲဒီနေရာလေးမှာ... မောင့်စက်ဘီးနောက် ကယ်ရီယာခုံပေါ်ကနေ မောင့် ကျောပြင်ကို ခိုးနမ်းခဲ့တာ၊ ကျမတို့နှစ်ယောက် ဘယ်လောက်ချစ်ခဲ့ဖူးသလဲ....။

အဲဒီနေရာလေးမှာ... ကျမက မောင့်ခါးကိုဖက်လို့.... မောင်က ကျမပခုံးကို ဖက်လို့ ညမှောင်မှောင် မီးမရှိတဲ့ရွာလမ်းမမှာ တယောက်ကိုတယောက် လုံခြုံစေခဲ့ဖူးတာ။

အဲဒီနေရာလေးမှာ..... မောင်နဲ့ ကျမ စက်မှုလက်မှုလယ်ယာခေတ်နဲ့ ခေတ်မီတဲ့လယ်သမားတို့ရဲ့ မြို့ကလေးဆိုတာကို အိပ်မက် မက်ခဲ့ဖူးကြတာ။

အဲဒီနေရာလေးမှာ.....
အဲဒီနေရာလေးမှာ.....

ကြည့်ပါဦး....။ တခါမှ ရန်မဖြစ်ခဲ့၊ စိတ်တောင် မကောက်ခဲ့ဖူးခဲ့ကြတဲ့ ချစ်သူနှစ်ယောက်က လမ်းခွဲကြရ သတဲ့။

ကျမ နှုတ်ခမ်းကိုက်မိစဉ်မှာ တင်းထားခဲ့သမျှ မျက်ရည်တို့က ပါးပေါ်လိမ့် ဆင်းလာကြ၏။

တဖြည်းဖြည်း ဝေးကျန်ခဲ့သော မောင့်ထံမှာ ကျမ၏အချစ်တို့လည်း ကုန်ဆုံး ကျန်ရစ်ခဲ့ပြီထင်၏။

သင်္ဘော အဝေးကြီး ရောက်သည်အထိ ....။

အစက်အပြောက်မျှသာ တွေ့ရတော့သော မောင့်ခန္ဓာကိုယ်က အဲဒီ ကမ်းဦးထိပ်မှာ စွဲစွဲမြဲမြဲ ရပ်ဆဲ...... အဲဒီမြေနဲ့ သူ ခွဲမရတော့သလို...........။

နေခဲ့တော့ အချစ်ရေ....

ရှင့်ရဲ့ မြေကြီးတွေနဲ့ အတူ.........။

+++++

(ပြီးပါပြီ)

မြေနဲ့အတူ(အပိုင်း-၃)

.................

မောင့်အမေကတော့ သူမ၏ လှပသော မျက်ခုံးတို့ကို အတွန့်ချိုး၍......

`သေချာစဉ်းစားပါ သမီးရယ်..... ဘ၀ပုံစံချင်း၊ ပတ်ဝန်းကျင်ချင်း ကွာလွန်းလို့ တချိန်မှာ စိတ်ညစ်ကြရမှာ စိုးတယ်...´ဟု ပြောသည်။ ကျမကတော့ အတွေးတွေထဲမှာ.....။ ဆိတ်ငြိမ်သော မောင့်ရွာကလေးမှာ ကျမ ၀တ္ထုတွေ အများကြီးရေးဖို့၊ မောင်အားလပ်တဲ့အခါ ရန်ကုန်မှာ တလှည့်သွားနေကြ မှာပေါ့။

ပတ်ဝန်းကျင်ကျယ်ကျယ်မှာမှ ကိုယ့်အတွက် စာရေးစရာတွေ များများရမှာ မောင်ရဲ့ ... လို့ မောင့်ကို ပြောပြရမှာပေါ့။ ကုန်ကြမ်းတွေကို ပွေ့ပိုက်ပြီး ရွာကလေးရဲ့ ရင်ခွင်ကို ပြန်လာ စာရေးမှာပေါ့။

မောင်က `မင်းမပျော်တော့တဲ့အခါ မောင့်ကို အချိန်မရွေးထားခဲ့ပါ´တဲ့။ မောင် ထိုသို့အပြောမှာ ကျမ မောင့်နဖူးဆံစပ်မှ နုလွသော ဆံစလေးတွေကို လှမ်းနမ်းရင်း `မောင့်ကို ကိုယ် ဘယ်လောက် ချစ်သလဲ´ဟုပင် မောင့်ကို ပြန်မေးလိုက်သေးသည်။ `မောင့်ဘ၀ကိုလည်း ပြန်ချစ်နိုင်ပါစေ´ဟု မောင် ပြန်ပြောသည်အထိ ကျမ မောင့်ထံမှာ ယုံကြည်ဆဲ.... ကိုယ့်ကိုယ်ကို ယုံကြည်ဆဲ။

`မောင့်ဘ၀ထဲမှာ ကိုယ်ပျော်ပါတယ်´ဟု ကျမ ပြန်ပြောတော့ မောင်က `စိတ်ကူးယဉ်ဆန်တယ်ဆိုတာ တသက်လုံး စိတ်ကူးယဉ်ဆန်နိုင်ရင်တော့ အကောင်းဆုံးပဲကွယ်´တဲ့။ ကျမကတော့ ကျမကို စိတ်ကူးယဉ် ဆန်တယ် ပြောသော မောင့်ကို စိတ်တိုကာ `အချစ်ဆိုတာကိုက Romanticism ပဲ မောင်ရဲ့၊ စိတ်ကူးယဉ် မှာပေါ့၊ စိတ်ကူးယဉ် မဆန်ချင်ရင်တော့ နဂိုထဲက အချစ်ဆိုတာနဲ့ မပတ်သက်အောင် နေကြဖို့ပဲ´ဟု ရန်တွေ့သံဖြင့် ပြောမိခဲ့သေးသည်။

သိုပေမဲ့ တကယ်တန်းမှာတော့ ကျမရင်ဆိုင်ရသည့် လက်တွေ့ဘ၀က ကျမ ကိုးကွယ်ယုံကြည်ရာ Romanticism နှင့် အလှမ်းကွာနေခဲ့လေသည်။

.................

ကျမနှင့် မောင်၏ဝေးကွာရမှုကို မောင်ကတော့ ဟိုးအရင်ကတည်းက သူ ယူဆခဲ့သည့် အလွှာမတူမှု၊ လူနေမှုစရိုက်ကွာဟမှုတို့ကြောင့်ဟု ဆုံးဖြတ်သည်။ ကျမကတော့ မောင်ပေးသော အချစ်နှင့် ကျမရလိုသော အချစ် ဒါမှမဟုတ် ကျမ ပေးသော အချစ်နှင့် မောင်ရလာသော အချစ်တို့ ပုံသဏ္ဍာန်ချင်း ကွဲပြားမှုကြောင့်သာ မောင်နှင့် ကျမတို့ ကွဲကွာရသည်ဟု ယူဆသည်။ ဘယ်သူက မှန် သလဲ။ နှစ်ယောက်စလုံးလည်း မှန်နိုင်ပါသည်။ ထိုသို့ဆိုလျှင်တော့ ကျမကတော့ ကျမ ပိုမှန်သည်ဟုသာ ယုံကြည်သည်။ ဘာလို့ဆို ချစ်သူနှစ်ဦး၏ ဘ၀မှာ အချစ်ကသာ အခြေခံအကျဆုံးမဟုတ်လားလေ။

..................

မြို့တော်ကြီးမှာ ကားတ၀ီဝီနှင့် လူဆူညံ ဈေးစည်ကားတွေထဲ သွားလာကျင်လည်နေကျ ကျမက မောင်တို့ရွာကလေးထံမှာ စိတ်ညစ်မှာပဲဟု မောင်က ထင်ခဲ့သည်။ ကျမကတော့ အဲသည် မြို့ကြီးရှိရာဆီကို မကြာခဏ သွားနိုင်တာပဲ။ မလွမ်းလောက်ပါဘူးဟုပင် မောင့်ကို နှစ်သိမ့်ခဲ့သေးသည်။ `မောင်ရယ်... ကိုယ် က အနုပညာသမားပဲ၊ စိတ်အေးလက်အေးနဲ့ သဘာဝနဲ့ နီးနီးနေရတာကို သဘောကျမှာပါ´ဟုလည်း ပြောခဲ့သည်။ တကယ်တမ်း အဲဒီ့ သဘာဝလေးထဲမှာ ကျမ ပျော်နိုင်ခဲ့သားပင်။ တကယ်ဆို ကျမ မပျော်နိုင်ခဲ့တာက မောင်ထင်သလို ကျေးလက်ဘ၀မှာမဟုတ်ဘဲ မောင်နှင့် ကျမ၏ လက်တွေ့ဘ၀ အနာဂတ်ထဲမှာ ဆိုတာကိုလည်း နားလည်စေချင်ပါသည်။

မနက်မိုးလင်းလျှင် ကျမက မောင်စားဖို့ နံနက်စာကို ဂရုတစိုက် ပြင်ဆင်ပေးမည်။ မုန့်တီဖြစ်ဖြစ်၊ ထမင်းကြော် ဖြစ်ဖြစ်၊ ပဲပြုတ်နံပြား ဖြစ်ဖြစ်၊ ပေါင်မုန့်ကြော် ဖြစ်ဖြစ်၊ မောင်ကြိုက်သော အစားအစာများသာ ဖြစ်စေရမည်ပေါ့။ ကျမ၏ ဂရုစိုက်သော ချစ်ခြင်းကို မောင် အသိအမှတ်ပြုရမည်။ အဲသည် မင်္ဂလာနံနက်က ကျမနှင့်မောင့်ကို ဖမ်းစားရမည်။ ပြီးလျှင်တော့ မောင်က လယ်ထဲသွားပေါ့။ ကျမက နေ့လယ်စာအတွက် ချက်ပြုတ်ရင်း ကျန်ခဲ့။ နေ့လယ်ကိုတော့ မောင်က ထမင်းပြန်လာစားပေါ့။ တခါတရံ ကျမက လယ်ထဲ လိုက်ခဲ့မှာပေါ့။ အားလပ်တဲ့ နေ့လယ်ချိန်တွေမှာ အ၀တ်လျှော်.... တရေးအိပ်... စာရေးဖြင့် ကျမ၏ ကိုယ်ပိုင် အချိန်ကိုလည်း ရနိုင်မည်။ ညနေ မောင်ပြန်လာလျှင် ထမင်းစားပြီး ရွာရိုးတလျှောက် ဒါမှမဟုတ် မြစ်ကမ်းပါးဆီ လမ်းလျှောက်ကြမည်။ ထိုနေ့ တနေ့တာက ကျမတွေးကြည့်မိခဲ့ဖူးသော မောင်နှင့် ကျမ၏ အိမ်ထောင်ဘ၀ ဖြစ်သည်။

တကယ့်လက်တွေ့မှာကျတော့ဖြင့် မောင်က မိုးပင်မလင်းခင် လယ်ထဲ ဆင်းချင်နေပြီ။ နံနက်စာ ဆိုတာကိုလည်း မောင်က မမက်။ အလုပ်လုပ်ရင်း သိပ် ဆာလာမှ ငပိထောင်းနှင့် တို့စရာနှင့် ရေနွေးကြမ်းနှင့် ဖြစ်သလို စားရတာ ပိုမြိန် သတဲ့။ ထိုသို့ မောင့်အပြောမှာ ကျမ၏ လင်သားအပေါ် ဂရုတစိုက် ကျွေးမွေးချင် သမျှ ဆန္ဒတွေပင် ပေါ့ပျက်ပျက်ဖြစ်ရသည်ဟု ကျမ စွပ်စွဲချင်လှသည်။ နေ့လယ်နေ့ခင်း မှန်မှန် ထမင်းစား မပြန်တာလည်း ကျမ၏နှလုံးကို ထိခိုက်လှသည်။

`လယ်အလုပ်ဆိ်ုတာ အချိန်သတ်မှတ်လို့မှ မရဘဲ မေရယ်၊ လယ်ထဲ ရောက်တာနဲ့ လည်ခံနေတာ ပျင်းချိန်တောင် မရဘူး´

ဟိုးကတည်းက မောင် ပြောပြခဲ့ဖူးတာ ခုသတိရတော့ နောင်တပင် ရချင်သည်။

လယ်ထဲကို ကျမလိုက်သွားလျှင်လည်း မောင်တို့လယ်တဲကလေးမှာ ငုတ်တုတ်ထိုင်ရင်း ပျင်းနေရုံမှအပ ဘာမှ မထူးခြားပေ။ မောင်က လယ်အလုပ်ကို ကျမနှင့် ဘယ်လိုမှ မပတ်သက်စေရပါ။ တခါတခါတော့ လယ်တဲကလေးမှာ ပျင်း ပျင်းနှင့် လဲလျောင်းရင်း ကျမပျင်းနေသည်ကို သိသားပင်။ ထိုအခါ ပုဇွန်လုံးတွေ နှိုက်လာပြီး သူကိုယ်တိုင် မီးမွှေးကာ ကင်ကျွေးခြင်းဖြင့် ဟိုတုန်းက ချစ်သူဘ၀ကို ပြန်လည်တသစေပြန်သည်။ တခါတလေကျတော့ မောင့်လက်ထဲမှာ မသေမရှင်ဖြင့် တွန့်လိမ်လျက်ပါလာသော လင်းမြွေတွေ တွေ့သည်။ မြွေကို ဂုတ်ဆက်နေရာမှ သန်မာစွာဖျစ်ရင်း မောင်လမ်းလျှောက်လာလျှင်တော့ ကျမက အဲဒီ သဘာဝ အရိုင်းဆန်သော လူတယောက်ကို ချစ်ရတာ ရင်ခုန်စရာပဲဟုတော့ ခံစားရသေးသည်။

`မေပျင်းရင် ဒီမြွေကို ဟင်းချက်ပေးလေကွာ... နော်´ဟု ပြောရင်း မောင် ကျွမ်းကျင်စွာ မြွေကို ဖျက်ပေးလျှင်တော့လည်း ကျမမှာ အသည်းတယားယားကြားကပင် မောင့်ကို တအံ့တသြ သဘောကျ ရသားပင်။ အဲဒီ လူငယ်လေးဟာ ခုလို အကြမ်းပတမ်းနိုင်လိမ့်မည်ဟု အရင်က ကျမ နည်းနည်းမှ မထင်ခဲ့ပေ။ မောင်က ကျမကို အမြဲ အံ့သြဆန်းကျယ်မှုကို ပေးလေသည်။ ကျမကလည်း အံ့သြဆန်းကျယ်မှုတွေထဲ ရင်ခုန် ချင်သူပေ။

သို့သော် ထိုရင်ခုန်မှုတွေထဲမှာ ကျမ ကြာကြာ နစ်မျောမနေနိုင်တော့လောက်အောင် မောင်က ကျမထက် ပို၍ သူ၏လယ်မြေတွေနှင့် အကျွမ်းတ၀င် နေလွန်းလာသည်အခါမှာတော့ ကျမနှင့် မောင်၏ တိုက်ပွဲတွေက စလာခဲ့တော့သည်။ ကျမက လယ်မြေအတွက် အဲလောက် အချိန်များများ မောင့်ကို ပေးထားရလိမ့်မည်ဟု နည်းနည်းမှ ထင်မထားဖူးခဲ့ချေ။ ခုတော့.......

တဖြည်းဖြည်းနှင့် မောင့်အသားအရည်တို့က ညိုမောင်းကာ မောင့်မျက်နှာရိပ်တွေက အေးစက်လာပြီး မောင့်မျက်နှာမှာ အရေးအကြောင်းတွေ များပြားလာသည်ဟု ထင် ထင်လာဆဲ တကယ်လည်း မောင်က လယ်မြေကြောင့် ပင်ပန်းနွမ်းနယ်နေခဲ့ပြီ။

မောင်က နေရာတကာ ကိုယ်တိုင်လုပ်ရမှ စိတ်တိုင်းကျလေသည်။ အဖေ့ကိုပင် စိတ်မချဘဲ အစစအရာရာ ကိုယ်တိုင်ပါ၏။ ကျမမှာတော့ မျိုးကျဲ (ပျိုးကျဲ)၊ ကောက်စိုက်ချိန်ကျော်လွန်လို့ ကောက်ပင်တွေ ခေါင်းထောင်လျှင်ဖြင့် မောင် နားလေမလား၊ အပင်တွေ ဒူးဆစ်လောက်ရောက်လျှင်များ မောင် နားလေမလား နှင့် တစောင့်စောင့်။

မောင်ကတော့ဖြင့် နေ့နေ့ ညည လယ်အတွက်သာ စိတ်ဝင်စားနေခဲ့လေသည်။ လယ်မြေ `တာ´ တွက်တာက အစ၊ စပါးပင်တွေ ပြင်တာ တမန်းနှိုးတာအဆုံး သူပါသည်။ ညညတိုင် မောင် အိပ်ပျော် နေသည့်အခါ မောင့် ပါးရိုးတွေကျနေတာ မျက်တွင်းတွေ ချောင်နေတာ မောင် ကိုယ်ရည်တွေ စစ်စစ် သွားတာတွေကို ကြည့်ကာ ကျမ ၀မ်းနည်းဆဲ၊ မောင်ကတော့ဖြင့် မောပန်းနွမ်းနယ်စွာ နှစ်နှစ်ခြိုက်ခြိုက် အိပ်ပျော်လို့။ အနားမှာ ကျမ ရှိနေတာကိုလည်း မောင် မသိတော့ပြီ။ ခုဆို ညညဦးတွေ မောင့်အိမ်ပြန်ချိန်ကို မျှော်ရင်း ကျမကြေကွဲ နေရတာကို မောင်မသိတာ ဘယ်လောက်ကြာခဲ့ပြီလဲ။ အလုပ်ပင်ပန်းလွန်းလို့ မောင် ထန်းရည်နံ့တသင်းသင်းနဲ့ အိမ်ပြန်လာတဲ့မောင့်ကို အပြစ်မတင်ရက်ဘဲ ကျိတ်ငိုရတာလည်း မောင် မသိတော့ ပြီ။ အလုပ်ထဲ စိတ်ပါဝင်စားလျက် ဇနီးမယားအပေါ် သွေးဆိုးတာမျိုးလည်း မရှိသော ယောက်ျားအပေါ် ကျမက ဘယ်လို အပြစ်မျိုး တင်ရမလဲ။

`နားပါဦးလားမောင်ရယ်၊ နေပူမိုးရွာထဲ ခုလောက် အသက်ငယ်ငယ်ထဲက အဲလောက် ပေခံရင် ကြီးလာတော့ ထိမှာ..... တော်ရုံ မလိုအပ်တာဆို အပင်ပန်း မခံပါနဲ့ကွယ်..... အလုပ်သမားတွေ ခိုင်းပေါ့´

မောင်က ကျမဆံပင်ကို ဖွဖွပွတ်သပ်ကာ....

`မောင်က ကျန်းမာရေး ကောင်းပါတယ်။ သိပ်လည်းမပင်ပန်းပါဘူး မေရဲ့`

ဟုတော့ နူးနူးညံ့ညံ့ ပြန်ပြောသားပင်။ သို့ပေမဲ့ ကျမရင်ထဲမှာတော့ မောင့်ကို ကျမ သိပ်မပိုင်ရတာကိုပဲ ခံစားလာရသည်။ မောင်ကတော့ တဖြည်းဖြည်းနှင့် အပြုံးအရယ်နည်းလာသည်နှင့်အမျှ စကားပါ နည်းလာ ခဲ့သည်။ တချိန်တည်းမှာ ကျမကတော့ မောင်နှင့်ဆန့်ကျင်စွာ စကားများလာခဲ့သည်။

`မောင်တို့ လယ်အလုပ်က ပင်ပန်းရသလောက် အကျိုးအမြတ်ကျတော့ သိပ်မခံစားရ သလိုပဲ´

ဟု ကျမပြောသောနေ့မှာ မောင်က ကျမစကားကို ပြင်းပြင်းထန်ထန် ငြင်းဆန်ခဲ့လေသည်။

`အလုပ်တခုဟာ ဒီလောက်ပဲ အကျိုးအမြတ်ရတော့မှာပေါ့ မေရဲ့... ကိုယ်တို့ဆီမှာ ခု တဖြည်းဖြည်းနဲ့ လယ်ဧကတွေ တိုးလာတာ၊ စက်တွေ တိုးလာတာ။ စက်တွေ တိုးလာတာ၊ အလုပ်အကိုင်တွေ တိုးတက်လာတွေဟာ အကျိုးအမြတ်ပေါ့´

`ဒါပေမဲ့ ရုပ်ပိုင်းအရ ဆုတ်ယုတ်တာကျတော့ရော´

`ဒါကလည်း မေ ထင်လို့ပါကွာ.... မောင်တို့ ဘိုးစဉ်ဘောင်ဆက် လယ်လုပ်လာတာ ထူးပြီး အသက်တိုသွားတာ မရှိပါဘူးကွာ´

`ဒါဖြင့် မောင်တို့က ထမင်းစားဖို့၊ လယ်ဧကတွေ တိုးဖို့အတွက် သက်သက်ပဲ လယ်လုပ်နေ ကြတာပေါ့..... ဟုတ်လားမောင်´

မောင်က ကျမစကားကို နားမလည်သလို ကြည့်သည်။

`ကိုယ်ကတော့ အလုပ်တခုကို လုပ်ခြင်းကြောင့် ပိုက်ဆံရသလို... လူနေမှုစနစ်တွေ၊ စီးပွားရေးစနစ် တွေ မြင်ဖို့၊ အမြင်တွေကျယ်ဖို့အထိ လိုတယ် ထင်တာပဲ´

ထိုညနေမှာ ကံကောင်းထောက်မစွာ မောင် စောစောပြန်လာခဲ့သည်မို့ ကျမ မောင့်ကို စကားတွေ ပြောခွင့်ရတာ။ မောင်က ဆေးလိပ်တိုကို ဖိ၍ ရှိုက်ဖွာရင်း ကျမစကားကို မတုံ့ပြန်ပဲ နေ၏။ ကျမကတော့ ကျမ တမက်တမော နမ်းရှိုက်ခဲ့ဖူးသည့် မောင့်လက်ဖမိုးတွေကိုပဲ လွမ်းလွမ်းဆွတ်ဆွတ် ကြည့်ကာ ငိုချင်လာမိသည်။ တချိန်ကတော့ မောင်နှင့်ကျမ တကယ့်ကို ကြည်နူးစွာ ပျော်ခဲ့ကြရဖူးပါသည်။

`မောင်က ကိုယ့်လယ်ကိုလုပ်ပြီး ရိုးရိုးပဲ လယ်ပိုင်ရှင် သူဌေးဖြစ်... ကလေးတွေမွေး... အဲဒီ ကလေးတွေကလည်း မောင့်လိုပဲ ရိုးရိုးဘွဲ့တခုရ။ ပြီးရင် လယ်ထဲဆင်း၊ အဲဒီလိုပဲ မီးမရှိ၊ တယ်လီဖုန်းမရှိ ရွာကလေးမှာ ကြီးပြင်းကြ၊ သေကြ၊ ဒါပဲလားမောင်..... ဘ၀တွေဟာ ဒါလောက်နဲ့ ပြီးရောလား....´

မောင်က မျက်မှောင်ကျုံ့၏။

`ဒါဖြင့် လယ်သမားဘ၀ဟာ ဘာမှ မဟုတ်ဘူးပေါ့ ဟုတ်လားမေ.... ပြီးတော့ ပညာတတ် လယ်သမားတယောက်ရဲ့ ဂုဏ်သိက္ခာဆိုတာကိုရော ဘယ်သူကမှ အသိအမှတ်မပြုဘူးတဲ့လား.... ဟုတ်လား´

မောင့်အသံက မကျေနပ်သံ အပြည့်ပါနေ၏။

`ကိုယ်ဆိုလိုတာက ပညာတတ်ဟာ လုပ်အားစိုက်ထုတ်စရာမလိုဘဲ ဦးနှောက်ပဲ သုံးရမယ်၊ ပညာတတ်တယောက်အတွက် ဘ၀မှာ လုပ်စရာတွေ အများကြီး ရှိသေးတယ်။ ဒါကိုပြောတာ´

`မောင့်အဖေရော အမေရော ဘွဲ့ရ ပညာတတ်၊ မောင့်ကိုလည်း ပညာ တတ်ဖြစ်အောင် လုပ်ပေးတယ်။ မောင်တို့ဟာ ပညာအရရော ကိုယ်ကျင့်တရားအရရော မြင့်မားတယ်။ တော်ပြီပေါ့ မေ... ကျန်တာ မလိုဘူး။ ဘ၀ဆိုတာကရော ဘယ်လောက်များ လိုအပ်လို့လဲ....´

`လိုတယ် မောင်.. `ဘ၀´ရယ်လို့ဖြစ်လာမှတော့ အပျော် လိုတယ်၊ အချစ် လိုတယ်၊ မျှော်လင့်ချက် လိုတယ်၊ အောင်မြင်မှု လိုတယ်´

`ခုလည်း မောင်ပျော်နေတာပဲ၊ ကိုယ့်ဘ၀ထဲမှာ အောင်မြင်နေတာပဲ၊ ပြီးတော့ မောင့်ဘ၀မှာ မျှော်လင့်စရာမှ မရှိဘဲမေ´

`ဒါပဲလား မောင်။ ကိုယ်တို့နှစ်ယောက်ရဲ့ ဘ၀ဆိုတာ..။ မောင်ပေးတဲ့ အဲဒီ ဘ၀မှာ ကျမ ပျော်တယ် မပျော်ဘူးဆိုတာကရော အရေးမပါတော့ဘူးတဲ့လား....´

မောင့်မျက်လုံးတွေက တဖျတ်ဖျတ် တောက်လာသည်။

`မောင့်ဘ၀ထဲမှာ မင်းမပျော်နိုင်ဘူးလို့ မောင်ပြောခဲ့သားပဲ မေ´

မောင့်အသံကတော့ဖြင့် မောင့်မျက်လုံးတွေနှင့်ဆန့်ကျင်စွာ ပျော့ပြောင်း တိုးညှင်းနေခဲ့သည်။ သို့ပေမဲ့ ထို လေသံအေးအေးက ကျမကိုတော့ ခါးသက်စေလေသည်။

'ကိုယ်မျှော်လင့်ခဲ့တာ မိန်းမကို အိမ်မှာ ချောင်ထိုးထားပြီး အပြင်မှာ အချိန်ကုန်တဲ့၊ ကိုယ့်ဘာသာ ပျော်သလိုနေတဲ့ သာမန်လယ်သမားတယောက်ရဲ့ ဇနီးမယားဘ၀ မဟုတ်ဘူးမောင်။ ပြီးတော့ ပညာတတ်ယောက်ျားတယောက်ရဲ့ မိန်းမဘ၀ဟာ အဲသလောက်ထိ ကျဉ်းမြောင်း လိမ့်မယ်လို့လည်း ထင်မထားခဲ့ဘူး´

မောင်က နံရံကို ခေါင်းမှီကာ မျက်လုံးတို့ကို စုံမှိတ်လျက် ငြိမ်တွေသွား၏။ ဟိုယခင်ကတော့ မောင် အဲသလို ငြိမ်သွားပြီဆိုလျှင် မောင့်မေးဖျားကို ကျမ လှမ်းပြီး နမ်းမွှေးနေကျ။ ခုတော့ဖြင့် စိမ်းခဲ့ပြီ။ ခဏကြာမှ မောင်က ကျမကို မျက်လုံး ဖွင့်ကြည့်လာ၏။ မောင့်မျက်လုံးတို့က နီကျင်လို့။ ကျမရင်ထဲ လှိုက်ခနဲ ၀မ်းနည်း သွားမိသည်။ ကျမနဲ့ပတ်သက်လို့ မောင် ထိခိုက်ခံစားသေးတယ် ဆိုပါတော့။ ဟိုး အရင်ချစ်သူဘ၀မှာတုန်းတော့ ကျမနှင့် မောင်က`တို့နှစ်ယောက်က ခွဲကြရမှာပါ´ဟုပြောဖြစ်တိုင်း မောင့်ထံမှာ အဲဒီ မျက်လုံးနီနီတွေကို တွေ့နေရကျ။ အဲလို မောင်ခံစားတိုင်း ကျမကပါ လှိုက်လှဲဝမ်းနည်းကာ လမ်းခွဲစကားတွေကို ရုတ်သိမ်းလို့ ရှေ့ဆက် လျှောက်ဖြစ်ခဲ့ကြတာ။

မောင်က ကျမကို ငေးကြည့်နေသော်လည်း မောင်မျက်လုံးတို့က မြင်ဟန်မတူ။ ခဏကြာမှ...`ဒါဖြင့် မောင် ဘာလုပ်ရမလဲ´ဟု မောင်က ညည်းတွားသလို ရေရွတ်သည်။ ကျမကို မေးသလိုလို.... ပြီးတော့ သူ့ကိုယ်သူပဲ မေးနေသလိုလို။

ဟုတ်တာပေါ့မောင်... အဲဒီမေးခွန်းရဲ့ အဖြေကို ကျမကိုယ်တိုင်လည်း သိချင်နေတာပဲလေ။

`ကိုယ်ကတော့ မောင်နဲ့ကိုယ်နဲ့က မွေးလာမယ့် သားသမီးတွေကို လူနေမှုအဆင့် မြင့်မြင့်နဲ့ ကျောင်းကောင်းကောင်းမှာ ထားချင်တယ်။ ဟိုး နိုင်ငံတကာအထိ အမြင်ကျယ်စေ ချင်တယ်။ ပြီးတော့ အဲဒါဟာ ဂုဏ်ပကာသနအတွက် မဟုတ်ဘူးမောင်၊ တယေက်ချင်းမြင့်မားမှ လူမျိုး မြင့်မှာ၊ တိုင်းပြည် မြင့်မှာ။ မောင် ကြည့်စမ်း.... မောင်တို့ရွာမှာ လူတွေချမ်းသာကြပြီး အိမ်မှာ တီဗွီကြီးတွေ၊ ဗွီဒီယိုတွေသာ ရှိတာ၊ အိမ်သာကျတော့ ကောင်းကောင်း ဆောက်သင့် တယ်လို့ ဘယ်နှစ်ယောက် သိလို့လဲ၊ သိတဲ့မောင်တို့ကကော ဘယ်လောက် စည်းရုံးနိုင်လဲ၊ တကယ်လို့ မောင်တို့ရွာမှာ လူအများကြီးသာ တိုးတက်တဲ့အမြင်ရှိရင် ခုလောက် ချမ်းသာ ပုံမျိုးနဲ့ဆို မြို့တမြို့အဆင့် ရောက်လောက်ပြီ။ အနည်းဆုံး ဆက်သွယ်ရေးကောင်းတဲ့ မြို့ အဆင့်ပေါ့မောင်၊ အနောက်နိုင်ငံတွေမှာလည်း လယ်သမားရှိပါတယ် မောင်ရဲ့။ ဒါပေမဲ့ လူနေမှုအဆင့်ကျတော့ ကွာတယ်။ အဲဒါဟာ ဉာဏ်ပညာနဲ့ အမြင်ပဲ အဓိကပေါ့ မောင်ရဲ့။ ဒါတွေ မောင်လည်း သိသားပဲကွယ်´

ဘာပဲဖြစ်ဖြစ် ကျမက မောင့်ကို စိတ်မညစ်စေချင်ပါ။ ဒါကြောင့်ပဲ လေသံ အေးအေးနှင့်သာ ပြောပြနေမိသည်။ မောင်ကတော့ မျက်နှာကျက်ဆီကိုသာ ရည်ရွယ်ရာမဲ့ ငေးနေဆဲ။

`မောင့်ရဲ့ လယ်တွေ ယာတွေကို ပစ်သွားဖို့ဆိုတာကတော့ ဘယ်လိုမှ မဖြစ်နိုင်တဲ့ကိစ္စ ဆိုတာ မင်းလည်း သိပြီးသားပဲ၊ မောင့်ဘ၀မှာက ရွေးချယ်စရာကို မရှိဘူး။ မောင်လုပ်ရမှာက ဒါပဲ။ မောင် ဒါကိုပဲ ကျွမ်းကျင်တယ်။ ဒီအလုပ်ကပဲ မောင့်ကို စိတ်ချမ်းသာ စေတယ်။ ဒါဟာ ကုသိုလ်ရ ၀မ်းဝအလုပ်လည်း ဖြစ်တယ်။ မြိုပြဟာ မောင့်အတွက် မလိုအပ်ဘူး။ ဒါတွေကို မင်းကိုယ်တိုင် လည်း သိခဲ့လျက်နဲ့။ ခုကျမှ စိတ်ဆင်းရဲတယ်ဆိုတော့ မောင် စိတ်မကောင်းဘူး။ ဒါပေမဲ့ မောင် ဖြေရှင်းမပေးတတ်ဘူး။ အဲဒီအတွက်လည်း မောင့်ကို ခွင့်လွှတ်ပါ။ မင်းမျှော်လင့်သလို မောင်လည်း မျှော်လင့်ခဲ့တာပါ.....။ မောင့်ကို မင်းချစ်တဲ့အတွက် မောင့်ဘ၀ကိုလည်း ချစ်နိုင်မလားလို့´

မောင့်အသံတို့က ကြေကြေမွမွ။ ကျမကတော့ ရင်ထဲမှာပါ ကြေမွလိုက်လာသည်။

`ကိုယ်ပြောချင်တာက တော်ရုံမျက်နှာလွှဲလို့ရတာကို အလုပ်သမားတွေနဲ့ မျက်နှာလွှဲပြီး မောင့်ဘ၀ကို ဒါထက်ပို မွေးမြူဖို့ပါကွယ်။ ခုတော့ မောင်က လယ်ရာသီ.. ပြီးပြန်တော့ `ကိုင်း´။ ကိုင်းအလုပ်ပြီးတော့ `လယ်´နဲ့ ကိုယ် အမေ့အိမ်ပြန် မရောက်တာ ဘယ်လောက်ကြာပြီလဲကော မောင် သိသေးရဲ့လား´

`မေ ရန်ကုန်ကို သွားဖို့ မောင်ပြောနေသားပဲ´

`မောင်နဲ့ မခွဲချင်လို့တောင် မောင့်ဘ၀ထဲ ဆင်းလာခဲ့တာပဲ.. မောင်မို့ ပြောထွက် တယ်ကွယ်၊ ပြီးတော့ ကိုယ်က ဟိုးအရင်ကလို ညစာစားပွဲတွေ၊ ကပွဲတွေ၊ စတိုးဆိုင်တွေ၊ အပျော်အပါးတွေကို ငတ်မွတ်လို့ မဟုတ်ဘူးမောင်၊ ခေတ်နဲ့ မျက်ခြေမပြတ်အောင်လို့ သွားချင်တာ.... မောင်နဲ့အတူ´

`မင်းတို့ မြို့ကြီးမှာ မောင်မပျော်နိုင်ဘူး၊ မလိုက်ရဲဘူးဆိုတာ မေ အသိဆုံး ပဲ´

မောင့်အသံက ညည်းညူသံ ဆန်လာပြန်သည်။

`မောင်ဟာ အဲလောက် ညံ့ဖျင်းတဲ့ယောက်ျားမှ မဟုတ်ဘဲ။ ကိုယ်က ကိုယ်တို့ရဲ့မိသားစု အဆင့်အတန်း မြင့်ဖို့အတွက် ပြောနေတာကို မောင်က ညံ့ဖျင်းပြပြီး မချေဖျက်ပါနဲ့ကွယ်'

`မင်း မောင့်ကို နားမလည်ဘူး´

ကျမ မျက်လုံးတွေထဲ စိုက်ကြည့်တော့ မောင်ကလည်း ပြန်ကြည့်သည်။

`မှားနေပြီမောင်၊ မင်းကသာ ကိုယ့်ကို နားမလည်တာ၊ ကိုယ့်စေတနာကို နားမလည်တာ၊ မင်းက ကိုယ့်ကို မင်းရဲ့ရွာမှာ မပျော်ဘူးလို့ ထင်နေတာ။ တကယ်က ကိုယ်က မင်းဖန်တီးနေတဲ့ ကိုယ်တို့ရဲ့ ဘ၀ထဲမှာကို မပျော်တာ´

`ခုဆိုမောင့်မျက်လုံးတွေထဲကို ကိုယ်မမြင်ရတာ ဘယ်လောက်ကြာပြီလဲ´

မောင်က နားမလည်နိုင်သည့် အံ့သြရိပ်ဖြင့် ကျမကို ငေးကြောင်ကြောင် ကြည့်သည်။။ ကျမရင်ထဲ ရှက်ရွံ့လာပြန်သည်၊ မိန်းမ တယောက်က ချစ်သူတယောက်၏အချစ်ကို အိမ်ထောင်သည်ဘ၀ထိ တောင့်တ နေတာဟာ အံ့သြစရာလားမောင်ရယ်..။

`ကိုယ် မေ့ကို ချစ်တာပဲ၊ ပြီးတော့ ကိုယ်နဲ့မေ အတူတူ နေနေကြရပြီပဲ´

မောင့်စကားအဆုံးမှာ ကျမမျက်နှာက ဖြန်းကနဲ ပူနွေးသွားသည်။

`အတူတူနေခြင်းဟာ အချစ်ရဲ့ပန်းတိုင်ပေါ့ ဟုတ်လား...မောင်´။

ကျမရဲ့ အသံက သနားစရာ သိပ်ကောင်းနေမည် ထင်သည်။

`ဒါဖြင့် မနက်ခင်းအစောကြီး ထပြီး မောင့်အတွက် မနက်စာ သေသေချာချာ ပြင်ပေးတာလည်း မလိုဘူးပေါ့။ မောင့်ပြန်အလာကို သနပ်ခါးမွှေးအောင် လိမ်းပြီးကြိုတာလည်း အဓိပ္ပါယ်မရှိဘူးပေါ့။ မောင်မျက်လုံးတွေထဲ စိုက်ကြည့်ပြီး `ချစ်တယ်´ လို့ပြောတာလည်း အတူတူ နေချင်မှပေါ့ ဟုတ်လား´

ကျမအသံက သွေးရူးသွေးတန်း ဆန်လာသည်။ မောင်လည်း ကျမကို အံ့သြတကြီးဟန်ဖြင့်သာ ငေးဆဲ။ ကျမရင်တို့က အရှက်ခွဲခံရသူ၏ နှလုံးမျိုးဖြင့် နာကျင်နေခဲ့ပြီ။ မောင်က ခေါင်းကို ငိုက်စိုက်ချထား၏။

`ဟုတ်တယ်နော်၊ မင်းကို မောင် နားမလည်ဘူး´

ဟု မောင်က ခံဝန်ချက် ပေးနေသလို ပြောသည့်အခါမှာတော့ ကျမက.....

`မောင်ရယ်... အဲဒါ အချစ်ပါပဲ´

ဟု တီးတိုးရေရွတ်မိကာ.... ခုမှပဲ ကျမက လှိုက်လှိုက်လှဲလှဲ ဆို့နစ်လာသည်။ မောင်က ငြိမ်တွေဆဲ...... ကျမက မောင့်ကို ကျမလိုချင်သည့်ဘ၀ဆိုတာကို မောင်မြင်အောင် ပြချင်နေဆဲရှိသည်။

`မောင်....ကျမတို့ ခုထိ ဘာလို့ကလေးမရှိသေးတာလဲ ဆိုတာကော... မောင် သတိထားမိ ရဲ့လားဟင်´

မောင်က ကျမကို တအံ့တသြ လှည့်ကြည့်သည်။ ကျမ အံ တချက် ကြိတ်မိသေး၏။

`ကျမ တားထားလို့ပေါ့မောင်၊ ရွာကလေးတရွာက သာမန် လယ်ပိုင်ရှင် တယောက်ရဲ့ သားသမီးတွေဖြစ်ဖို့လောက်နဲ့တော့၊ ကိုယ် ကလေးမွေးလို့ မဖြစ်သေးဘူးလေ´

ရုတ်တရက် မောင်က ၀ုန်းကနဲ ထရပ်၏။ ပြီးတော့ ကျမကို စူးစူးရဲရဲကြည့် ကာ....

`မင်း အဲလောက်တောင် ကိုယ့်အပေါ် နာနေခဲ့တယ်လို့ ကိုယ်မသိခဲ့ဘူး´

ဟု အတန်ငယ်မာကျောစွာပြောပြီး လှည့်ထွက်၏။ ကျမရင်ထဲမှာလည်း နာလိုခံခက်ခြင်းတွေ။ ကျမ မောင့်နောက်ကို ချက်ချင်းပဲ ထလိုက်သွားမိ၏။

`နေဦးမောင်´

မောင်က နေရာမှာ တုံ့ကနဲ ရပ်၏။ ထိုစဉ်မှာ ကျမက မောင့်နံဘေးမှ ယုဇနပန်းရုံက ပန်းရနံ့တွေ မွှေးပျံ့မှုက ကျမနှင့်မောင်တို့ကို မဖြားယောင်းနိုင်တော့တာ သတိထားမိလိုက်သေးသည်။

`အဲဒါ နာ နေခဲ့တာမဟုတ်ဘူး။ စေတနာ မောင်ရဲ့၊ မိန်းမတယောက်ရဲ့ .. မိခင် တယောက်ရဲ့ စေတနာ´

မောင်က တွေနေဆဲ..။ ကျမကတော့ ရုတ်ချည်းပင် ၀ုန်းကနဲ လဲပြိုသေဆုံးကာ မျက်ရည်တွေ ကျလာမိ သည်။ သည်တော့လည်း မောင်က ကျမ၏ပခုံးတို့ကို ပွေ့ဖက်ကာ နှစ်သိမ့်သားပင်။ ပြီးတော့ သက်ပြင်းဖွဖွ လည်း ရှိုက်သေး၏။

`မေ့ပတ်ဝန်းကျင်ထဲ မောင်လိုက်တဲ့အခါ မင်းပျော်မယ် ဟုတ်လား မေ´

`ကိုယ့်ပတ်ဝန်းကျင်ထဲကို မဟုတ်ပါဘူး မောင်ရယ်။ တိုးတက်ခေတ်မီတဲ့ ဘ၀တခုထဲကိုပါ`

`မောင်ကတော့ မထင်ပါဘူးကွယ်၊ မောင် ထွက်ပြေးလာရလိမ့်မယ်။ မင်းရဲ့ ပတ်ဝန်းကျင်နဲ့ မောင့်ပတ်ဝန်းကျင် ဘယ်လောက် တခြားစီဖြစ်တယ်ဆိုတာ မင်း တကယ်ပဲ မသိလို့လား´

မောင်က တယောက်ထဲ ရေရွတ်သလို ပြောနေပြန်သည်။ ကျမက မောင့် ကို တင်းတင်းဖက်ထားပြီး ခုပင် ခွဲကြရတော့မလို ထင်လာမိသေးသည်။

`ယောက်ျားဆိုတာ ကိုယ် အရှင်သခင်ဖြစ်တဲ့နေရာမှာပဲ နေချင်ကြပါတယ်။ ဒါဟာ တကိုယ်ကောင်း ဆန်တာ၊ အတ္တဆန်တာဆိုရင်တော့ ကိုယ်မင်းကို ချစ်တဲ့အတွက် တခုခုကို စွန့်လွှတ်ရမှာပေါ့´

ထိုအချိန်မှာ ကျမကတော့ စပါးပင်တွေကိုကြည့်ရင်း သမီးလေးမွေးရင် `မနော်ဟရီ´လို့ နာမည်ပေး မယ်... သားလေးမွေးရင် `ရာကျော်သွေး´လို့ နာမည်ပေးမယ်... ဟု ရေရွတ်ကြုံးဝါးနေခဲ့ဖူးသော မောင့်ကိုပင် ထိုအချိန်မှာ သတိရသွားခဲ့သေးသည်။

ထိုည... ကျမတို့နှစ်ယောက်စလုံး အိပ်မပျော်နိုင်ခဲ့ကြပေ။

................................

အိပ်မပျော်သောည၏ အတွေးတွေထဲမှာ ကျမက ကျမနှင့် လက်ထပ်ပြီးခါစ မောင်နှင့်ကျမ ရန်ကုန်မှာ နေခဲ့ဖူးကြသော ကာလတချို့ကို ပြန် သတိရနေမိသည်။ တကယ်ပဲ ထိုစဉ်က မောင်မပျော်ခဲ့ချေ။ မြို့ပြမှာ မျက်စေ့နောက်ကာ လူတွေ ကျဉ်းကျဉ်းကျပ်ကျပ်နေနေရတာ၊ အမောတကော လှုပ်ရှားနေကြရတာ၊ လူတန်းစား မညီမျှမှုတွေ တွေ့နေရတာ၊ သူစိမ်းဆန်ခြင်းကို ခံစားရတာ။ ပြီးတော့ လူသိများသောကျမရဲ့ နံဘေးမှာ မောင်က ဘာမှမဟုတ်သလို ရှိနေခဲ့ရတာ။ ဒါတွေကို မောင်စိတ်ညစ်နေခဲ့သည်။ မောင်က ရိုးသားပွင့်လင်းသူမို့ သူ ခံစားရတာတွေအကုန် ကျမကိုပြောပြတော့ ကျမပင် မောင့်အတွက် စိတ်မကောင်းဖြစ်ခဲ့တာ။ ဒါပေမဲ့ ခုတခေါက်မှာတော့ ဒီလို ဘယ်ဖြစ်စေရပါ့မလဲကွယ်။ မောင်က တော်တဲ့ ယောက်ျားပဲ။ အလုပ်တခုခု အဆင်ပြေဖို့ ကြိုးစားကြမှာပေါ့။ ကျမတို့က ခြေမဲ့လက်မဲ့မှ မဟုတ်ဘဲကွယ်ဟု မောင့်ကို အားပေးရမည်။ တွေးရင်းနှင့်ပင် အားရှိလာကာ ကျမက တဘက်လှည့်ပြီး ငြိမ်သက်နေသော မောင့် ဘယ်ဘက်လက်မောင်းကိုပင် နမ်းမွှေးလိုက်မိသေး၏။ မောင်က ကျမဘက်ကို လှည့်လာပြီး ကျမနဖူးကို ပြန်လည် ငုံ့နမ်းသည့်အခါမှာတော့ မောင်နှင့်ကျမ ရှေ့လျှောက်ဘ၀မှာ ပျော်ကြရမှာပါ... ဟု ကျမက ယုံကြည်လိုက်မိပြန်သေးသည်။

++++++

(ဆက်ရန်ရှိပါသေး၏)

မြေနဲ့အတူ(အပိုင်း-၂)

(သံလွင်)

မောင်တို့ရွာကို ရောက်ဖို့အတွက် သံလွင်မြစ်ရိုးတလျှောက်ကို သင်္ဘောနှင့် စုန်ဆင်းရသည်။ ကျမစိတ်ထဲမတော့ အဲသည် သံလွင်မြစ်ရိုးတလျှောက်က သာယာလှပလွန်းသည်။ ကျောက်တောင်တွေ ပတ်လည်ရံလျက် မနီးမဝေးမှာ `ဇွဲကပင်တောင်´က ပေါ်လာလိုက် ပျောက်သွားလိုက်၊ မြစ်ရေပေါ်မှာ မြူထုတန်းနေတာကပင် ကျမအတွက်တော့ အဆန်းတကြယ် ဖြစ်လို့။ မောင်ကတော့ ကလေးတယောက်ကို ကြည့်သောမျက်လုံးများနှင့် ကျမကို တကြည့်ကြည့် ရှိ၏။ မောင်က `ရောက်တော့မယ်´ဟုပြောတော့ ကျမက ပိုလို့ ရင်ခုန်လာသေးသည်။

....................

သင်္ဘောပေါ်ကအဆင်း ဆိပ်ခံဗောတံတားပေါ်အတက်မှာ မောင့်လက်ကို ဆုပ်ကိုင်အားပြုတော့ မောင့်ရဲ့ ကြမ်းတမ်းသော လက်ဖ၀ါးတွေက ကျမကို တင်းတင်း ဆုပ်ဖျစ်၏။ မောင်ရော စိတ်လှုပ်ရှားနေတာလား...၊ မောင့်မျက်လုံးတွေကတော့ ပိုလို့ လင်းလက်တောက်ပနေသလိုပါပဲ။

`မင်းပျော်ပါ့မလား´ဟု မောင်က တယောက်တည်း ရေရွတ်သလို ခပ်တိုးတိုး ပြောသည်။ ကျမသည် လူတွေနှင့် ကျိတ်တိုးနေရသည်၌ အခွင့်ကောင်းယူကာ မောင့်လက်ပြင်ကျောစပ်ကို တချက်ခိုးနမ်းမှ မောင်က အပြုံးနှင့် လှည့်ကြည့်သည်။

မောင်တို့ရွာက တကယ်တော့ ရွာကြီးတရွာပင်။ အိမ်ခြေ ထောင်နှင့်ချီရှိပြီး လူနေမှုအဆင့်ကလည်း မနိမ့်လှပေ။ ပြီးတော့ ရွာကလေးက သန့်ရှင်းကျယ်ဝန်းလေသည်။ ကျမပင် အနည်းငယ် အံ့သြသွားမိသေး၏။ ကျမအတွက် ပို အံ့သြစရာ ကောင်းတာကတော့ မောင်ပဲ ဖြစ်သည်။ မောင်က သူ့မြေပေါ်အရောက်မှာ ပိုလို့ တက်ကြွ ဖျတ်လတ်သွား၏။ ကျမကတော့ ပီဘိ ကလေးသူငယ်လေးလို အားပျော့သွားကာ မောင့်ဘ၀လေးကိုပဲ ငေးမောနေမိသည်။

မောင်တို့တောရွာကလေးမှာတော့ မောင့်အိမ်ကလေးက ခေတ်မီ ကြီးကျယ်လေသည်။ ပြတင်း အမြင့်ကြီးများနှင့် နံရံဖောက်ဗီရိုများနှင့် ဘယ်လို ပရိဘောဂမျိုး၏ အနှောင့်အယှက်တို့မှ ရှိမနေသော ဧည့်ခန်းဖွဲ့စည်းပုံက ကျမ စိတ်ကိုတော့ လွတ်လပ်ခြင်းကို ခံစားရစေသည်။ အိမ်ပတ်လည်ဝရံတာတလျှောက် ရှိ နွယ်ပင်မျိုးစုံကတော့ နှစ်သက်ကြည်နူးစေလေသည်။

မောင်က ကျမကို အိမ်ရှေ့ဝရံတာမှ ထန်းပက်လက်ကုလားထိုင်မှာ ထိုင်စေပြီး ကလေးတယောက်ကို မုန့်ကျွေးသလို စိမ်းစားဥတွေ၊ ပြောင်းဖူးပြုတ်တွေ၊ မြေပဲပြုတ်တွေကို ကျမအနားမှာ ပုံတိုက် အောတိုက် လာထားပေး၏။ မောင့် အိမ်က မြစ်ပြင်ဘက် မျက်နှာပြုထားသောကြောင့် မြစ်ရေနံ့ပါသောလေကို ကျမ ရှုရှိုက်ရသည်။ မြစ်ရေနံ့က ညှီအဲ့အဲ့ပေမဲ့ ကျမကတော့ ဒါ သဘာဝရနံ့ပဲဟု စာဆန်ဆန် တွေးမိသေးသည်။ ၀ရန်တာကနေ မတ်တပ်ရပ်ကြည့်တော့ နေရောင်ဖြင့် ဖိတ်ဖ်ိတ်လက်နေသော သံလွင်မြစ်ပြင်ရယ်၊ ပျံ့ပျူး သာယာသော သောင်ကမ်းရယ်၊ ခပ်ဝေးဝေးမှာ စင်ယော်ငှက်တွေ အုပ်ဖွဲ့ပျံနေတာရယ်ကို မြင်ရ သည်။

လွတ်လပ်ပွင့်လင်းခြင်းနှင့်အတူ
သဘာဝရဲ့ ရနံ့ကိုရှူ
ချစ်သူရေ.....
ဘ၀မှာ လိုအပ်သမျှ...
အဲသည်မြစ်ရေက ရမယ်.......
သောင်ကမ်းက ရမယ်........
စင်ယော်တွေဆီက ရမယ်.......
အဲဒါ.... မင်းဆီက ရသမျှ
အချစ်ဘ၀လည်း ဖြစ်တယ်။

ကျမရင်ထဲ ညံ့သက်လာကာ အတွေးမှာ ကဗျာတပိုင်းကို ရေးနေမိသည်။ ပြီးတော့ စိတ်ထဲ ဆွတ်ဆွတ်ပျံ့ပျံ့ရှိကာ မောင့်ကိုရှာတော့ ခြံဝင်းထဲမှာ ရွှေနီရောင် နွားကြီးနှစ်ကောင်နားမှာ အလုပ်ရှုပ်နေသော မောင့်ကို တွေ့ရသည်။ ၀ဖြိုးလှပသော နွားကြီးတွေက ကျွန်မစိတ်ထဲမှာတော့ ချစ်စဖွယ် ခမ်းနားလှသည်။

`မောင်ရေ နွားလှည်းစီးချင်တယ်`ဟု ပူဆာတော့ မောင်က ပြုံးသည်။ ခဏကြာတော့ လှည်းပေါ်မှာ ကောက်ရိုးခင်း.... နွားလှည်းပြင်နှင့် မောင် တယောက် အလုပ်ပိုရှုပ်သွားတော့သည်။ ကျမကတော့ လှည်းပေါ် ရင်တခုန်ခုန်နှင့် တက်ရတာကို ပျော်လို့။ နွားတပ်ပြီး လှည်းဦးမော့သွားတော့ ချားရဟတ်စီးရသလို ရင်ထဲ သိမ့်ကနဲ ဖိုသွားတာကိုလည်း ပျော်နေပြန်သည်။

`ပျော်လိုက်တာမောင်´ဟု ကျမက ကလေးတယောက်လို တတွတ်တွတ် ရွတ်နေမိသည်။ မောင်က `တခါမှ မကြုံဖူးသေးလို့ပါ၊ ကြာတော့လည်း ရိုးသွားမှာ´ဟု လှည့်ပြောတော့ ကျမမောင့်ကို စိတ်ကောက်ချင် သွားမိသည်။ ထိုအခါ....`အဲဒါပဲ၊ မောင်တယောက်ဟာ..၊ ကြာရင် ရိုးရိုး မရိုးရိုး လောလောဆယ် ကိုယ် ပျော်တယ်လေ...... မောင်ဝမ်းမသာဘူးလား´ ဟု စိတ်ကောက်သံဖြင့် ပြောကာ မောင့် လက်ကိုပြင်ကို ဖွဖွ ရိုက်မိတော့သည်။ သည်တော့လည်း မောင်က.... `အေးပါကွာ ၀မ်းသာပါတယ်.. ၀မ်းသာပါတယ်´ ဟု နောက်ပြောင်ရိပ်စွန်းသော အသံဖြင့် ပြော၏။

မောင်က `ကိုင်း´ထဲ လိုက်ပို့မယ်တဲ့။ ကျမသိထားတဲ့ `ကိုင်း´ဆိုတာက မြေကို တွယ်ပြီးရှင်သန်သော နွယ်ပင်တွေ။ `ကျွန်းကိုင်းမှီ ကိုင်းကျွန်းမှီ´ ဆိုတဲ့အထဲက `ကိုင်း´။ `ကိုင်းထဲမှာဆို မင်းပျော်မှာ´ ဟု မောင်ပြောတော့ ကျမက`ကိုင်း´ ဆိုတာ စိုက်ခင်းတမျိုးဖြစ်လိမ့်မည်ဟုတော့ ထင်သားပင်။

ရွာလမ်းတလျှောက် နွားလှည်းဖြင့် ဖြတ်တော့ ရွာလမ်းခနိုးခနောင့်တွေကြောင့် လှည်းက တအိအိ ဆောင့်၏။ မောင်က `ကိုယ်လက်နာတတ်တယ်´ ဟု ပြောသော်လည်း ကျမကတော့ လှည်းဆောင့်သည်ကိုပင် ပျော်ရွှင်စွာ လှည်းအဆောင့်နှင့် အလိုက်သင့် ကိုယ်ကိုဆောင့်ချပြီး မောင့်ကိုစကာ `အမလေးတော်´ဟု တ.တ ပြပြီး ရယ်မောနေမိသေးသည်။ ရွာလမ်းတွေကို အလွန်မှာတော့ ရုတ်တရက်နိုင်လှစွာ မျက်စေ့တဆုံးတိုင် ကျယ်ပြောနေသော ကွင်းပြင်ကြီးတွေက ကျမကို ဘွားကနဲ ပွေ့ဖက်လိုက်သည်။ ကွင်းပြင်ကျယ်ကြီး ထဲမှာ အပင်မြင့်ဆိုလို့ ဇီးပင်(ဆီးပင်)အနည်းအကျဉ်းမှလွဲ၍ ဘာမှရှိမနေဘဲ ဟိုးအဝေး မျက်စေ့တဆုံးမှာကျမှ တောင်နံရံတွေက အနားသတ်ထားပေးသလို ရှိလေသည်။

`လှလိုက်တာ´ဟု ကျမ အသံထွက်ရေရွတ်မိလောက်အောင် ဟင်းလင်းပြင်နှင့် အနားသတ်မျဉ်းတွေက လိုက်ဖက်ညီလှသည်။ တကယ်တမ်းဆိုလျှင်ဖြင့် နေရောင်ပူတောက်တောက်အောက်က ကွင်းပြင်ကျယ်တွေ၊ တောင်နံရံတွေက ဘယ်လောက်မှ မဆန်းကျယ်သော်လည်း ကျမက ကွင်းပြင်၏ ကျယ်ပြော လွတ်လပ်ခြင်း ရယ်။ တောင်တန်း၏ အေးမြရိပ်ရှိသော စိမ်းညို့ညို့အနားသတ်ရယ်နှင့် တိကျခိုင်မာမှု၊ လုံခြုံမှုတို့ကို ခံစားရစေသော ကောင်းကင်ကြည်ကြည်၏ အုပ်မိုးထားမှုရယ်တို့ကို အင်မတန် Composition မှန်သော ပန်းချီကားလို ခံစားမိသည်လေ။

ကွင်းပြင်ထဲမှာတော့ လူတွေ တလှုပ်လှုပ် ရှိသည်။ ထိုလူတွေကို ကျမ ငေးဆဲ..... မောင်က.... `သူတို့ ဘာလုပ်နေကြတာလဲ သိလား´ ဟု လှမ်းမေးသည်။ သေချာကြည့်တော့ သူတို့က မြေပဲနှုတ်နေတာ၊ သွက်လက် ကျွမ်းကျင်စွာ နွယ်ပင်တချို့ကို ဖယ်ရှားပြီး အမြစ်နေရာမှ မြေပဲလေးတွေကို ချွေယူကြတာ သိပ်မြန်တာပဲ။ အဲဒီ မြေပဲပင်တွေပေါ်မှာတော့ ပဲကြားတွေ သီးနေသော အပင်လေးတွေ။

`အဲဒီ မြေပဲနဲ့ ပဲကြားက အတူတူပေါက်တာလား မောင်´

`အတူတူစိုက်တာပါ မေရဲ့။ မြေကို မြောင်းဖော်ပြီး မြေပဲမျိုးစေ့ကို အကွာအဝေး မှန်းပြီး စိုက်တယ်၊ ပြီးတော့ ပဲကြားမျိုးစေ့ကို ကျဲပြီးတော့၊ ၀ဲ(ဓါတ်မြေသြဇာ)ကျဲ ပြီး စိုက်တာ´

`ဒါဖြင့် ခု မြေပဲနှုတ်တော့ အဲဒီ ပဲကြားကို မထိခိုက်ဘူးလား´

'သိပ် အထိခိုက်ကြီးတော့ မဖြစ်ပါဘူး။ သူ့အတွက် ပေါင်းလိုက်ပေးသလိုတောင် ဖြစ်တာပေါ့၊ မတွေ့ဘူးလား။ အဲဒီမှာ နွယ်တွေ၊ မြက်တွေ ဖယ်ပစ်တာ၊ ပြီးတော့ သူတို့နှစ်မျိုးက မရှေးမနှောင်း ဆွတ်ရ တာလေ´`

ကျမကတော့ မောင့်ကို အံ့သြငေးမောနေမိသည်။ ကြည့်စမ်း ကျမ အင်မတန် ရင်ခုန်ရသည့် အဲသည် လူငယ်လေးက ခုတော့လည်း တကယ့် လယ်သမားကြီးလို ကျွမ်းကျင်မှုတွေနဲ့ တောက်ပလို့။ ကျမကတော့ဖြင့် မောင် နွားလှည်းမောင်းတာကိုပင် တအံ့တသြ သဘောကျ မဆုံးပြီ။ မောင်နှင့်တွေ့စက မောင့်လို လူငယ် ချောချောလေးက ခြေသည်းတွေ ပဲ့နေတာ၊ လက်ဖ၀ါးတွေ ကြမ်းထော်နေတာ၊ ဆံပင်တွေ နီကျင်ကျင် ဖြစ်နေတာ၊ အသားတွေနေလောင်နေတာတွေကို အံ့သြမိဖူးတာကိုလည်း သတိရနေမိသေးသည်။ တကယ်ဆို ကျမက လူတွေရဲ့ အသားအရည်၊ ခြေလက်စင်ကြယ်မှုကို စိတ်ဝင်တစား ရှိတတ်သော မိန်းမသာ ဖြစ်သည်။ မောင်နှင့်ကျကာမှ`ခြေတွေ လက်တွေ ကြမ်းတော့ အားရှိတာပေါ့´ ဟု ပြောင်းလဲခဲ့တာ။ `အဲဒါဟာ အချစ်ရဲ့ ဆန်းကြယ်တဲ့ လှည့်စားမှုပဲ´ဟုပင် မောင့်ကို ပြောမိခဲ့ဖူးသည်။

ခုလည်း မောင်က သူ့လက်မောင်းကြွက်သားတွေကို ပေါ်ပေါ်လွင်လွင် မြင်နေရစေသော တီရှပ် လက်ပြတ်နှင့် ပုဆိုးကို တိုတိုဝတ်လို့၊ ခြေထောက်မှာ ဖိနပ်မပါဘဲ နွားလှည်းမောင်းနေတာ။ ကျမသည် လူငယ်တယောက်၏ သန်စွမ်း မှုနှင့် သဘာဝဆန်မှုထဲမှာ ရင်ခုန်ရပြန်သည်။ အခါများစွာမှာ ကျမတွေ့နေရတာ က မြို့ပြထဲက ခေတ်မီသော လူငယ်လေးတယောက်ကိုသာဖြစ်သည်။ မောင်များ တီရှပ်လက်ပြတ်နှင့် ဂျင်းဘောင်ဘီကို တွဲဝတ်လိုက်လျှင် ဘာတခုမှ ထပ်မံ ဖြည့်စွက်ဖို့ မလိုလောက်အောင် မောင်က ခမ်းနား ပေါ်လွင်သွားလေသည်။ မောင့် ဆံပင်နွယ်နွယ်တွေနှင့် အထူးတလည် တောက်ပသော မျက်လုံးနက်နက်တို့ ကတော့ မောင့်ရဲ့ပင်ကိုတန်ဖိုးကို ပိုထင်ရှားစေသည့် အမှတ်အသားတွေပဲ ဖြစ်မည်။ အဲသည် လူငယ်ကလေးက ခုတော့လည်း တကယ့်ကို အရိုင်းဆန်ဆန် ဒါမှမဟုတ် မြေသား ဆန်ဆန်။ ကျမစိတ်ထဲမှာတော့ မောင့်ကို သူ့မြေနှင့် တသားတည်းကျကာ မြေဆီမြေနှစ်လို၊ မြေသြဇာလို ဒါမှမဟုတ် သူကိုယ်တိုင်သည်ပင် မြေကို ဖက်တွယ်သော ကိုင်းပင်တပင်လို မြင်လာမိသည်။

ထိုအခါ..... `မောင့်ကို အဖေက ရာကျော်စပါး စစိုက်တဲ့နေ့မှာ မွေးလို့ `ရာကျော်´လို့ နာမည်ပေးတာ။ အဲဒီ နာမည်နဲ့ ဘယ်လို ပတ်သက်လဲတော့ မပြောတတ်ဘူး။ မောင်တို့ရွယ်တူတွေထဲမှာတော့ မောင်က လယ်တွေ၊ ကိုင်းတွေ လုပ်ရတာကို ထူးထူးခြားခြားကို ပျော်တယ်။ စပါးစိုက်နေရတဲ့ ဘ၀ကို ကျေနပ်တယ်။ ရွာမှာ ကျန်တဲ့ကောင်တွေက လယ်အလုပ်ကို သိပ်စိတ်မ၀င်စားကြဘူး´ဟု ပြောပြခဲ့ဖူးတာကို သတိရသည်။ တကယ်လည်း မောင်က စပါးပင်တွေကို သူကိုယ်တိုင် စိုက် ရတာ၊ သူ့မျက်စေ့ရှေ့မှာ စပါးပင်တွေ တက်လာတာ သူကိုယ်တိုင် မြေသြဇာ ကျွေး၊ ပိုးတွေရန်က ကာကွယ်ရင်း စပါးပင်တွေ ဖြစ်ထွန်းလာတာကို ခံစားရတာ သိပ်ပျော်သူ။

လယ်ကိစ္စများ အရေးပေါ်လျှင် ကျမကိုပင် မှန်မှန် လာမတွေ့ဘဲ နေနိုင်ခဲ့တာ။ သတိရလျှင်တော့ ကျမက အဲသည့်လယ်မြေတွေကို မနာလိုဖြစ်ကာ ငိုချင်ခဲ့ဖူးသေးသည်။ တခါကများဆိုလျှင် ကျမကို စက်မှုလယ်ယာပစ္စည်း အရောင်းဆိုင်ထဲ ခေါ်သွားကာ `ဒါက ရိပ်သိမ်းချွေလှေ့စက်။ ဒါက လယ်ထွန်စက်၊ ဒါက ထော်လာဂျီ၊ ဒါက ပေါင်းလိုက် သမန်းနှိုးစက်´ဆိုပြီး တခုချင်းပြကာ ဘယ်နေရာမှာ သုံးတယ်ဆိုတာကိုလည်း သေချာ ပြောပြနေသေးသည်။ ပြီးတော့ `လယ်သမားကို ရည်းစားထားရင် ဒါတွေတော့ သိထားရမယ်ကွ၊ နော်´ဟုလည်း ကျမကို စည်းရုံးသေးသည်။ ကျမမှာ သူ့ကိုချစ်သည်နှင့်ပင် အဲဒီပစ္စည်းတွေကို စိတ်ဝင်စား ခဲ့ရသေး၏။ ပြီးတော့ စာမေးပွဲစစ်သလို အင်တာဗျူးလုပ်သလိုလည်း `ပြန်ပြောစမ်းမေ၊ ပေါင်းလိုက် သမန်းနှိုး စက် က ဘာလုပ်ရတာလဲ´ဟု မေးတတ် ပြန်သည်။

အတွေးထဲ နစ်မျောဆဲ မောင်က `ဟိုမှာကြည့်စမ်းမေ´ဟု ဆိုတော့ သူ ညွှန်ပြရာကို လှမ်းကြည့်မှ ကျမ ကိုယ့်ကိုယ်ကို အပြစ်တင်မိတော့သည်။ စောစောက မမြင်မိခဲ့သော မြင်ကွင်း။ ကွင်းပြင်ကျယ်၏ အလယ်လောက်မှာ ရှိနေသော တောင်နံရံ..... ကြုံကြိုက်တိုင်း ကျမ အမြဲ သဘောတကျ ငေးမောနေကျ ကရင် အမျိုးသား အဘိုးကြီးနှင့် အဘွားကြီး မတ်တပ်ရပ်နေဟန် အထင်အရှား ပုံပေါ်နေသည့် တောင်ကမ္ဘားရံကို တွေ့ရသည်။ ကြည့်စမ်း... ဒါဖြင့် ကျမ ခု မြင်နေရတာက ဇွဲကပင်တောင်ပေါ့။ ဇွဲကပင်တောင် က`မာယာတောင်´ဟု အမည်ပေးရသည့်အတိုင်း ပုံစံအမျိုးမျိုး ပြောင်းသည့် တောင်ပေပဲ။

`ကြည့်စမ်း ကိုင်းထဲက လှမ်းကြည့်ရင် ဒီနေရာကို လှမ်းမြင်ရတယ်လို့ မောင်က တခါမှလည်း ပြောမပြဖူးဘူး´

ဟု ကျမက စူပွပွလုပ်ပြီး ပြောမိတော့သည်။

`ကြိုပြောထားရင် ခုလောက်ခံစားလို့ ကောင်းပါ့မလားကွာ´

ဟု မောင်ပြောတော့လည်း မှန်နေတာမို့ ကျမ စိတ်ပြေလိုက်ရသည်။

`ကိုယ်သာ မောင့်နေရာမှာဆိုရင်တော့ ဒီကနေားအံဘက်ကို မှန်းကြည့် ပြီး ရည်းစားကို လွမ်းမှာပဲ။ မောင်ကတော့ လွမ်းမှာမဟုတ်ပါဘူး။ လယ်ထဲမှာဆို ကိုယ့်ကို မေ့နေတာ´

ဟု ကျမက ကြုံကြိုက်တုန်း စွပ်စွဲသလို အပိုင်ပြောလိုက်သည်။ သည်တော့လည်း မောင်က အသံထွက်အောင် ရယ်မောကာ......

`ဟ ဘယ့်နှယ်ရန်ထောင်နေရတာလဲ ကောင်မလေးရ အဲဒီလယ်က တခြား ကောင်မလေး တွေမှ မဟုတ်တာကွာ´

ဟု ပြန်ပြော၏။

`ဟာ မရပါဘူး၊ မောင့်ဘ၀မှာ ကိုယ်ပဲ အချိန်ပြည့် အရေးပါ ရမှ´

မောင်က ကျမခေါင်းကို ခပ်ဖွဖွ ပုတ်ရင်း ပြုံးနေခဲ့သည်။

နောက်တော့လည်း ငေးမောပျော်ရွှင်ကာ စိတ်တိုဖို့ မေ့ရပြန်သည်။ မြေပဲခင်းတွေကို လွန်တော့ စိမ်းလန်းသော အပင်မြင့်မြင့်တွေကို တသီတတန်း တွေ့သည်။ အနားနီးတော့မှ အပင်တွေမှာ ပြောင်းဖူးတွေ တွဲရွဲခိုနေတာ မြင်သည်။ တုတ်ခိုင်သန်မာသော ပြောင်းဖူးကြီးတွေ အပင်မှာ ဖူးနေတာကို ကျမ ပထမဦးဆုံး တွေ့ဖူးခြင်းလည်း ဖြစ်သည်။

`ပြောင်းစိုက်မယ့်မြေက နုံးနည်းနည်း ပါရတယ်။ မြေပဲကျတော့ သဲနည်းနည်း ပါရတယ်။ ခု ဒီဘက်ပိုင်းက မြစ်နဲ့ ပိုနီးပြီး နုံးတင်မြေလည်း ဖြစ်လို့ `ပြောင်း´စိုက်တာ.....´

မောင်ကတော့ ကျမကို စာသင်နေသလို စိတ်ပါလက်ပါ ရှင်းပြလေသည်။ ကျမကလည်း မောင့်ရည်းစား ပေပဲ၊ ကိုယ်အားသန်ရာကိုသာ ၀င်စားလေသည်။

`ဒီနေရာကိုရောက်တော့ ဗန်ဂိုးကို သတိရလိုက်တာကွယ်´

တကယ်ပဲ ကျမရင်ထဲ ဆွတ်ပျံ့ပျံ့ဖြစ်လာကာ ဗင်းဆင့်ဗန်ဂိုးကို လွမ်းသွားခဲ့တာ။ အဲသည်တုန်းမှာပဲ

`ပြောင်းပင်တိုင်းကတော့ လူတရပ်စာ မမြင့်ဘူး မေရဲ့။ အောင်တဲ့အခင်းကျမှ သန်တာ၊ သိပ်မကောင်းရင် ခါးလောက်ပဲ ရှိတာ၊ အဲဒါဆို အဖူးကလည်း သေးတယ်´

ဟု မောင်က ပြောတော့တာ။ ကြည်ပါဦး ကျမနှင့် မောင်ကွာခြားပုံများ ကျမ၏ စိတ်ကူးယဉ်ဆန်မှုနှင့် သူ၏လက်တွေ့ကျမှု။ ခုလည်း ပြောရင်းဆိုရင်း လှည်းပေါ်မှ လွှားခနဲ ခုန်ဆင်းကာ ပြောင်းဖူးတွေ ချိုးနေပြန် သည်။ ကျစ်လျစ် သန်မာလှသော လူငယ်လေးကို ကျမ ငေးမိနေဆဲ လူငယ်လေးက သွက်လက်စွာ လှည်းပေါ် ပြန်ခုန်တက်ပြီး ခရီးဆက်ပြန်သည်။ ပြောင်းခင်းတွေ လွန်တော့ ကွင်းပြင်ကျယ်ထဲ ရောက်သွားပြန်သည်။

`နေသိပ်ပူနေပြီလားမေ´ဟု မောင်လှမ်းမေးလိုက်ဆဲမှာပင် ကွင်းပြင်ကျယ်တို့အလယ်မှာ ရှိနေသော တောအုပ်ကလေးတခုကို ကျမ လှမ်းမြင်လိုက်တာ။

`ဟယ်မောင်ရေ.... အဲဒါ ဘာပင်တွေလဲဟင်၊ အမရပူရက မယ်ဇယ်ပင်တန်းနဲ့ တူလိုက်တာ´

အုံ့ဆိုင်းမှိုင်းဝေလျက်ရှိသော အရွယ်တူအပင်တွေ ထောင်နှင့်ချီလိမ့်မည်။ မောင်က `သရက်ခြံ´ဟု ပြန်ဖြေစဉ်မှာပင် စိမ်းမြသော သရက်နံ့က လေနှင့် အတူ ကျမထံ လွင့်လာသည်။

မောင်က လှည်းကို ထိုတောအုပ်လေးဆီ ဦးတည်၏။ သရက်ရွက်ကျိုးကျဲတို့ကို ထိုးဖောက်ကာ နေရောင်က မြေပေါ်မျာ ပြိုးပြိုးပြောက်ပြောက် ကျနေ၏။ ဒါကိုက အလှတပါးပဲ။ မြေပေါ်မှာ သရက်သီးကင်းတွေ ဖွေးနေအောင် ကြွေကျနေတာမြင်တော့ ကျမက ရန်ကုန်မှာ ဈေးကြီးပေးဝယ်စားရတာကို သတိတရဖြင့် နှမြောနေမိသေးသည်။ သရက်ပင်တို့၏အခြေမှာ မြေပြင်ကလည်း ညီညာပြန့်ပျူး၏။

`ဒီမှာပဲ နားစို့မောင်ရယ်´

`ဒီနေရာမှာက ရေမရှိဘူး မေရဲ့၊ ရှေ့မှာ နားဖို့တဲ ရှိတယ်။ အရိပ်လည်း ကောင်းတယ်၊ အဲဒီ သွားမယ်နော်´

မောင်ရွေးချယ်သောနေရာက သောင်ပြင်နှင့်နီးနီး သရက်ပင်ကြီးတပင်အောက်က ဖက်မိုးတဲလေး ဖြစ်သည်။ အနားမှာတော့ ကိုင်းခရမ်းချဉ်တွေ၊ ငရုတ် တွေ၊ ဖရဲတွေ၊ သခွားတွေ သီးနေသော အချင်းရှိသည်။

တဲကလေး၏ ၀ါးကြမ်းခင်းမှာထိုင်ရင်း သရက်ပွင့်နံ့ကို ရှုရှိုက်ကာ သဲအိုးထဲမှ ရေအေးအေးကို သောက်ရင်း ကျမ နားနေတုန်း မောင်ကတော့ နွားတွေကိုဖြုတ်ကာ သရက်တောအုပ်ထဲမှာ လှန်ထား လေသည်။ ပြီးတော့ တဲကလေးနှင့် မလှမ်းမကမ်း မြေပြန့်ပြန့်မှာ ရှိနေသော မီးသွေးဖိုလေးနှင့် မီးမွှေးနေသည်။

`မောင်ရေ.. ဘာလုပ်မလို့လဲ.... လာကွယ် ... ကိုယ့်နားမှာ လာထိုင်နားပါဦးကွယ်၊ ဘာမှ မလုပ်နဲ့´

မောင်က လက်ကာပြပြီး ဆက် အလုပ်ရှုပ်နေ၏။ ခဏအကြာတော့ မီးဖိုမှ မီးတောက်လေးတွေ လွင့်တက်လာသည်။

`ကြည့်စမ်း..... ကိုယ့်မောင်က သိပ်တော်တာပဲ၊ မီးမွှေးတာများ ခဏလေးရယ်.... ကိုယ်ဆို လုံးဝ မမွှေးတတ်ဘူး´

`အောင်မာကွာ...... မတတ်ရင် တတ်အောင် သင်ရမှာပေါ့´ ဟု ပြုံးစစဖြင့် ကြိမ်းရင်း မောင်က သူချိုးလာသော ပြောင်းဖူးတွေကို အခွံမခွာဘဲ မီးဖိုထဲ ထည့်နေပြန်သည်။ ပြီးတော့ မီးဖိုက လေ၀င်ပေါက် တွေကို ပိတ်ပြီး မီးညွန့်မတက်အောင် လုပ်ပြန်သည်။ ကျမအတွက်တော့ မောင်က ထိုနေ့မှာ စိတ်ဝင်စားစရာ တွေဖြင့်သာ ကျမကို ဖမ်းစားနေသလိုပါပဲ။ ပြီးမှ မောင်က ကျမဆီ လျှောက်လာသည်။

`အဲလို အခွံပါထည့် မီးဖုတ်ပြီး စားဖူးလား´

`ဟင့်အင်း.... မြင်တာတောင် ခုမှ မြင်ဖူးတာ´
ဟု ကျမဖြေတော့ မောင်က သဘောတကျ ပြုံး၏။

`အဲလို မီးဖုတ်ရင် သူ့အရည်ဓါတ်နဲ့ သူနူးပြီး သိပ်ချိုတာ´

တဲ့။ တကယ်လည်း စားဖူးသမျှ အနူးညံ့ဆုံးနှင့် အမွှေးပျံ့ဆုံး ပြောင်းဖူးကို ကျမစားခဲ့ရလေသည်။

နောက်တော့ သခွားမွှေးခင်းတွေကို ဖြတ်ပြီး သောင်ပြင်ဆီ နေပူပူထဲ လမ်းလျှောက်ရတာကလည်း ပျော်စရာ ကောင်းနေပြန်သည်။ မောင်က ဖရဲသီးတလုံးကို မြေမှာ ပေါက်ခွဲပေးပြီး ဒီအတိုင်း ဖဲ့ ဖဲ့ ယူစားရတာက ပျော်စရာကောင်းသည့်အပြင် ဖရဲသီးကလည်း ရန်ကုန်သူကျမအတွက်တော့ အံ့သြစရာကောင်းလောက်အောင် ချိုလေသည်။

သောင်အစပ်မှာ လှေကလေးတစင်း ရှိ၏။ ပြီးတော့ ထိုနေရာလေးမှာ သံလွင်မြစ်က ကျဉ်းသည်။ `မောင် ကိုကို နှင့် မြနန္ဒာ´ထဲက လင်းနှင့် မြနန္ဒာ အင်းလျားကန်ထဲ လှေလှော်ကြတာကိုပင် သတိတရ လွမ်းဆွတ်သွားမိသေး၏။ တဖက်မှာ ပျံ့ပျူး လွင်ပြင်။ ကျမ မျှော်ကြည့်တော့ မောင်က `အဲဒါ ဖရဲခင်း´ဟု ပြောပြသည်။ ကျမကတော့ ထိုနေ့ကလေးမှာ သဘာဝ၏ ဖမ်းစားမှုထဲ အရူးအမူး ဖြစ်လို့။ မောင့် မျက်လုံးပြုံးပြုံးတွေကလည်း ကျမ၏ ရူးသွပ်မှုကို အားပေးအားမြှောက်လုပ်သေး၏။ နောက်တော့ အပြန်လမ်းမှာ ကျမက အဲဒါပဲ တကယ့်ဘ၀ဟု ထင်နေခဲ့တော့သည်။

.................

(ဆက်ရန် ရှိပါသေးသည်)