Apr 30, 2009

မြသီလာအလွမ်းပြေ (၃၉)

ဒီဘက်ပိုင်းမှာ နေရတဲ့အခိုက် ကျမရဲ့ ပြဿနာတခုကတော့ နားလည်မှုကိစ္စပါပဲ..။ ကျမက ပြည်တွင်းကနေ ဆရာမဘ၀နဲ့ ပူပူနွေးနွေးထွက်လာချိန်လည်းဖြစ်.. ကျမက မောင်နှမ တွေထဲမှာလည်း အကြီးဆုံး.. ဆွေမျိုးထဲက ၀မ်းကွဲတွေထဲမှာလည်း အကြီးဆုံးမို့ ကျမဆီမှာ အကြီးစိတ် တော်တော်များပါတယ်။ နောက်တခုက ကျမက လူကြီး လူငယ်အားလုံးကို သူတို့ဆီမှာ ရှိတဲ့ အရည်အချင်းအလိုက် အင်မတန် လေးစားတတ်တယ်..။ အဲဒီအခါ ဘယ်သူ့ကိုမဆို မခန့်လေးစားဆက်ဆံတတ်တဲ့သူမျိုးဆို ကျမက မကြိုက်တော့ဘူး။ ကျမ သူငယ်ချင်း တယောက် ကလည်း အဲဒီကိစ္စ ကျမကို ဝေဖန်ဖူးတယ်..။ လူတိုင်းရဲ့ အလေးစား ခံချင်လို့တော့ မရဘူးတဲ့..။ ကျမက ပြန်ပြောတယ်.. ကျမပြောနေတဲ့ Respect ဆိုတာက အပြန်အလှန်လေးစားမှုကိစ္စလို့..။ တကယ်ပါ.. လူတိုင်းမှာ ကျမတို့ မသိနိုင်တဲ့ အရည်အချင်း အနည်းဆုံး တခုတော့ ရှိတယ်..။ အဲဒါကို ကျမ လေးစားတယ်..။

ပြီးတော့ ကျမက အထင်သေးစရာ ရှိတဲ့ လူဆိုရင်လည်း လုံးလုံးပဲ.. ခါးခါး သီးသီး..။ ကျမရဲ့ အကိုလိုဖြစ်နေတဲ့ မိတ်ဆွေတယောက်က ပြောဖူးတယ်.. ကျမက ချစ်လုံးလုံး မုန်းလျားလျား တဲ့..။ အဲဒါ ပတ်ဝန်းကျင်မှာ မကိုက်ဘူး တဲ့။ ဟုတ်မှာ..။

ဒါပေမဲ့ ကျမကတော့ သိပ်ရှင်းပါတယ်..။ လောကကြီးမှာ သူတပါးအပေါ် ကလိမ်ကညစ်ကျ.. ဒုက္ခပေးတဲ့ သူတွေ.. အထူးသဖြင့် ကိုယ့်အချင်းချင်းကို အလွဲသုံးစားလုပ်တဲ့သူတွေကို ကျမက ခါးသီးတာပါ..။ အဲဒီအခါ ကျမက မထင်ရင်မထင်သလိုတွေ ပြော..။ ဘယ်လို ဖြစ်သင့်တယ်.. ဘယ်ညာဖြစ်သင့်တယ်ပေါ့..။ ပြီးတော့ ကျမက အဲလို လူတွေကိုဆိုလည်း ဘယ်တော့မှ ဧည့်ထောက်ခံ စကားမပြောတော့..။ တကယ်တော့ ကျမက ကိုယ်တိုင်ကလည်း ဘာမှ မဟုတ်ပါဘဲနဲ့လေ…။ ဆိုတော့ တရက်လည်းကျရော.. Group mail တခုကနေ ကျမက စစ်အစိုးရက လွှတ်တဲ့ ထောက်လှမ်းရေးဖြစ်ကြောင်းနဲ့ ကျမကို သတ်ပစ်နိုင်တယ်ဆိုတဲ့ အကြောင်းတွေ စာဖြန့်ပါလေရော..။ ရေးထားတာလည်း စော်စော်ကားကား မိုက်မိုက် ရိုင်းရိုင်းတွေ..။ မှတ်မှတ်ရရ.. ၂၀၀၆ ဇွန်လထဲမှာ..။ ကျမဖြင့် ကျောင်းဆရာမ လုပ်လာတဲ့သူ ဆိုတော့ တကယ့်ကို အဲလို အစော်ကားခံရတာကို မခံစားနိုင်ဘူးဖြစ်သွားတယ်။ စိတ်ဆိုး တာထက် အံ့သြတုန်လှုပ်ပြီး ၀မ်းနည်းသွားမိတာ..။ (အဲဒီတုန်းက Blog လည်း မလုပ်ရ သေးတော့ Cbox ကနေ ပက်ပက်စက်စက်ဝင်ဆဲတာမျိုးကိုလည်း မကြုံဖူးသေးတော့ အရေမထူသေးဘူးလေ..  )

ဘာပဲဖြစ်ဖြစ်.. ဒီဘက်ဝန်းကျင်အသိုင်းအ၀ိုင်းဟာ ကျမရဲ့ အတွင်းစိတ်ထဲက အထင်ကြီး လေးစားထားတဲ့ အ၀န်းအ၀ိုင်းကိုး။ ပြီးတော့ စာထဲက အသွားအလာအရ.. နအဖရဲ့ ဆင်ကွက်လည်းမဟုတ်တာ သေချာ နေပြန်တယ်။ ပြောရရင် ကိုယ့်နားလေးကပဲ။ နောက်တော့ နည်းပညာကျွမ်းကျင်တဲ့ ကျမရဲ့ မောင်လေးတွေထဲက တယောက်က Trace လိုက်ပေးလို့ ဘယ်နေရာက ပို့တယ်..။ IP နံပါတ်နဲ့ အဲဒီ email ဖွင့်တဲ့ ရက်စွဲကအစ ရလိုက်ပါတယ်။ စိတ်ထဲ မှန်းကြည့်ရတာပေါ့လေ..။ နောက်တော့လည်း အဲလို လုပ်တာဟာ ပုဂ္ဂိုလ်ရေး တိုက်ခိုက် တာဖြစ်ပြီး ဘယ်သူဆိုတာလည်း လုပ်တဲ့သူရဲ့ partner က ဖော်လို့ပဲ သိလိုက်ရ ပါတယ်။ ဒီတော့လည်း ကျမက အော်.. ဒီလိုလားနဲ့ ပြီးလိုက်တာပါပဲ..။ တကယ်လည်း ကာယကံရှင်က ၀န်မခံရင် ဘာမှ ထူးတာ မဟုတ်ဘူးလေ..။

ဇင်းမယ်က ဘ၀မှာတော့ ကျမမှာက စိတ်ချမ်းသာစရာသာ ခပ်များများပါ..။ အဲဒီအချိန်တုန်းက ကျမ Radio Free Asia မှာ အပတ်စဉ် ပညာရေးကဏ္ဍ ရေးနေတဲ့အချိန်..။ ပညာရေးနဲ့ ပတ်သက်လို့ လိုတာမှန်သမျှ ကိုယ့်ကို အကူအညီတောင်းသမျှ စိတ်လက်ရှင်းရှင်းနဲ့ ကူနိုင်တဲ့အချိန်မို့ ကိုယ့်အလုပ် ကိုယ် လုပ်နေရတာ သိပ် စိတ်ချမ်းသာရပါတယ်။ စိတ် အနှောက်အယှက် အနည်းအကျဉ်းဖြစ်ရတာကတော့ ရှိတာပေါ့လေ..။ အဲဒါလေး လည်း ကြုံတုန်း ပြောပြချင်ပါတယ်။

ကျမက ကိုယ်တိုင်ကလည်း မြန်မာစာဆရာမ.. ပြီးတော့ စာရေးဆရာလည်းဖြစ်လေတော့ ‘စာအုပ်စာပေ လူ့မိတ်ဆွေ’ဆိုတာကို တကယ်ယုံပါတယ်..။ ကျမကိုယ်တိုင် စာအုပ်စာပေ တွေထဲကပေးတဲ့ အင်အားတွေနဲ့ ဘ၀ကို ရင်ဆိုင်နိုင်ခဲ့တာတွေ ရှိတာမို့လည်း စာဖတ်တဲ့ အကျိုးကို တကယ် ယုံတာပါ။ အဲဒီအခါ ကျမနေတဲ့ ၀န်းကျင်လေးမှာ စာဖတ်အားနည်းကြတာ သိလို့ အမြဲလိုလို ကျမစကားပြောရတဲ့ ပွဲတွေမှာ စာများများ ဖတ်ကြပါလို့ တိုက်တွန်းမိပါတယ်။ အဲဒါကို ဗမာ မဟုတ်တဲ့ တိုင်းရင်းအဖွဲ့တချို့က ဒေါ်မေငြိမ်းက ဗမာမဆိုတော့ တိုင်းရင်းသား တွေကြားမှာလာပြီး ဗမာလူမျိုးကြီးဝါဒ ဖြန့်ချိရေး လုပ်နေတယ်.. Burmanize လုပ်နေတယ် လို့ ပြောကြပါတယ်။ အဲလိုပြောတဲ့အထဲမှာ NGO နိုင်ငံခြားသားတချို့လည်း ပါပါတယ်။ အစပိုင်းတုန်းကတော့ ကျမ တော်တော် စိတ်မကောင်းဖြစ်လိုက်ပါသေးတယ်။ ဒါပေမဲ့ တကယ့် အထင်ကရ တိုင်းရင်းသားခေါင်းဆောင် အများစုကတော့ အဲလို သဘောမထားကြပါဘူး။ ဒီတော့လည်း ကျမက ဒါဟာ သဘောထားမကြီးနိုင်တဲ့ သူတွေရဲ့ တုံ့ပြန်မှုပဲလို့ တွေးတယ်..။ ပြီးတော့ ဗမာဆိုတာနဲ့ ပတ်သက်ပြီး သူတို့ ခံစားခဲ့ရတဲ့ ပမာဏကို စဉ်းစားကြည့်ပြီး မေ့ထား လိုက်ပါတော့တယ်။ (တကယ်တော့ ဗမာအစိုးရလို့ သူတို့ စွဲနေတဲ့ စစ်အစိုးရက ကျမတို့ ဗမာလူမျိုး ဆိုတာတွေကိုရော ချမ်းသာပေးလို့လား…)

အဲဒီလို မေ့ထားနိုင်တဲ့ ကာလထိ မရောက်ခင်ကတော့ ကျမမှာ မကြာခဏ အငြင်းအခုန် ဖြစ်ရပါတယ်။ ကျမ ပြောချင်တာက ကျမ ဗမာဖြစ်တာထက်.. မြန်မာစာဆရာမ ဖြစ်လို့ ဆိုတာထက် လောလောဆယ်မှာ တကယ် ရှောင်လွှဲ မရတဲ့ အမှန်တရားက မြန်မာစာဟာ တရားဝင် ရုံးစာ.. တရားဝင်တွင်ကျယ် ဘာသာစကား ဖြစ်နေတာပါ။ ဒီတော့ မြန်မာပြည် အရေး.. မြန်မာပြည်နဲ့ ပတ်သက်လို့ လုပ်တဲ့ ကိုင်တဲ့အခါ မြန်မာစာ တတ်မှပဲ .. မြန်မာလို တတ်မှပဲ လုပ်ရ ကိုင်ရတာ အဆင်ပြေ ချောမွေ့ပါမယ်..။ ကျမက ပြောပါတယ်.. အနည်းဆုံး စစ်အစိုးရကို ရန်ဖြစ်တောင် မြန်မာလိုပြောပြီး ဖြစ်ရမှာပါ.. လို့။ (တကယ်ဆို မြန်မာတွေ ကြားထဲမှာ NGO လုပ်နေတဲ့ နိုင်ငံခြားသားတွေတောင် ဗမာစကား သင်နေကြတာပါ)။

ဒါပေမဲ့ တချို့ကတော့ ခါးခါးသီးသီး ငြင်းဆန်ပါတယ်။ ကျမပြောချင်တာက မြန်မာပြည်ထဲမှာ ခုနေ ကရင်ပြည်နယ်က ကရင်လူမျိုး နဲ့ ဟိုးမြောက်ဖျားက ကချင်လူမျိုးတို့ တွေ့တဲ့အခါ သုံးစွဲရမယ့် ဘာသာစကားဟာ လောလောဆယ်မှာတော့ မြန်မာစကားပဲ ရှိနေတာပါ..လို့။ အဲဒါကို အဖွဲ့အစည်းထဲက တချို့က သဘောမတူ ပါဘူး။ အင်္ဂလိပ်လိုပဲ ပြောမှာပေါ့တဲ့..။ ကျမက ပြန်ပြောလိုက်ပါတယ်..။ ဒါဆို ကျမတို့ တော်လှန်ရေးကာလမှာ ပြည်တွင်းက လူတွေကို အင်္ဂလိပ်စာကို အဆင့်အတန်းမီ ပြောနိုင်အောင် အချိန်ယူ လုပ်ဖို့လည်း လိုတယ်လို့..။ ဒါဆိုရင်တော့ တိုင်းရင်းသားအားလုံး စည်းလုံးနိုင်ဖို့ အင်္ဂလိပ်စာ အရင်သင်မှပဲ.. လို့။ တခြားတိုင်းရင်းသား လူငယ်တချို့ကဆို ဗမာတွေကို မုန်းတယ်လို့ ကျမရှေ့မှာ တမင် ပြောတာတောင် ကြုံခဲ့ရဖူးသေးတာပါ။ တကယ်တော့လည်း ကျမတို့မြန်မာနိုင်ငံသားတွေဟာ ခံစားချက်တွေ အတွေးတွေ ကိုယ်စီ အဆိပ်သင့် နေကြရ သူတွေပါပဲ...။ တကယ့် တရားခံကိုပဲ ကျမတို့ တိုက်သင့်တာ မဟုတ်ဘူးလား..။ ခုတော့ မရှိအပ်တဲ့ အမုန်းတွေနဲ့.. မလိုအပ်တဲ့ မသင့်မြတ်မှုတွေနဲ့..။

+++++

နောက်တခု ကျမပြောဖို့ ကျော်သွားတာက အမေရိက သွားမယ်လို့ ထွက်လာတဲ့ ကျမက ဘာလို့ ထိုင်းမှာ နေဖြစ် သွားတာလဲ ဆိုတာလေးပါ..။။

တကယ်တော့ ကျမက အပြင်ထွက်လာတဲ့အထိ ထိုင်းမှာ နေရင်း ကိုယ့် မြန်မာ အသိုင်းအ၀ိုင်းအတွက် တခုခု လုပ်ပေးလို့ ရနေတယ်ဆိုတာကို မသိခဲ့ပါဘူး။ ပြီးတော့ ထိုင်းကနေ အမေရိကကို ဘယ်လို သွားနေတာလဲ ဆိုတာကိုလည်း သေချာ မသိခဲ့ပါဘူး။ တကယ်တမ်း ထိုင်းကို ရောက်မှ.. မဲဆောက်မှာ တလလောက်နေမှ.. ထိုင်းမှာနေပြီး မြန်မာ့အရေး မှန်သမျှကို အသီးသီး လုပ်နေကြတဲ့သူတွေ.. တွေ့တာ။ ပြီးတော့ ခင်မင်းဇော်ရဲ့ ချစ်ချစ်နဲ့ စကားတွေ ပြောရာက.. ထိုင်းမှာ နေရင်း ကိုယ့် community အတွက် တခုခု လုပ်နေချင်စိတ် ပေါက်လာတာ..။ နောက်တချက်ကတော့ ဒုက္ခသည်….. ကိစ္စပေါ့။ (Refugees ကို ဘယ်သူက ဒုက္ခသည်လို့ ဘာသာပြန်ခဲ့တယ် မသိပါ)

ကျမ မဲဆောက်မှာ ရှိနေတုန်းမှာပဲ ထိုင်းအစိုးရက နိုင်ငံရေးသမားအများစုပါတဲ့ Refugees တွေ Camp ၀င်ပြီးမှ Third Country ထွက်ရမယ်လို့ သတ်မှတ်တာပါ..။ နောက်တခု ကျမတို့ ရောက်လာတဲ့အချိန်လောက်မှာပဲ ဒုက္ခသည်ခံပြီး နိုင်ငံခြားတိုင်းပြည်တွေမှာ သွားနေချင်တဲ့ ပြည်တွင်းကလူတွေ အများကြီး မဲဆောက်ကို ရောက်လာပါတယ်။ အဲဒီတုန်းက မဲဆောက်မှာ ဒုက္ခသည်တွေအပေါ် ထားတဲ့ သဘောထားနှစ်မျိုး ကွဲသွားပါ တယ်။ တမျိုးကတော့ နိုင်ငံရေးအရ ဒုက္ခမရောက်ရဘဲ လာကြတဲ့သူတွေကို အခွင့်အရေးသမားလို့ သတ်မှတ် သလို နိုင်ငံရေးသမားက တတိယနိုင်ငံသွားတာကိုလည်း တော်လှန်ရေးကို ကျောခိုင်းသွားတယ်လို့ မြင်ကြပါ တယ်။ နောက် တအုပ်စုကတော့ မြန်မာနိုင်ငံသားမှန်သမျှ ဒုက္ခသည်ပဲ.. တယောက် လွတ်သွားရင် တယောက် အေးသွားတာပေါ့.. တဲ့။ ကျမကတော့ ကိုယ်တိုင် နိုင်ငံရေးကို ဖြတ်သန်းမလာရလို့လား မသိပါဘူး . အဲလို သဘောထား တခုမှ စိတ်ထဲ မရှိပါဘူး။ တခုပဲ.. ဒုက္ခသည်ဖြစ်ဖို့က နိုင်ငံရေးအရ အန္တရာယ် ရှိလောက်တဲ့ သူတော့ ဖြစ်ရပါမယ်။ ဒါမှပဲ UNHCR က မေးတဲ့အခါ အံဝင်တဲ့ အဖြေဖြစ်ပါမယ်။

အဲဒါကပဲ ကျမရဲ့ ပြဿနာပါ..။ ကျမက နိုင်ငံရေးအရ အန္တရာယ်ရှိလို့ ထွက်လာတာ မဟုတ်…။ အဲဒါကို အန္တရာယ်ဘယ်လို ရှိကြောင်း ကျမ မဖြေနိုင်ပါ..။ လိမ်ဖြေရင်ရတာပဲ.. သိပ်လွယ်တာပဲလို့ သိနေ ကြားနေပေမဲ့ ကျမ မလုပ်နိုင်ပါ။ ကျမက ကိုယ်တိုင်ရော.. ကိုယ့် မိဘ မောင်ဖွား ထဲမှာရော အန္တရာယ်ရှိလောက်အောင် နိုင်ငံရေးလုပ်တဲ့သူ မရှိတော့ပါ။ တကယ် လုပ်ခဲ့တဲ့ အဖေနဲ့ မောင်လေး (သုံးရောင်ခြယ်)တို့တောင် မရှိတော့တာ ကြာပြီပဲလေ။ ပြီးတော့ တကယ်တမ်း အန္တရာယ်ရှိသူတွေကတောင် ကြံ့ကြံ့ခံလုပ်နေတာကို ကျမက မဟုတ်ဘဲနဲ့ အန္တရာယ် ရှိတယ်လို့ မပြောချင်ခဲ့ပါ။

ကျမက ထွက် လာလာချင်း DVB (Democratic Voice of Burma) ရေဒီယိုက အင်တာဗျူး မှာတောင်.. ဘာလို့ ထွက်လာတာလဲ ဆိုတဲ့ မေးခွန်းကို မနေချင်လို့ ထွက်လာတာပါ.. လို့ ရိုးရိုးပဲ ဖြေခဲ့တာပါ။ ဒါပေမဲ့ ဒုက္ခသည် လျှောက်လွှာတော့ တင်ခဲ့ပါတယ်။ ဘာလို့လဲဆိုတော့ ထိုင်းမှာ တရားမ၀င် နေနေတဲ့အချိန်.. အဖမ်းဆီးခံခဲ့ရရင် ဖြေရှင်းရ လွယ်မလားလို့ပါ..။ နောက် တကယ် အနေကြာသွားတော့လည်း ထိုင်းမှာ တရားဝင်နေလို့ရတဲ့ အခြေအနေတခု ရလာတာပါပဲ။ သားနဲ့ သမီးကလည်း ထိုင်းကျောင်းတွေမှာ..။ သားကြီးလည်း အလွတ် ပညာရေး ဆက်နေပြီ။ ကျမနဲ့ ရာကျော်လည်း ကိုယ်လုပ်ချင်တဲ့ အလုပ်တွေကိုယ်စီနဲ့..။ အေးလို့..။ တကယ်ပဲ ထိုင်းမှာ ဇင်းမယ်မှာပဲ နေတော့မှာလို့ ကျမဆုံးဖြတ်ထားခဲ့တာ… ၂၀၀၇ ထိပေါ့။
+++++

၂၀၀၇ထဲမှာ… ကျမရဲ့ အကိုအရင်းလို ဖြစ်နေတဲ့ သူငယ်ချင်းတယောက်က ဘန်ကောက်မှာ နေနေရာကနေ အမေရိကန် DV (Diversity Visa Lottery) ပေါက်ပြီး တမိသားစုလုံး US ကို ထွက်သွားပါလေရော…။ အဲဒီသူငယ်ချင်းကိုလည်း ကျမရဲ့ အကိုလို မိတ်ဆွေတယောက်ကပဲ on line ကနေ အပျော်ဆိုပြီး လုပ်ပေး လိုက်ရာကနေ ထပေါက်သွားတာ။ ဒါနဲ့ ကျမက ဒီနှစ် ကျမတို့အလှည့်ဆိုပြီး အပျော်လုပ်ကြည့်ကြပါရော..။ ကျမရော.. ရာကျော်ရော..။ အဲဒီအကိုက မေးသေးတယ်.. ပေါက်ရင် တကယ်သွားမှာလား.. တဲ့။ ကျမက “ပေါက်ပါစေဦး.. ကျမက ဘယ်တော့မှ ထီမပေါက်ဘူး“ လို့တောင် ပြောလိုက်သေး..။ အဲဒီ အကိုအိမ်မှာ မုန့်လုပ် စားကြရင်း ဓာတ်ပုံလည်း အိမ်မှာပဲ အဖြစ်ရိုက်ပြီး အဲဒီအကိုက တင်ပေးပါလေရော..။ မှတ်မှတ်ရရ.. ဖောင်ပိတ်ဖို့ ၂ရက် အလို…။ ၂၀၀၇ ရဲ့ နိုဝင်ဘာ ၂၈ရက် ညကြီး..။

တကယ်လည်း ကျမက ဘယ်အရာမှ အလွယ်တကူမရသူဆိုတာတော့ အမှန်ပါပဲ…။ အဲဒီ Lottery လည်း ရာကျော် ပေါက်ခဲ့တာပါ။ ၂၀၀၈ခုနှစ် မေလဆန်းမှာပဲ Lottery မှာ အရွေးခံ ရကြောင်း စာနဲ့ ဖြည့်ရမယ့် Form ထုပ်ကြီး ရာကျော့်နာမည်နဲ့ ရောက်လာပါတော့တယ်..။ တကယ်ထူးဆန်းတဲ့ ကံကြမ္မာ အလှည့်အပြောင်းတခုပါပဲ။ အမှန်အတိုင်းပြောရရင်.. ကျမ တကယ်ပဲ စိတ်လှုပ်ရှားသွားခဲ့ပါတယ်။ ပြီးတော့ ခဏလေးအတွင်းမှာပဲ ဘာဆက်လုပ်မလဲဆိုတဲ့ မေးခွန်းတွေ ၀င်လာပါ တော့တယ်။ ဖြစ်ချင်တော့ အဲဒီတုန်းက တိုက်တိုက်ဆိုင်ဆိုင် ကျမက ဒေါ်ခင်မင်းဇော်တို့ဆီ ရောက်နေတဲ့ အချိန်…။ ရာကျော်ကတော့ အေးဆေးပဲ.. ကျမက ဘာလုပ်ကြ မလဲဆိုတော့ သိဘူးလေ.. ညည်းသဘောတဲ့..။ ထုံးစံ အတိုင်း..။ ကျမကတော့ သံခင်းတမန်ခင်း နားလည်သူ သူငယ်ချင်းများနဲ့ တိုင်ပင်ရတာပေါ့။ အားလုံးကတော့ လုပ်ကြည့်ချင်ရင်တော့ စမ်းပေါ့.. တဲ့။ ဒါပေမဲ့ ကျမတို့ အနေအထားနဲ့တော့ သိပ်မလွယ်.. တဲ့။ ကျမတို့မှာ ထိုင်းမှာ ယာယီနေလို့ရနေတဲ့ အထောက်အထား ကဒ်ပြား တွေက လွဲလို့ ဘာမှမရှိ။

ပြီးတော့ Green Card Lottery နဲ့ အမေရိကသွားဖို့ဆိုတာ လူတယောက်ကို အနည်းဆုံး ဒေါ်လာ ၃၀၀၀ လောက် ကုန်တာလေ..။ ကျမတို့က ၅ယောက်ကြီး..။ လက်ထဲမှာ ရှိနိုင်တဲ့ ပိုက်ဆံက တယောက်တည်း သွားမယ်ဆိုရင်တောင် အနိုင်နိုင်..။ ပြီးတော့ ကျမက ဘယ်တော့မှ ခွဲရေး မစဉ်းစား…။ ဒီမိသားစု တပြုံလုံးတွဲရေးပဲ စဉ်းစားတာလေ..။ ပိုခက်တော့မှာပေါ့…။ နောက်တော့ အဲဒီ DVနဲ့ မိသားတစုလုံး ထွက်သွား နှင့်တယ်ဆိုတဲ့ အကိုက ကြိုးစားကြည့်ပါလား.. တဲ့။ လိုတာ ကူကြမယ်တဲ့။ အဲလိုပဲ ကျမတို့ကို အဲဒီ ထီထိုးပေးတဲ့ အကိုကလည်း ကူမယ်တဲ့။ ဒီလိုနဲ့ ကူမယ်ဆိုတဲ့သူတွေ လေးငါးယောက် ဖြစ်လာ..။ သူငယ်ချင်း တယောက်ကတော့ မိသားစု ၅ယောက် ဒေါ်လာ ၁သောင်းခွဲလောက် ကုန်မယ့်ကိစ္စ.. ကျနော်သာဆို မလုပ်ဘူး.. Burden ဖြစ်တယ်.. တဲ့။ ဒါလည်း ဟုတ်တာပဲ..။ နောက် တချို့သူငယ်ချင်းတွေကကျတော့လည်း အမေရိကန် မြေကို နင်းတာနဲ့ Green Card ရတာမို့ ဒေါ်လာ ၁သောင်းခွဲလောက် ကြွေးတင်ပြီး မိသားတစုလုံး အတူ ရောက်နိုင်တယ် ဆိုရင် မဆိုးပါဘူးတဲ့။ ကိုယ့် နေထိုင်ခွင့်နဲ့ သားသမီးတွေ ပညာရေးအခွင့်အလမ်း.. နောက် သွားဖို့လာဖို့ Document တဲ့။ ပြီးတော့ ကျမလို ကျောင်းတခုခု တက်ချင်သေးတဲ့သူအတွက် ကြိုးစားကြည့်သင့်တယ်… တဲ့။ ပြီးတော့ ကျမ အဓိကထားစဉ်းစားတာ သားကြီး ပညာရေး ကိုပါ..။ သားကြီးခမျာ ငယ်ငယ်လေးကတည်းက ကျမသွားလေရာ တတန်းတန်းလိုက်ရင်း ဒုက္ခရောက်ရတာ များပေါ့။ အငယ်လေး နှစ်ယောက်က ထိုင်းပညာရေး ကောင်းကောင်း ရနေလို့မို့ ပူစရာမလိုလှ..။ သမီးနဲ့သားက ထိုင်းဘုရင်ကြီးရဲ့ ပညာသင်ဆုလည်းရထားတာမို့ အခြေခံပညာအထက်တန်း(၁၂တန်း)အထိ Free Education ရပြီးသား။ သားကြီးသာ ဟိုမရောက် ဒီမရောက်… လမ်းခွတ်လတ်မှာ။

တကယ်တမ်းက စဉ်းစားစရာကို မလိုဘဲ နောက်ဆုတ်သင့်တဲ့ အနေအထားပါ။ ဒါပေမဲ့ မဟာဇနကဇာတ်ကို သမိန်ပေါသွပ် ဟာသလုပ်သလို လုပ်ရရင်… ကံက ဆိုးချင်တော့ ထိုင်းကို ထွက်လာမိတယ်။ ကံက ကောင်းချင်တော့ အေးအေးဆေးဆေးလေး နေခဲ့ရတယ်။ တခါ ကံက ဆိုးချင်တော့ ထီထိုးမိ။ ကံက ကောင်းချင်တော့ အဲဒီ ထီက ထပေါက်..။ ကံက ဆိုးချင်တော့ ထီလက်မှတ်က တပိုင်းပဲ သေချာ..။ ဒါပေမဲ့ ကံက ကောင်းချင်တော့ အဲလို ပါးစပ်ဆိုးဆိုး ကျမကို ကူမယ့် သူတွေက ပေါ်လာ..။ အမေရိကန် သံရုံးကတောင် မနေနိုင်။ ဒါပေမဲ့ ကံက ဆိုးချင်တော့ အရာရာက အထစ်ထစ် အငေါ့ငေါ့..။ ဗီဇာ ထုတ်ရတော့မယ့် အဆင့်မှာကို ၅လ စောင့်.. သံရုံး ၈ခေါက် ၀င်ရ..။ ဆေးစစ်တာကပဲ ၃ခါ..။ အမယ်မင်းးး ဘန်ကောက်နဲ့ ဇင်းမယ်… တက်လိုက် ဆင်းလိုက်.. စိတ်ပမ်း လူပမ်း ငွေပမ်း ..။ ပိုက်ဆံ စုထားသမျှလေးတွေ ဟောကနဲ ဟောကနဲ..။

ကျမတို့ US ကို အရောက်ဝင်ရမှာက ၂၀၀၈ စက်တင်ဘာ ၃၀ရက်နေ့ နောက်ဆုံးထား အရောက်..။ စက်တင်ဘာလဆန်းအထိ ကျမတို့ လက်ထဲ ဗီဇာ မရောက်သေး။ နောက်ဆုံးတော့ စက်တင်ဘာလ ၅ရက်နေ့မှာ ကျမတို့ လက်ထဲကို ဗီဇာတွေနဲ့ Travel Document တွေ ရောက်လာပါတော့တယ်။ အမှန်အတိုင်း ၀န်ခံရရင်.. အိပ်မက်လိုပါပဲ..။ အင်မတန် ကပ်သီးကပ်သပ်နိုင်လောက်အောင် စစ်ဆေးတာတွေ အထပ်ထပ်လုပ်သော အမေရိကန်ပြည်ထောင်စုရဲ့ သံရုံးက မြန်မာနိုင်ငံက ပါလာတဲ့ မှတ်ပုံတင်တွေ.. ကျမရဲ့ ၀န်ထမ်းကဒ်ပြားတွေ ဘွဲ့လက်မှတ်တွေနဲ့ လုပ်ဖော်ကိုင်ဖက် မိတ်ဆွေတချို့ရေးပေးတဲ့ အထောက်အထားတွေကိုသာ အရင်းခံပြီး ပြည်ဝင်ခွင့် ဗီဇာတွေရော.. ခရီးသွားခွင့်လက်မှတ် တွေပါ ထုတ်ပေးခဲ့ပါတော့တယ်။ တကယ်တမ်း ဗီဇာအတွက် သံရုံး ၀င်တော့လည်း မေးတဲ့ မေးခွန်းက ဟိုရောက်ရင် ဘာလုပ်မလဲတဲ့။ ကျမက ကျောင်းတခုခု ဆက်တက် မယ်ပေါ့..။ ကျမသားလည်း ကျောင်းတက်မယ်ပေါ့..။ ဒါပဲ…။

ဒီလိုနဲ့ လက်ထဲ ဗီဇာတွေလည်း ရောက်.. ဇင်းမယ် ပြန်..။ ထွက်ဖို့အတွက် လေယာဉ်လက်မှတ် ၀ယ်…။ စက်တင်ဘာ ၁၈ရက်… ည ၉နာရီ.. Thai Airway နဲ့။ ကျမ သတိထား မိသေးတယ်။ ရွှေဝါရောင် တော်လှန်ရေး တနှစ်ပြည့် မှတ်မှတ်ရရပဲလို့။

+++++

စက်တင်ဘာ ၁၈ရက်နေ့မှာ ကျမတို့ မိသားစု စိတ်လှုပ်ရှားနေခဲ့ကြတယ်..။ ကျမတို့ ဘ၀မှာ နောက်ထပ် အသစ်တခု။ တကယ်တော့ စိတ်တွေရော လူတွေပါ ပင်ပန်းလှပြီ။ အထူးသဖြင့် ရာကျော်ရယ်.. ကျမရယ်.. သားကြီးရယ်.. မေလ ကတည်းကနေ ခု စက်တင်ဘာထိ.. ဒီကိစ္စထဲ ပင်ပန်းနေခဲ့ကြရတာ မဟုတ်လား။ ဒါပေမဲ့ မပြီးပြတ်သေးဘူး။ ကျမတို့က ထိုင်းနိုင်ငံထဲကို တရားမ၀င် ၀င်ခဲ့ကြတာဖြစ်လို့ နောက်တနိုင်ငံကို တရားဝင် ထွက်ဖို့အတွက်ဆိုရင် ဥပဒေအတိုင်း Detention Center ၀င်ပြီးမှသာ ထွက်ရမှာပါ။ အမှန်အတိုင်းပြောရရင် ထောင်အသေးစားလေးဖြစ်တဲ့ DC ထဲ ကျမ ကလေး လူမမည်လေးတွေ ၀င်ရမှာကို ကျမ စိတ်ထဲ မကောင်း ဖြစ်နေမိပါတယ်။ ပြီးတော့ တတိယနိုင်ငံ သွားဖို့အရေး ခုလို ဖြစ်ရလေတယ်လို့လည်း စိတ်ထဲ ရှက်သလိုလို ဖြစ်နေမိတယ်။ ဒါပေမဲ့ ကျမတို့က သူတပါး နိုင်ငံကို တရားမ၀င် ၀င်လာခဲ့တာကိုး.. ဆိုတဲ့ စိတ်နဲ့ ဖြေရပါတယ်။ ကျမတို့ DC ထဲမှာ တနေကုန် နေရမှာပါ..။ ညနေ ၄နာရီမှ DC ကနေ ထွက်ရမှာ ဖြစ်ပြီး ည ၉နာရီမှာ လေယာဉ် ထွက်မှာပါ။

အဲဒီအချိန်မှာပဲ မျှော်လင့်မထားတဲ့ ပြဿနာပေါ်လာပါတော့တယ်။ အဲဒါကတော့ အမေရိကန်သံရုံးက ပေးတဲ့ Travel Document ကို မယုံပါဘူး..တဲ့။ အမေရိကန်သံရုံးကို ဖုန်းဆက်မေးလို့ ကောင်စစ်ဝန်က အတည်ပြုပေးတာလည်း မရပါဘူး။ နောက်ဆုံး ကောင်စစ်ဝန်ရုံးက အမှုထမ်းတယောက်ကိုယ်တိုင် လာပြီး အာမခံတာတောင် မရဘူးဖြစ်နေပါတယ်တဲ့။ အဲဒီအခါမှာတော့ ကျမ စိတ်နည်းနည်းပူလာပါတယ်။ အင်မီဂရေးရှင်းက လူတွေရဲ့ အမူအယာကလည်း နည်းနည်း တင်းမာလာပါတယ်။ သူတို့က ဘာမို့လို့ အမေရိကန်သံရုံးရဲ့ ဗီဇာတွေ ခရီးသွားလက်မှတ်တွေ ရရတာလဲတဲ့။ ပြီးတော့ Green card Visa တဲ့.. မဖြစ်နိုင်ဘူး..တဲ့။ အဲလိုတွေ ပြောကြတယ်လို့ ဆိုပါတယ်။ ကျမကတော့ အချက်အလက် အထောက်အထား အားလုံးက အမှန်ပဲမို့လို့ စိတ်ညစ်ပေမဲ့ နောက်ဆုံး အဆင်ပြေမှာပဲလို့သာ တွေးထားတာပါတယ်။ ကျမ ပြဿနာကို လိုက်ရှင်းပေးနေတဲ့ သူငယ်ချင်းကလည်း အားပေးပါတယ်။ ပြီးသွားမှာပါ.. မပူနဲ့.. တဲ့။

နောက်တော့.. ကျမတို့ မိသားစု သံမံတလင်းအခင်းသာ ရှိတဲ့ DC ထဲမှာ တနေကုန် နေကြရပါတယ်။ သမီးနဲ့ သားငယ်လေးကတော့ ကျမတို့ ပေါင်တွေပေါ်မှာ အိပ်ပျော်လို့။ သားကြီးကတော့ မျက်နှာ မကောင်းရှာပါဘူး။ ကျမမှာလည်း မိသားစု သိပ် စိတ် အားမငယ် အောင် မာန်တင်းပြီး နေနေရပါတယ်။ ရင်ထဲမှာတော့ ဆို့ဆို့ကြီး ဖြစ်နေပါတယ်။ ပိုဆိုးတာက DC အချုပ်တခုလုံး မြန်မာနိုင်ငံသားတွေချည်း ဖြစ်နေတာပါပဲ။ အလုပ်သမား တွေပါ..။ လက်မှတ်မရှိလို့ ဖမ်းခံကြရတာတဲ့..။ သူတို့ကို ထိုင်းမြန်မာနယ်စပ်မှာ သွားပစ်မှာ.. တဲ့။ ကောင်မလေး တချို့က ငိုလို့..။ အားလုံးက ကျမတို့ကို တအံ့တသြ ကြည့်ကြပါတယ်။ ကျမကတော့ တနေကုန် နေရမယ့်အတူတူ မိန်းကလေးတချို့နဲ့ စကားပြောနေလိုက်ပါသေးတယ်။ ကျမတို့ ပြဿနာကိုတော့ သူငယ်ချင်း တွေက ရှင်းနေကြတုန်းပေါ့။

ဒီလိုနဲ့ ညနေ ၄နာရီ ရောက်လာပါတယ်။ အချုပ်ကားတစီး လာရပ်ပြီး အချုပ်ခန်းတံခါး ဖွင့်ပါတယ်။ အင်း… အခန်းထဲက အလုပ်သမားတွေကို ခေါ်သွားတော့မယ်ပေါ့။ ဒီလိုနဲ့ နာမည် တွေ ခေါ်ပြီး အချုပ်ကားပေါ်တင်တော့ ကျမတို့က ထွက်ရမယ့်သူတွေဆိုပြီး ခပ်အေးအေး လုပ်နေတာ…။ နောက်တော့ ခေါ်တဲ့ နာမည်တွေထဲ ကျမတို့ မိသားစု ပါပါလေရော..။ ထိုင်းလို ပြောတာတွေ ကျမတို့က နားမလည်။ ကျမတို့ တင်ထားတဲ့ စာရွက် စာတမ်းတွေအကြောင်း ပြောတော့လည်း ပြောမရ..။ ကျမ ကိုယ့်လူတွေဆီ ဖုန်းတွေခေါ်နေတုန်းမှာပဲ ကျမတို့ မိသားစု အချုပ်ကားပေါ် တက်လိုက်ရပါတော့တယ်။ အဲဒီအချိန်မှာ ကျမကလေးတွေက သိပ်ကို တုန်လှုပ်နေပြီ။ ကျမကတော့ လိုတဲ့ဖုန်းတွေ အရအမိ ဆက်နေရပါတယ်။ ကျမကိုယ်တိုင်လည်း ခုလိုဖြစ်ရတာကို နားမလည်နိုင်တော့ ပါဘူး။ အချုပ်ကားပေါ်မှာ တလမ်းလုံး ကျမကိစ္စကို ဆက်ဖြေရှင်းပေးဖို့ သူငယ်ချင်းတွေဆီ ဖုန်းနဲ့ အကြောင်းကြားနေရင်းကပဲ ကျမတို့ကို ချုပ်မယ့် ရဲဌာန အချုပ်စခန်းဆီ ရောက်လာပါတယ်။ အဲဒီအထိလည်း ကျမက တော်ကြာနေရင်တော့ သူငယ်ချင်းတွေ လာခေါ်ပြီး ထွက်ရမှာလို့ ထင်နေဆဲပါ…။ ကျမ အင်မတန်ချစ်တဲ့ ဇင်းမယ်ရဲ့ ကျုံးနဘေးက အချုပ်ထောင်ထဲမှာ မိသားတစုလုံး အမှုတွဲအဖြစ် ၁၁ရက်ကြာအောင် နေလိုက်ရလိမ့်မယ်လို့ နည်းနည်းမှ ထင်မထားခဲ့တဲ့ အချိန်ပေါ့။ ပြီးတော့ အဲဒါထက်ပိုပြီး ခြောက်ချားစရာ ကောင်းလှတဲ့.. စိတ်နှလုံး နာကျင်စရာကောင်းလှတဲ့ အဖြစ်အပျက်တွေကို ထပ်ကြုံရလိမ့်ဦးမယ်လို့ နည်းနည်းမှ တွေးမထားမိတဲ့ အချိန်ပေါ့။

+++++

Apr 21, 2009

မြသီလာ အလွမ်းပြေ(၃၈)


တကယ်တမ်း အလုပ်ကနေ ထွက်တော့မယ်.. ကိုယ့်တိုင်းပြည်နဲ့ အဝေးကိုသွားတော့မယ်လို့ ဆုံးဖြတ်ရ ချိန်မှာ တော့ ကျမ နှလုံးတွေက ဆုပ်ဖျစ်ခံထားရသလိုပါပဲ။ ကျမ ထားခဲ့ရမယ့် မဟာဝိဇ္ဇာတန်းခွဲတွေကို ငဲ့ကြည့်တော့ အဲဒီတုန်းက ကျမတယောက်တည်းပဲ သင်မယ့်သူ ရှိသလိုဖြစ်နေတဲ့ ဆရာ မြဇင် ရဲ့ ကဗျာ နရီနဲ့ နိမိတ်ပုံ စာအုပ်.. ဆရာဇော်ဂျီရဲ့ ရသစာပေ အဖွင့်နဲ့ နိဒါန်း၊ ပြီးတော့ မောင်ခင်မင်(ဓနုဖြူ)ရဲ့ စကားပြေသဘောတရား စကားပြေ အတတ်ပညာ…။ နောက် ၀တ္ထုတို ၀တ္ထုရှည် လေ့လာချက်တွေ..။ ဒါပေမဲ့ အဲဒီတုန်းက မဟာဝိဇ္ဇာတန်းမှာ ရှိတဲ့ ကျောင်းသား ကျောင်းသူ ၅၀ထဲမှာတော့ ကျမက စာဖတ်လာပါလို့ မှာလို့မှ တကယ် ဖတ်လာတာက ၂ယောက် မပြည့်တာ..။ ပြီးတော့ ကျမကို အံ့အားသင့် စေလောက်အောင် မဟာဝိဇ္ဇာတန်းအထိ Lecture ကောင်းကောင်း မလိုက်တတ်သူတွေ..။ ၀တ္ထုတိုသင်ရိုးအတွက် မဟာဝိဇ္ဇာကျောင်းသားတွေအနေနဲ့ ဘယ်လို ၀တ္ထုတိုမျိုးကို ကြိုက်လဲ.. လို့ မေးလို့မှ အဖြေပြန်မရတာ..။ လစဉ်ထုတ်မဂ္ဂဇင်းတွေထဲက အမြဲတမ်းဖတ်တဲ့ မဂ္ဂဇင်း တမျိုးစီ ပြောပါဆိုလည်း မဖြေ..။ ဒါနဲ့ ကဲ တယောက်မှ ဘာမှမဖတ်ဖူးလား..ဆိုတော့မှ တယောက်က လက်ညှိုးလေးထောင်တယ်..။ ကျမက ၀မ်းသာအားရနဲ့ အဲ.. ပြောပါဦး.. ဘာမဂ္ဂဇင်း ဖတ်လဲ.. ဆိုတော့ ဂမ္ဘီရ.. တဲ့။ အဲလိုမျိုးတွေကို ပြန် ပြန်တွေးတော့မှပဲ ကျမ စိတ်ထဲ နည်းနည်း ပြတ်တော့တာပါ။ နောက်တော့ ၉၈နောက်ပိုင်းမှ အထက်တန်းကျောင်း တွေမှာ စာမေးပွဲဖြေလို့ ဂုဏ်ထူးတန်းတွေ ၀င်.. နောက်တော့ ပိုက်ဆံချမ်းသာမှုကြောင့် တက္ကသိုလ်မှာ ဆရာမဖြစ်.. အဲလိုနဲ့ပဲ ပိုက်ဆံ ရှိလို့ ပါရဂူ တက်နိုင်ကြသူတွေနဲ့ ကျမက ထိပ်တိုက်တွေ့စရာတွေက ကြုံ ကြုံလာ..။ အဲဒီ ရက်တွေထဲမှာ မကြာခဏ စဉ်းစားမိ တာကတော့ အန်တီစုပြောပြလို့ သိနေရတဲ့ ချက် (Czech) ခေါင်းဆောင် Vaclav Havel ရေးခဲ့တဲ့ The Power of the powerless စာအုပ်ထဲက အကြောင်းတွေပေါ့..။

ဒီနေရာမှာ ၁၉၈၉ဒီဇင်ဘာမှာမှ ဒီမိုကရေစီရခဲ့တဲ့ ချက်ကိုစလိုဗက်နိုင်ငံတုန်းကဆိုရင်လည်း ကွန်မြူနစ် အာဏာရှင်တွေက ဆရာတွေရဲ့ သင်ကြားရေးတွေကိုပါ ၀င်စွက်ဖက် လာတဲ့အတွက် ဆရာတွေ အလုပ်ထွက် ပစ်ကြပါတယ်၊ အဲဒီတုန်းက ချက်ကိုစလိုဗက်ကီးယား (Czechoslovakia) ရဲ့ အခြေနေက ဗမာပြည်လောက် တောင် မဆိုးသေးဘူးလို့ ဆိုနိုင်ပါတယ်။ ဒါကိုတောင် အာဏာရှင်တွေရဲ့ မတရားတဲ့ မလျော်ကန်တဲ့ အမိန့်အာဏာတွေကို မလိုက်နာနိုင်ဘူးဆိုပြီး တက္ကသိုလ်က ဆရာတွေဟာ အလုပ်ထွက်ပြီး တံမျက်စည်း လှည်းတာတို့ ပန်းရံတို့ ၀င်လုပ်ကြပါတယ်၊ ပြီးတော့ အဲဒီ ဆရာတွေက ပြောပါတယ်၊ မမှန်ကန်တဲ့ အတွေးအခေါ် တွေကို လူငယ်တွေ ခေါင်းထဲ ထည့်ပေးရတဲ့အလုပ်လို ယုတ်ညံ့တဲ့ အလုပ်တွေကို လုပ်တာထက်တော့ ဒီလို အခြေခံအလုပ်မျိုးတွေ လုပ်ရတာက သာသေးတယ် လို့ ပြောပါတယ်တဲ့။ အဲဒီတုန်းက စာရေးဆရာလည်းဖြစ် တော်လှန်ရေးသမားဖြစ်ပြီး၊ ချက် နဲ့ စလိုဗက်ကီးယား ကွဲပြီးနောက်ပိုင်းမှာ ချက် ရီပတ်ဗလစ်နိုင်ငံ (Czech Republic) ရဲ့ သမ္မတဖြစ်လာတဲ့ Vaclav Havel က The Power of the powerless စာအုပ်ထဲမှာ အဲဒါတွေကို ရေးခဲ့တာပါ။ အန်တီစုက အဲဒီစာအုပ်ထဲက Vaclav Havel ရဲ့ စကားတွေကို ကိုးကားပြီးတော့ “ဒီလို စနစ်အတွင်းမှာ ကျမတို့ ဂုဏ်သိက္ခာရှိရှိနဲ့ နေနိုင်သလား… ဒီစနစ်က ပြည်သူ လူထုကို အကျိုးပြုနိုင် သလား… ပြည်သူလူထုကို အသုံးချနေသလား… ဒါပဲ စဉ်းစားရမှာပဲ ..” လို့ ပြောခဲ့ ဖူးပါတယ်။

အဲဒါတွေကလည်း ကျမနှလုံးထဲကို စိမ့်ဝင်ခဲ့ပါတယ်။ တကယ်တော့ ကျမတို့ နိုင်ငံမှာလည်း အာဏာပိုင်တွေရဲ့ မတရားအမိန့်တွေကို မနာခံနိုင်သူတွေက ပြည်ပထွက်၊ ဒါမှမဟုတ် အလုပ် ထွက်ကုန်ကြပြီး မလွန်ဆန်ရဲကြတဲ့ နာခံနိုင်သူတွေကျတော့လည်း မျက်စေ့စုံမှိတ် နာခံကြတာမို့လို့ နိုင်ငံတနိုင်ငံအတွက် အဓိက အကျဆုံး ထောက်တိုင်တစ်တိုင်ဖြစ်တဲ့ ပညာရေးစနစ်ကြီး တစ်ခုလုံး ထိခိုက်ပျက်စီး သွားရတာပါ။ တကယ်တော့ အလုပ် ထွက်တာက မတရားတဲ့ အမိန့် ကို ဖီဆန်တာဖြစ်ပေမဲ့ ပြည်ပထွက်တာကတော့ ကိုယ့်တိုင်းပြည်ထဲမှာ ရှိနေသင့်တဲ့ ဦးနှောက် အင်အားတွေ အပြင်ကို ယိုစီးထွက်ကုန်တာပါပဲ။ ဒါပေမဲ့ အဲဒီ ၂၀၀၅ ဖေဖော်ဝါရီ တုန်းကတော့ ကျမ စဉ်းစားတာက တကယ်လို့ Brain Drain မဖြစ်လည်း အသုံးချခွင့်မရတဲ့ ဦးနှောက်တွေက Brain Dry ဖြစ်ကုန်မှာပဲ.. ဆိုတာပါ။ ဘာပဲဖြစ်ဖြစ်.. အဲလို အကြောင်းတွေကြောင့်ပဲ စစ်အစိုးရ သက်တမ်း တလျှောက်က မျိုးဆက် တွေ ခမျာ ပညာရေးပိုင်းမှာ အများကြီး ဆုံးရှုံးခဲ့ပြီ ဆိုတာပါပဲ။ ဒါကို ဘယ်သူမှ ငြင်းလို့ မရနိုင် ပါဘူး။

ဒါပေမဲ့ ကျမတွေးခဲ့တာက ပြည်ပမှာ ကျမ တခုခု ပိုလုပ်နိုင်မယ်..။ အနည်းဆုံး ကိုယ့်ပညာရပ်ပိုင်းကို ဖြည့်တင်း ခွင့်တော့ ရမှာပဲလို့ တွေးခဲ့တာပါ…။ ပြီးတော့ ကျမသားသမီးတွေကို ကိုယ့်တိုင်းပြည်မှာ တခုခု ပြန်လုပ်နိုင် လောက်အောင် သေချာတဲ့ ပညာရေးမျိုး ကောင်းကောင်း ပေးမယ်လို့လည်း မှန်းခဲ့တယ်။ ကျမစိတ်ထဲ.. အဲဒီ ၀န်းကျင်မှာ ဆက်နေရင် တော့ဖြင့် နွံနစ်သလိုရှိမှာပဲလို့ သေချာနေခဲ့တာလေ။

+++++

၂၀၀၅ခုနှစ် မတ်လမှာတော့ ထိုင်းရဲ့ နွေအပူနဲ့အတူ မေငြိမ်းအတွက် မရိုးနိုင်တဲ့ အပူတချို့က ကျမကို ဆီးကြို နေခဲ့ပါတယ်။ ပြန်စဉ်းစားကြည့်ရင် ခုချိန်ထိ စိတ်ထဲ ရှက်ရွံ့ရွံ့ ခံစားနေရတုန်းပါ။ ကျမက ကျမလို စာရေးဆရာ... တက္ကသိုလ်က ဆရာမတယောက် နယ်စပ်ကို ထွက်လာရတာကိုက ဗမာပြည်မှာ ပညာတတ်တွေရဲ့ အခြေအနေ ဘယ်လောက် ဆိုးနေပါပြီ ဆိုတာကို မီးမောင်းထိုးပြသလို ပေါ်လိုက်လေခြင်းလို့ တွေးပြီး ဆင်းရဲဒုက္ခကြုံရမှာ ကိုတောင် မေ့နေခဲ့ချိန်မှာ ကျမအပြင်ထွက်လာပြီဆိုတဲ့ သတင်းကြားကြသူ တော်တော်များများက မှတ်ချက်ချပါ တယ်.. တဲ့။ မေငြိမ်းက ဘယ်တုန်းက နိုင်ငံရေးနဲ့ ပတ်သက်ဖူးလို့ ဒီလို ထွက်လာရတာလဲ.. တဲ့။ ကျမ တခါမှ မစဉ်းစားမိဖူးတဲ့ မေးခွန်းပါပဲ။ ဒီတော့မှ ကျမ အိပ်မက်က လန့်နိုးသူလို ကိုယ့် ပစ္စုပ္ပန်ကို ပြန်ကြည့်မိတယ်။ ကိုယ့်အခြေနေကို ပြန်ကြည့်မိတယ်..။ အဲဒီအချိန်မှာတော့ ကျမက နောက်ဆုတ်လို့ မရတော့တဲ့ နေရာမှာ ရောက်နေပါပြီ။ အဲဒီတုန်းက ထိုင်းမြေကို စနင်းကတည်းက ကျမတို့ မိသားစုကြီးကို ကူခဲ့ရတဲ့ ဒေါ်ခင်မင်းဇော်တို့ တစုံနဲ့ တကွသော မိတ်ဆွေတချို့ရဲ့ အားကြောင့်သာ ကျမ ဆက်ရပ်တည်နိုင်ခဲ့တာပါ။

နောက်ထပ် ကျမတခု မှားခဲ့ဖူးပါသေးတယ်။ အဲဒါကတော့ မြန်မာပြည်ထဲက သူငယ်ချင်းတချို့က ကျမကို ကိုယ်လွတ်ရုန်းသွားတယ်.. လို့ ပြောကြတယ် ဆိုတဲ့သတင်း ကျမဆီ ရောက်လာပါတယ်။ အဲဒါကြားတော့ ကျမ တကယ် စိတ်တိုခဲ့ပါတယ်။ အဲလိုပြောတဲ့သူတွေကိုယ်တိုင်က လက်ဖက်ရည်ဆိုင် တမေ့တမောထိုင်.. ညနေတိုင်ဆို အရက်ဆိုင်ရွှေ့ပြီး ဝေဖန်ရေး လေကန်ရေး ထိုင်လုပ်နေသူတွေ.. တကယ်တမ်း လူထုအကျိုး ဆိုတာအတွက် ဘယ်လောက်မှ အနစ်နာခံ ပေးဆပ်လုပ်ကိုင်နေကြသူတွေလည်း မဟုတ်။ (တကယ်တမ်း လူထုအတွက် အနစ်နာခံပြီး လုပ်နေတယ်ဆိုတဲ့သူတွေဆိုတာက ဘယ်တော့မှ သူများကို အပြစ်မတင်.. ကျမလိုလည်း ကျောမခိုင်း.. ငါတို့ လုပ်နေတယ်လို့လည်း မကြွေးကြော် မ၀ါကြွား..။ ဘယ်သူ့ကိုမှ မမျှော်ကိုး အားမကိုးဘဲ သူတို့ ယုံကြည်ရာကိုသာ တကယ် အပင်ပန်း အဆင်းရဲခံ.. ထောင်ကျ တန်းကျခံပြီး တစိုက်မတ်မတ် လုပ်ကြသူတွေဆိုတာ ခုချိန်မှာတော့ ကျမ ကောင်းကောင်း သိနေခဲ့ပါပြီ)။

အဲဒီမှာ စိတ်တိုတိုနဲ့ ကျမ စာတပုဒ်ရေးခဲ့မိတာပါ။ မဲဆောက်က ထွက်တဲ့ စာစောင်လေးတခုမှာ ပါခဲ့ဖူးပါတယ်။ အဲဒီမှာ ကျမ ရေးခဲ့တာက “ကျမ ခါးသီးမုန်းတီးလှတဲ့ မင်းဆိုးမင်းညစ် အုပ်ချုပ်မှုအောက်မှာ မနေနိုင်လို့ ကိုယ့်လက်ကိုယ့်ခြေနဲ့ ထွက်ခဲ့တဲ့ လမ်းမှာ ဘာပဲဖြစ်ဖြစ် ကျေနပ်တယ်” ဆိုတာကိုပြောရင်း ဆော့ခရတ္တိ ပြောခဲ့ တယ်လို့ ကျမ မှတ်ထားခဲ့ဖူးတဲ့ (တချို့ကတော့ ဆော့ခရတ္တိမဟုတ်ဘူးလို့ ပြောပါတယ်) ‘လူတွေဟာ ကိုယ်နဲ့ တန်တဲ့ အစိုးရကို ရတယ်’လို့ ဆော့ခရတ္တိက ပြောပါတယ် .. အဲဒီအခါ ကျမက ကျမနဲ့ မတန်ဘူးလို့ ထင်တဲ့ အစိုးရလက်ကနေ ထွက်ခဲ့တယ်..” ဆိုတာမျိုးပါ..။ အဲဒီ စာစောင်လေးလည်း ထွက်ရော ကျမဆီ ဆဲစာတွေ ရောက်လာပါတယ်။ ဒါ ပြည်တွင်းက လူတွေကို စော်ကားတာ.. တဲ့။ အဲဒီတော့မှ သေချာပြန်တွေးကြည့်တော့ စွပ်စွဲစရာဖြစ်နေတာကို တွေ့ရပါတယ်။ တကယ်တော့ ကျမ နာကျည်းစက်ဆုပ်နေတာက ဗောင်းတော်ညိတ် စိတ်တော်သိ လုပ်နေ ကြတဲ့ အလိုတော်ရိတွေကိုပဲ မဟုတ်လား။ ပြီးတော့ ကျမ စိတ်ပျက်တဲ့ အ၀န်းအ၀ိုင်းလေး တခုကို..။ ဒါပေမဲ့ ကျမရေးတဲ့စာက တာသွားခဲ့ပြီ။

ဒီလိုနဲ့ အဲဒီ အပြင်ရောက်စကာလမှာ ကျမဟာ အထင်နဲ့အမြင် လုံးလုံးလွဲပြီး ဟိုမရောက် ဒီမရောက်နဲ့… ပူပန် တုန်လှုပ်နေခဲ့ရတာတော့ အမှန်ပါ..။ ဒါကလည်း ကျမရဲ့ စိတ်ခံစားချက် နောက်ကို လိုက်မှုရဲ့ ဆိုးကျိုးဆက်တွေပါ ပဲလေ။

ဆယ်ကျော်သက်အရွယ် လူမမည်ကလေးကတည်းက တောခိုခဲ့ပြီး ဒီဘက် တော်လှန်ရေးနယ် နယ်စပ်ထဲမှာ နှစ် ၂၀ကျော်ကြာနေနေတဲ့ မောင်လေးတယောက်က ကျမကိုပြောတဲ့ စကားလေး သတိတရ ပြောပြချင်ပါတယ်။ ကျမ ဘာလို့ ထွက်လာလဲဆိုတာကို မေးကြတဲ့အခါ ကျမက ခုအကြောင်းအရာတွေကိုပဲ ပြောပြောပြတာမို့.. သူက ပြောပါတယ်..။ လက်စသတ် တော့ ငါ့အမက တောခိုလာတာမှမဟုတ်ဘဲ.. အိမ်ပြောင်းလာတာကိုး.. တဲ့။ တကယ်လည်း သူပြောသလို ဖြစ်နေခဲ့တယ်ထင်ပါတယ်။ ကျမက နိုင်ငံအတွက်ဆိုတာက ၁၀ရာခိုင်နှုန်း.. ဒီအရပ်မှာ မနေချင်တော့ဘူးဆိုတဲ့ ကိုယ့်အတ္တအတွက် ၉၀ရာခိုင်နှုန်းနဲ့ နိုင်ငံ့အပြင်ဘက် ထွက်လာသူကိုး။

တကယ်ဆို ကျမထက်ဆိုးတဲ့ ဘ၀တွေ အများကြီး..။ ကျမထက် အန္တရာယ်ရှိသူတွေ အများကြီး.. သူတို့တွေတောင် ကြံ့ကြံ့ခံနေတာ..။ ကျမ စဉ်းစားခဲ့တာက ကျမသာ အပြင် ရောက်လို့ ပြောခွင့်တွေရရင်.. စစ်အစိုးရ လိမ်ညာနေတဲ့ ပညာရေးကိစ္စတွေနဲ့ စစ်အစိုးရ အလိုတော်ရိ ပညာရှင်တွေရဲ့ မသမာမှုတွေကို ပြောခွင့်ရမယ်..။ ပြီးတော့ ကျမက စာရေးဆရာဖြစ်တဲ့အတွက်ရော.. ကျောင်းဆရာမဖြစ်တဲ့အတွက်ရော.. နောက်.. ဘယ်တုန်း ကမှ စစ်အစိုးရ သစ္စာခံ အလိုတော်ရိ မလုပ်ခဲ့ဖူးတာကြောင့်ရော.. ကျမအတွက် ဒီဘက်ခြမ်းမှာ လုပ်စရာတွေ လုပ်နိုင်တာတွေ အများကြီး ရှိမယ်.. နေရာလေးတနေရာတော့ ရှိမယ်…လို့။ အဲလို တွေးခဲ့တာလေ..။ ပြီးတော့ ကျမ ခံစားခဲ့ရတာက စစ်အစိုးရကို မုန်းတဲ့ ခါးခါးသီးသီးအမုန်းရယ်.. အဲလို လူတွေကို ကြောက်လန့်ပြီး မလွန်ဆန်နိုင်တဲ့ ပတ်ဝန်းကျင် ထဲမှာ မနေနိုင်လောက်အောင် ပူလောင်ပြင်းပျတာရယ်.. ဒါကိုပဲ ခံစားခဲ့တာလေ။ တကယ်မှာလည်း ကျမက ဘယ်တုန်းကမှ နိုင်ငံရေးလို့ ခေါင်းစဉ်တပ်နိုင်တဲ့ လောကထဲ မကျင်လည်ခဲ့ဖူး။ တခါတရံမှလည်း လူထုအတွက် ထောင်ကျတန်းကျနဲ့ အနစ်နာမခံခဲ့ဖူးလေတော့ ကျမ ထွက်လာတဲ့ ကိစ္စမှာလည်း နိုင်ငံရေးဆိုတဲ့ကဏ္ဍကို မတွေးမိခဲ့ပါဘူး။ အဲသလိုပဲ နိုင်ငံရေးကိုပြပြီး လုပ်စားလို့ ရတယ်ရယ်လို့လည်း မသိခဲ့ပါဘူး။

ဒါပေမဲ့ တမိသားနဲ့ တမိသား ပေါင်းသင်းကြရသူတွေလို ဒီဘက်လောက က ကျမကို စူးစမ်း.. ကျမကလည်း သူတို့ကို အကဲခတ်နဲ့။ အိမ်ထောင်ဦးကာလ အဆင်မပြေကြတတ်ကြသလို အခက်အခဲလေးတွေ အလွဲလေး တွေတော့ ရှိသပေါ့..။ နောက်တော့ ကျမရဲ့ ရန်ကုန် တက္ကသိုလ်မှာ ကဗျာစာအုပ်တွေထုတ်စဉ်က တူတူ ရေးဖက်ဖြစ်ဖူးပြီး ၈၈ စက်တင်ဘာ အာဏာသိမ်းကတည်းက တော်လှန်ရေးနယ်ထဲ ခြေစုံပစ်ဝင်ခဲ့တဲ့ မိဆူးပွင့်(အစောပိုင်း မြသီလာတွေမှာ ရေးခဲ့ဖူးပါတယ်)တို့ Burmese Women’s Union က လှမ်းခေါ်ပေးလို့ ဇင်းမယ်ကို ခြေချခဲ့ရတာ.. မတ်လ ၃၀ရက်နေ့ပေါ့။ အဲဒီ ၂၀၀၅ မတ်လ ၃၀ရက်နေ့ကနေ ၂၀၀၈ ဒီဇင်ဘာလ ၂၅ရက်နေ့ထိ နေခဲ့ရတဲ့ ဇင်းမယ်ဟာ… ဘာပဲဖြစ်ဖြစ်.. ကျမကို နွေးနွေးထွေးထွေး ကြိုဆို ပွေ့ဖက်ခဲ့ပါတယ်။

+++++

ဇင်းမယ်ရဲ့ နွေမှာ ကျမတို့ မိသားစုဟာ အရာရာကို အသစ်က စကြရပါတော့တယ်။ ပတ်ဝန်းကျင်သစ်.. ဆက်ဆံရေးနယ်ပယ် အသစ်.. ဘာသာစကား အသစ်.. သင်ယူ လေ့လာ စရာ အသစ်တွေကလည်း အများကြီးပေါ့..။ ။ အဲဒီ အချိန်တွေမှာလည်း ကျမ စိတ်ဓာတ်တွေ လဲပြိုခဲ့တာ မကြာခဏ..။ ဒီဘက် အ၀န်းအ၀ိုင်းထဲ ရောက်စ… ကျမက နှစ် ၂၀နီးပါး ကျောင်းဆရာမ လုပ်ခဲ့တဲ့ အတွေ့အကြုံနဲ့ ဒီဘက်က ပညာရေးဆိုင်ရာ ဏ္ဍလှုပ်ရှားမှုတွေထဲ သေသေချာချာ ၀င်လုပ်ပေးချင်တာ..။ ဒီဘက်မှာလည်း အဲလို ပညာရေး အဖွဲ့အစည်းကြီး ရှိနေတာဆိုတော့..။ ဒါပေမဲ့ … ကျမမှာ ဘာနိုင်ငံရေး ကျောထောက်နောက်ခံမှ မရှိ.. နောက် အင်္ဂလိပ်လို မပြောနိုင်လို့တဲ့…။ ဒါနဲ့ပဲ ကိုယ်တတ်တဲ့ ပညာရေးလည်း လုပ်ခွင့် မရခဲ့ပါ။ (အင်္ဂလိပ်လို တတ်ဖို့ လိုတယ်ဆိုတာကို ကျမ အသေအချာ လက်ခံပါတယ်.. ဒါပေမဲ့ ပညာရေးအကြောင်း ကောင်းကောင်း သိတဲ့သူကို တွဲလုပ်ဖို့ ခေါ်သင့်တယ်လို့လည်း ထင်တာပဲ… ဒါပေမဲ့ အဲဒီမှာက ပညာရေးအကြောင်း သိတာထက် နိုင်ငံရေး အဖွဲ့တခုခုက ဖြစ်ဖို့နဲ့ အင်္ဂလိပ်လို ပြောနိုင်ဖို့က ပိုအရေးကြီးခဲ့ပါတယ် :P) ။ (ဒါပေမဲ့ နောက်ပိုင်းမှာတော့ ဆရာ ဒေါက်တာသိန်းလွင်တို့ ပညာရေးသမား ဆရာ ဆရာမတွေနဲ့အတူ ပညာရေးပိုင်းကို ကိုယ်နိုင်သလောက်လေး ကူနိုင်ခဲ့ တာလေးတွေနဲ့ ထိုင်းတောင်ပိုင်း ဆူနာမီဒေသက ကိုထူးချစ်တို့ GHRE ရဲ့ မြန်မာကျောင်းတွေကို ကူခွင့်ရခဲ့တာတွေကတော့ စိတ်ချမ်းသာစရာ ဖြစ်ခဲ့ပါတယ်) ။

ဇင်းမယ်ကို ရောက်ပြီး သိပ်မကြာခင် ကျမရဲ့ စာရေးဆရာအဖြစ် အလုပ်တခု စလုပ်ရပါတယ်။ အဲဒီအလုပ်က အိမ်ကနေ စာထိုင်ရေးပြီး တပတ်မှာ ၂ရက်လောက် ရုံးသွားရပါတယ်။ ကံကောင်းသလား ကံဆိုးသလားတော့ မသိပါဘူး.. ကျမ သွားရတဲ့ ရုံးခန်းက ဇင်းမယ် တက္ကသိုလ်ထဲမှာပါ..။ ဇင်းမယ်တက္ကသိုလ်ရဲ့ အဓိပတိ လမ်းမကြီးကနေ ဖဲ့ဝင်ရတဲ့ လမ်းသွယ်လေးမှာ ကျမ သွားရတဲ့ ရုံးခန်းလေးရှိပါတယ်။ သစ်ပင်ပန်းပင်တွေနဲ့ ဖွဲ့စည်းထားတဲ့ အ၀န်းအ၀ိုင်းက ရန်ကုန်တက္ကသိုလ်နဲ့ တူလှတဲ့ ဇင်းမယ်တက္ကသိုလ်က ကျမကို အမြဲ လွမ်းအောင် လုပ်နိုင်ခဲ့ပါတယ်။ ဇင်းမယ်တက္ကသိုလ်ကတော့ အလှအပ အမွမ်းအမံနဲ့ ပြင်ဆင် ထားလို့ ပို ကြည့်ကောင်းပေမဲ့ ကျမကတော့ မပြည့်မစုံနဲ့ပဲ ပျော်စရာကောင်းတဲ့ သာယာတဲ့ ကျမရဲ့ ရန်ကုန်တက္ကသိုလ်ကိုပဲ လွမ်းရတာပါပဲ။ နောက်တခု စိတ်ထိခိုက်ရတာကတော့ ဇင်းမယ်တက္ကသိုလ်က ကျောင်းသူကျောင်းသားတွေရဲ့ လွတ်လပ် အေးချမ်းမှု.. အဆင့်မြင့် ပညာရေးကို သင်ခွင့်ရမှု.. ကျောင်းသားအခွင့်အရေးနဲ့ တက္ကသိုလ်ရဲ့ အရသာတွေကို အပြည့်အ၀ ခံစားခွင့်ရနေမှုတွေက ချို့တဲ့ရရှာတဲ့ မြန်မာပြည် တက္ကသိုလ် ပညာရေးထဲက ဘ၀တွေကို နှိုင်းယှဉ်သတိရမိတာကြောင့်ပါပဲ။ အဲဒီတုန်းက ခံစားချက်ကို လွမ်းတတ်သူဆိုပြီး ကျမ ၀တ္ထုလေးတပုဒ် ရေးဖူးပါတယ်။ ဒီမှာ ပါ..။

+++++

ပြန်လှည့်ကြည့်တော့ ဇင်းမယ်မှာ နေခဲ့ရတဲ့ ၄နှစ်နီးပါးကတော့ ကျမအတွက် တကယ် စိတ်အေးလက်အေးနဲ့ သာတောင့်သာယာရှိတဲ့ အချိန်တွေပါပဲ..။ ကျမ လုပ်ချင်တဲ့ ပညာရေးအလုပ်နဲ့ စာရေးတဲ့အလုပ်ကို အေးအေးချမ်းချမ်း လုပ်ခဲ့ရတာမို့ ကျမစိတ်ထဲ ကျေနပ် မိပါတယ်။ ကျမစိတ်ထဲ ဇင်းမယ်မှာပဲ တသက်လုံး နေတော့မယ်လို့တောင် တွေးထားခဲ့တာပါ။ ဇင်းမယ် မှာက စေတီဘုရား ဘုန်းကြီးကျောင်းတွေ အများကြီး…။ မြန်မာနိုင်ငံသားတွေ လက်ညှိုးထိုး မလွဲ..။ မြန်မာစားစရာကအစ မြန်မာအငွေ့အသက်တွေ နေရာအနှံ့..။ ပြီးတော့ တန်ဆောင်တိုင် လွိုင်ကထုံပွဲတော်နဲ့ သင်္ကြန်…။

(နာမည်ကျော် လွိုင်ကထုံမှာ)

ဇင်းမယ်မှာ နေဖူးသူတိုင်း ဇင်းမယ်ကို မငြိတွယ်သူ မရှိနိုင်ပါ..။ ရှမ်းပြည်မှာ နေခဲ့ဖူးတဲ့ ကျမအတွက်တော့ ဇင်းမယ်မှာ ဆောင်းတွင်း ဆိုရင်… တောင်ကြီးရောက်နေသလိုလို… မေမြို့ ရောက်နေသလိုလို.. နွေ ဆိုရင်တော့ မန်းလေးမှာပဲ ရောက်နေသလိုလို..။ ကျမအနားမှာလည်း မောင်လေး ညီမလေးတွေ ချစ်ရတဲ့ သူတွေနဲ့..။ အဲဒီအခါ ဇင်းမယ်ဟာ.. ကျမရဲ့ ဒုတိယအိမ်ပါပဲ..။

သောကြာနေ့မနက်ဆို တပတ်လုံးမှ အဲဒီတရက်သာ ရှိတဲ့ သောကြာဈေးလို့ ကျမတိ်ု့ အလွယ်ခေါ်တဲ့ ဈေးလေး ဆီကို ရောက်အောင် သွားမြဲ..။

(သောကြာဈေး)

အဲဒီမှာ တို့ဟူးနွေးစားမယ်.. ခေါပုပ်ကင် စားမယ်.. မြန်မာနိုင်ငံမှာတောင်မှ ရှမ်းပြည်ဘက်မှာပဲ ရနိုင်တဲ့ ဟင်းသီးဟင်းရွက်တွေ အဲဒီ ဈေးမှာ ရမယ်..။ မြန်မာပြည်က ပစ္စည်း တိုလီမိုလီတွေ.. လက်ဖက်… အကြော်စုံ… ပဲကြော်မျိုးစုံ…။ ရှမ်းစကားသံ ၀ဲဝဲလေးတွေ ကြားရတဲ့ တကယ့် ရှမ်းပြည်က ဈေးကလေးလို..။ စမူဆာ တို့ဟူးကြော် ပူပူနွေးနွေးနဲ့ ကုလားကြီးလက်ဖက်ရည်နဲ့ မနက်စာက အလွန် အဆင်ပြေ..။

စနေဆိုရင်တော့ ကျမတို့ နီးစပ်ရာစုပြီး အဆင်ပြေတဲ့ နေရာမှာ တခုခု လုပ်စားမြဲ..။ ကျမက အိုးသူကြီးပေါ့..။ အများဆုံး ဆုံရပ်ကတော့ ကျမရဲ့ မောင်လေးတွေလို ဖြစ်နေတဲ့ ကလေးတွေရှိရာ ဗကသရုံးပေါ့။

(ဗကသရုံးမှာ မန်းလေးထမင်းသုပ် လုပ်စားတဲ့ နေ့)

တနင်္ဂနွေဆိုရင်တော့ မိသားစုအတွက် စပယ်ရှယ် ဒေးပေါ့။ အိမ်နဲ့နီးတဲ့ ကစားကွင်းဆီ ဖြစ်ဖြစ်.. ကန်တော်ကြီးဆီကိုဖြစ်ဖြစ် မိသားတစု သူငယ်ချင်းတချို့နဲ့ ခဏခဏ သွားဖြစ်..


(၀စ်သင်းတောက် လို့ ခေါ်ကြတဲ့ ကန်တော်ကြီးမှာ)
တခါတလေ.. ရေတံခွန်..

(သွားနေကျ ရေတံခွန်)

တခါတလေ ရေပူစမ်း.. တခါတလေ.. တောင်ပေါ် ဒွိုင်ဆူထစ် ဘုရားဖူး…။

(ဒွိုင်ဆူထစ်တောင်တက်လှေကား)

(ဒွိုင်ဆူထစ်တောင်ပေါ်ကနေ မြင်နေရတဲ့ ညနေခင်းထဲက ဇင်းမယ်)

ထိုင်းမှာ နေခဲ့တဲ့ ၄နှစ်အတွင်း လေးငါးခေါက်ရောက်တာက ထိုင်းတောင်ပိုင်း ဖူးကက်ကမ်းခြေက ရွာကလေး တွေဆီ…။ အဲဒီမှာ မြန်မာပြည်တောင်ပိုင်းသားတွေနဲ့ အနောက်ပိုင်းသားတွေ အစုလိုက်အပြုံလိုက် တွေ့နိုင်တယ်။ ကျမတော့ ဖူးကက်ရောက်ရင် တနင်္သာရီပဲ ရောက်သွားသလိုလို.. မွန်ပြည် ရခိုင်ပြည်တွေပဲ ရောက်သွားသလိုလို ခံစားရပါတယ်။ အဲဒီ ဖူးကက်မှာ ကျမကို အမြဲ နွေးနွေးထွေးထွေး ခံစားရစေတဲ့ GHRE (Grassroots Human Rights and Development) အဖွဲ့သားတွေ ရှိတယ်။ ဆူနာမီငလျှင်ကနေ ပြန်ရုန်းထခဲ့ရတဲ့ မြန်မာ မိသားစုတွေရဲ့ ကလေးငယ်တွေအတွက် အဲဒီအဖွဲ့က ဖွင့်ထားတဲ့ စာသင်ကျောင်းတွေ အရည်အချင်းမြှင့် သင်တန်းတွေ ရှိတယ်။ အဲဒီ စာသင်ကျောင်းတွေထဲမှာ ကလေးတွေအပေါ် စေတနာထားလှပြီး စာသင်တာလည်း တကယ်ကောင်းတဲ့ ဆရာ ဆရာမတွေ ရှိတယ်။ ချစ်စရာကောင်းတဲ့ ကြိုးစားတဲ့ ကလေးတွေလည်း ရှိတယ်။ ကျမကတော့ အဲဒီ ကျောင်းတွေ အတွက် ပညာရေးဆိုင်ရာ.. အထူးသဖြင့်တော့ မြန်မာစာနဲ့ ပတ်သက်ပြီး လိုတာလေးတွေ ကူဖို့ ဆိုပြီး သွားရင်း တကယ်တော့ ကိုယ်သိတာလေးတွေကို ဝေမျှတာက နည်းနည်း။ သူတို့ဆီက ဘ၀တွေကို စာပြန်ရေးဖို့ ယူခဲ့ရတာက အများသား..။ ခုနေခါမှာတော့ တော်တော် များများကို ကျမ မေ့ထားချင်ပါတယ်..။ တကယ်တမ်းကျတော့ ကျမက ဘာတခုမှ ထိထိ ရောက်ရောက် တကူးတက လုပ်ပေးနိုင် ခဲ့သူ မဟုတ်..။

တချို့က ကျမကို လေးစားပါတယ်တွေ… ချီးကျူးပါတယ်တွေ… ပြောလာရင်တော့ ကျမက မျက်နှာပူနေတတ် ပါတယ်..။ ကျမက တိုင်းပြည်နဲ့ လူထုအတွက် ဘာတခုမှ အနစ်နာခံ မလုပ်ဖူးသလို တိုင်းပြည်နဲ့ လူထုကို ဘယ်တုန်းကမျှ အလွဲသုံးစားမလုပ်ခဲ့ဘူးဆိုတာလေးကြောင့်တော့ ဂုဏ်မယူချင်ပါ..။ ကျမက လူတဦး တယောက်မှ အစ ကမ္ဘာမြေကြီးအပေါ်အထိ ကျမရဲ့ ၀န် ပိမှာကို စိုးရိမ်ပါတယ်..။ ဒါလောက်ပါပဲ..။ အဲဒီအခါ ရောက်လေရာမှာ ကိုယ်ကျင်လည်ရာ ၀န်းကျင်လေးအပေါ်သာ တတ်နိုင်သလောက် တာဝန်ကျေအောင်တော့ လုပ်ဖြစ်ပါတော့တယ်..။ ဒီလိုနဲ့ ဇင်းမယ်မှာ ကျမဟာ တကယ့်ကို စိတ်အေးလက်အေးဆန်ဆန်နေခဲ့တာ.. ၄နှစ်နီးပါး..။ ဇင်းမယ်မှာ ကျမ စိတ်ဆင်းရဲစရာ.. ထိတ်လန့် ကြောက်ရွံ့စရာ အိပ်မက်ဆိုးနဲ့ ကြုံခဲ့ရမယ်လို့လည်း နည်းနည်းမှ မထင်ခဲ့တာပါ..။ ဒါပေမဲ့.. အသစ်တခုဆိုတာက ကျမကို ဘယ်တော့မှာ ချောချောမွေ့မွေ့ မကြိုဆိုခဲ့ပါ…..။

+++++

(တကယ်တော့ ကျမ ဆက်မရေးချင်တော့ပါ… အဖြစ်အပျက်တွေက ပြန်မတွေးချင်တော့တာတွေ…. များ များ လာနေပြီ….။ ဒါ့ကြောင့် မြသီလာကို အပိုင်း(၄၀)ပြီးရင် ရပ်ပါတော့မယ်…)


Apr 10, 2009

ပိတောက်တွေ မျောနေတဲ့ အလွမ်း


လောလောဆယ်မှာတော့ ...
ပိတောက်ပန်းတွေက အစ.. လွမ်းနေတာပါ..
နက်ဖန်တော့ ပိတောက်ရယ်.. သင်္ကြန်ရယ်.. ဗမာပြည်ရယ်.. မော်လမြိုင်ရယ်.. ဇင်းမယ်ရယ်ကို လွမ်းတဲ့ အလွမ်းလေး တင်ဦးမှပါ...
ခုတော့ ကိုယ့်ဘာသာ ပြန်လွမ်းတဲ့ တခါက လွမ်းစရာကောင်းခဲ့တဲ့ သင်္ကြန်တခုအကြောင်းရေးခဲ့တဲ့ ၀တ္ထုလေး ပြန်တင်ပေးချင်လို့ပါ...

ပိတောက်တွေ မျောနေတဲ့အလွမ်း


ကျမအတွက်တော့ ၂၀၀၄-ခုနှစ်မှာ သင်္ကြန် မကျပါ။
ပိတောက်ပန်းတွေလည်း မပွင့်။ ချစ်သော ပင်လယ် ကမ်းခြေများကလည်း ဟိုးဝေးဝေး နယ်နိမိတ်စွန်းတွေဆီ ရောက်နေကြလိမ့်မည်။ ခုချိန်မှာ…“ပိတောက်တွေ ရွှေရည်လူးခဲ့ပေါ့လေ.. ပုလဲငုံ စပယ်ဖြူ ဖူးခိုက် ဝေေ၀ ပန်းမျိုးစုံ ရာသီကုန် ကူးခဲ့ပေါ့လေ.. ချစ်သူကို ရည်စူး ခူးတဲ့လို့ ချွေ… ကိုယ်တိုင် လှရာရာ ရွေးလို့ ဆင်မပေးရ ဆံမြ ညှာကေ”ဆိုတဲ့ သီချင်းတစ်စကိုလည်း မေ့ထားရမည်။ ပြီးလျှင် ဇော်ဇော်အောင်ရဲ့ “ပင်လယ်ထဲက ညသည် ပိတောက်ပန်း ဖြစ်၏”ဆိုတဲ့ ၀တ္ထုတိုရယ်၊ ကိုယ်တိုင်ပဲ ရေးခဲ့လျက်နဲ့ “အချစ်အကြောင်း ပြောရအောင်” လုံးချင်း ၀တ္ထုရယ်ကိုလည်း စာအုပ်စင်ရဲ့ ဟိုး နောက်ဘက်ဆုံးဆီ ထိုးထည့် သိမ်းထားလိုက်ရမည်။

ခုအခါမှာ… အချိန်ရာသီမှန်မှန် ဆိုက်ကပ်နေကျ ရထားတွဲဟာ သူဆိုက်ကပ်နေကျ ပိတောက်တွေ ဝေနေတဲ့ ပင်လယ်ကမ်းခြေ ဘူတာ တခုခုဆီကို ရောက်မလာနိုင်သေးတာ သေချာနေမှတော့လေကွယ်။ ဒါဖြင့်.. လှိုင်းခေါင်းဖြူတွေ တ၀ုန်းဝုန်းနဲ့ အဲသည် ဘူတာလေးတွေကရော.. သူတို့ဆီ ရယ်မောပျော်ရွှင်သံတွေ ဝေေ၀ စည်စည်နဲ့ ရောက် ရောက် လာနေကျ ရထားတွဲလေးကို မျှော်နေမှာလား… သတိရနေမလား ဟင်… ဘယ်လောက် လွမ်းစရာကောင်းလိုက်သလဲ မောင်ရေ…

ပိတောက်ပန်းတို့ တည့်တည့် ပွင့်သော နွေလယ်ရဲ့ သင်္ကြန်တတွင်းမှာပဲ ရထားတွဲလေး တစ်တွဲရဲ့ သမိုင်း စ ခဲ့တာ ပါ။ အဲဒီ့ သမိုင်းထဲမှာ ပင်လယ်ကမ်းခြေဟာလည်း အရေးပါတဲ့ စာမျက်နှာ ဖြစ်ခဲ့ရဲ့။ အဲဒီ သမိုင်းဟာ သန်မာတဲ့ လက်ဖ၀ါးတစ်ခု။ တွဲအိမ်ငါးခုပါတဲ့ ရထားတွဲနှင့်လည်း တူပါသေးသည်။ မောင်က မိသားစုကို လက်ငါးချောင်း ပြည့်စေချင်တာတဲ့။ သားကြီးရယ်၊ သမီးလေးရယ်၊ ခုတော့ သားငယ် ထွေးလေးရယ်.. အဖေနဲ့အမေရယ် ပေါင်း တော့ ငါးချောင်းပြည့်ပြီပေါ့တဲ့။ လက်ငါးချောင်းလည်းစုံရော.. အဲဒီလက်ဖ၀ါးရဲ့ ခွန်အားအတွက်တဲ့။ ရထား ခေါင်းတွဲကြီးခမျာ.. တပြည်တရွာ ဟိုးအဝေးကြီးကို ထီးတည်း ခုတ်မောင်းသွားရရှာရဲ့။ အနာဂတ်အတွက် တဲ့ လေ..။ ဘယ်လောက် နာကျင်စရာကောင်းလိုက်တဲ့ ဘ၀လဲ။ ခွန်အားတွေ.. လောင်စာတွေအပြည့်နဲ့ ပြန်လာခဲ့မှာ တဲ့။ ပြီးရင်.. နေရောင်ခြည်တွေ လင်းသစ်ရာဆီ တွဲအိမ်ငါးလုံး အတူ ချိတ်ဆက်ပြီး ခုတ်မောင်းကြမယ် တဲ့။

အင်မတန်ချိုမြိန်တဲ့ မောင့်ရဲ့အိပ်မက်ထဲမှာ ရောင့်ရဲခြင်းနဲ့ ပြည့်စုံပျော်ရွှင်ရသော မိသားစုဘ၀လေးက သိပ်ကို လင်းပြက် တောက်ပတယ်။ ဒါနဲ့ပဲ ခု ခဏ ခွဲရတာ…။ သုံးနှစ်ဆိုတာ သိပ်ကို ချစ်ခင် နွေးထွေးတဲ့ မိသားစု အတွက်တော့ သိပ်ဆွေးမြေ့စရာကောင်းတဲ့ သုံးကမ္ဘာစာ လိုပါပဲ။ ဒါပေမယ့်.. ကျမတို့နှစ်ယောက် အတူ ပျိုးခဲ့တဲ့ ပန်းပင်ကလေးသုံးပင် တက်ညီလက်ညီ သန်စွမ်း ပွင့်ဝေလာဖို့အတွက် ဆိုရင်တော့.. အဲသည် သုံးကမ္ဘာစာကို ကျမတို့ အားခဲ ဖြတ်ကျော်ရမှာပေါ့နော်။

ဒီနွေမှာ ကျမနဲ့ မောင်တို့ အတူ လက်တွဲ ကျော်ဖြတ်ခဲ့တာ ရှစ်နွေ တိုင်ခဲ့ပြီ။ အဲသည့် ရှစ်နွေကို ကျမ တစ်ခါမှ အလွမ်းနှင့် သောကနှင့် မဖြတ်သန်းခဲ့ရဖူးပါ။ မောင်က ကျမ သောက ခံစားရမှာကို အလွန် ပူပန်သူ။ စိတ်ကူး အင်မတန် ယဉ်တတ်သော ကျမရဲ့.. သင်္ကြန်နွေကို ပင်လယ်ကမ်းခြေတွေမှာသာ ကုန်လွန်စေလိုသော ဆန္ဒကို သူ အမြဲ ဖြည့်ဆည်းပေးနေကျ…။

ထိုအခါ…ကျမက ၂၀၀၄-ခုနှစ်မှာ နွေလယ်တန်ခူးရဲ့ ပွဲတော်ဆိုတာကို မသိချင်တော့ပါ။ အင်မတန်ပူသော တန်ခူးနွေကို သည်တစ်ကြိမ်မှာ ကျမ ဘယ်လို စိတ်အေးချမ်းခြင်းမျိုးနှင့် ဖြတ်ကျော်ရမှာလဲ…။ လွန်ခဲ့သော နွေ က ဖြင့် ကျမကို စိတ်အေးချမ်းခြင်းနှင့်သာ ပြီးပြည့်စုံစေခဲ့ပါသည်။

+++++

အထူးသဖြင့် နွေပူပူတွေရဲ့ အားလပ်ရက်တွေမှာ အဲသည် ရထားတစ်တွဲက သူတို့ အိမ်ခန်း ကျဉ်းကျဉ်းလေးထဲ လုံးထွေး ပျော်မြူးလို့သာ နေနေကြတာ။ ရယ်သံတွေ… စိတ်ကောက်ငိုသံတွေ… စည်ဝေလို့..။ သားရယ်၊ သမီးရယ်၊ အဖေရယ်၊ အမေရယ်ဆိုတဲ့ အသိဟာ သိပ်ကို ချိုမြိန်လှပါသည်။ လူ့ဘ၀ရဲ့ ပြည့်စုံတဲ့ အပျော်ဆိုတာ သာယာတဲ့ မိသားစုဘ၀ထဲမှာပဲ ရှိတယ်လို့ မောင်က ယုံသည်။ ဒါကို ကျမလည်း ယုံသည်။ သားသမီးတွေလည်း ယုံစေရမည်။ ထိုယုံကြည်ရခြင်းက ရင်ထဲမှာ အေးမြလှသည်။ လက်တွေ့ဘ၀ထဲမှာ ဘယ်လောက်မှ အခက်အခဲ မကြုံရလျှင် တော့ မိသားစု နည်းနည်းလေးမှ အဝေးမခံဘဲ နေသွားချင်ခဲ့တာပါ။

အဲသည်တုန်းကတော့ ၀န်းကျင်ထဲက နွေအပူအောက်မှာ ကျမတို့ရဲ့ အိမ်ခန်းကလေးကဖြင့် ပြတင်းပေါက်မှာ နွယ်ကျနေသော ဆင်ဂမုန်းအစိမ်းက အစ အေးရိပ်ဆင်သည်။ အဲသည်မှာ… အိမ်အ၀င်ဝက ခန်းဆီး အပျော့ လေး လေအတိုက်မှာ လွင့်သည်ကပင် အေးလို့…။ သားအဖတတွေ ပူးပေါင်းပြီး ကျမ စိတ်တိုအောင် စကြသည် ကပင် အဲသည် အေးရိပ်တွေနဲ့ ဟာမိုနီဖြစ်လှ၏။


ဘယ်သူ ဘာပြောပြော… ကျမတို့အတွက်တော့ အဲသည် သစ်ပင်အုပ်တွေကြားက ကိုယ်ပိုင်မဟုတ်သော ပေ၂၀ ပတ်လည် အိမ်ခန်းကလေးမှာ သိပ်ကို ကြီးကျယ် ခမ်းနားခဲ့ပါသည်။

+++++

နောက်ထပ် သေချာတာတစ်ခုကတော့ ခုလို ကျမ လွမ်းနေချိန်မှာ မောင်လည်း ကျမလို လွမ်းနေချိန်မှာ မောင်လည်း ကျမလို လွမ်းနေလိမ့်မည် ဆိုတာပါပဲ။ ကျမ ယုံကြည်သည်၊ ခုထိ… ဆယ်စုနှစ်တစ်စုနီးပါး ခရီးမှာ ကျမနှင့် မောင် တစ်ကြိမ်တစ်ခါမှ အကြီးအကျယ် သဘောကွဲလွဲခြင်းမျိုး မရှိဖူးခဲ့။ ကျမတို့နှစ်ယောက်ကြားမှာ ရှိသောကြိုးက အပြန်အလှန် ငဲ့ညှာမှုပဲဖြစ်သည်။ အဲသည်ကြိုးက အံ့သြစရာ ကောင်းလောက်အောင် တင်းမာသည်။ ခိုင်ခံ့ဖို့ကိုတော့ ကျမတို့နှစ်ယောက် စိတ်ရှည်ရှည်နှင့် ကြိုးစား ထ်ိန်းသိမ်းကြရမှာပေါ့။ နောက်တစ်ခု မောင်နှင့် ကျမ၏ တူညီတာတစ်ခုက ကျမတို့နှစ်ယောက် ဆုံဆည်းရခြင်းအတွက် အပြန်အလှန် ကျေးဇူးတင်နေမိခြင်းပင် ဖြစ်သည်။ အထူးသဖြင့် လင်ယောက်ျား အပေါ် စွာလောင်လောင် တုံ့ပြန်တတ်သော ၊ ပွစိပွစိလုပ်တတ်သော မိန်းမတစ်ယောက်မဟုတ်သည့်အတွက် မောင်က ကျမကို ကျေးဇူးတင်သလို.. ဇနီးမယားကို ဆဲရေး တိုင်းထွာ မလုပ်တတ်သော၊ အကြမ်းမဖက်တတ်သော.. စိတ်ရှည်သော မောင့်ကိုလည်း ကျမက အမြဲ ကျေးဇူးတင်ရပါသည်။(အဲသည်လို မိသားစုမျိုးကျကာမှ ခွဲရလေတယ်)။ ၀မ်းရေးအတွက်.. တဲ့။ လွမ်းရေးထက် ၀မ်းရေးခက်ခဲ့ပြီ။

ကျမက မကြာခဏဆိုသလို “ခုနေ မောင် ကိုယ့်ကို ထားသွားရင်တောင် ရပြီ။ မောင့်ကျေးဇူးတွေ ကိုယ့် အပေါ်မှာ ခုဆို သိပ်များနေပြီ” လို့ ပြောမိတတ်သည်။ အဲသည်အခါဆို… မောင်က ခပ်တည်တည်ဖြင့် ကျမကို စိုက်ကြည့်တတ်သည်။ ဘာမှလည်း ပြန်မပြော။ အံ့သြစရာကောင်းတာက အဲသလို ဘယ်တော့မှ တစုံတရာ ပြန် မဖြေရှင်းသည့် ခင်ပွန်းကို.. သူ့မျက်လုံးတွေအောက်မှာ နေနေရရုံသက်သက်ဖြင့် ကျမက အရာရာကို ယုံကြည်ခြင်းပင်။ အဲသည် ယုံကြည်ရခြင်းလေးက ကြာရှည်မခံဘူးဆိုလျှင်တောင်မှပဲ ကျမ ကျေနပ်နိုင်ပါသည်။

မောင်နှင့်ဘ၀မှာ ခုလောက်ဆယ်နှစ်တာ ပြည့်စုံသော စိတ်ချမ်းသာခြင်းရခဲ့ဖူးခြင်းက ကျမအတွက်တော့ တစ်ဘ၀စာ တန်ပါပြီ။ အဲသည်အသိနှင့်ပင်… ကျမဘ၀မှာ လုံခြုံပြီ… စိတ်မှာ အင်အားတွေရှိပြီ။ ဒါပေမယ့် မောင်… ယုံကြည်ခြင်းနှင့် လွမ်းဆွတ်ခြင်းကတော့ဖြင့် သီးခြားစီသာ ဖြစ်သည်။ မတတ်သာလွန်းလို့ ခွဲနေကြ ရတဲ့ အချိန်တွေထဲမှာ ကျမ မောင့်ကို မပျော်တတ်တော့လောက်အောင် လွမ်းဆွတ်ပါသည်။

+++++

တကယ်တော့ လွမ်းတယ်ဆိုသော စကားကိုပင် ပေါ့တန်လှသည်ဟု ထင်သည်။ “သူများပျော်လို့ မပျော်နိုင်၊ ရည်းစားပျောက်လို့ မှိုင်”ဆိုသော သင်္ကြန်သံချပ်ကလေးက ခုနွေမှာတော့ ကျမကို မြားတစ်စင်းလို အသေအချာ ထိမှန်လိမ့်မည်။ အဲသည်အခါ အရင်ကလို ပြုံးနိုင်ပါ့မလား။ အနားမှာ မောင်အတူမရှိတဲ့ သင်္ကြန်မှာ ကျမ ပြုံးရယ် နိုင်ဖို့ မလွယ်ပါ။ မိသားစုနဲ့ ဝေးဝေးမှာ (အလုပ်ခွင်ထဲ ရောက်နေချိန်လည်း ဖြစ်နိုင်ပါသည်) မောင်တစ်ယောက် တည်း ရှိနေခိုက် မိသားစုကြီးရဲ့ ဘ၀ရပ်တည်ရေးအတွက် တပြည်ခြားမှာ ပင်ပင်ပန်းပန်း နေနေရခိုက်မှာ ကျမ မပျော်ရက်ပါ ။ ကျမအတွက်တော့ အချစ်ဆိုတာ ကိုယ်ချင်းစာ ငဲ့ညှာမှုတစ်မျိုးလည်း ဖြစ်သည်။

+++++

သင်္ကြန်အကြိုဆိုရင်… ကျမတို့ နေခဲ့သော မြို့ကလေးမှာ အမြဲလို… ပိတောက်တွေ အချိန်ကိုက် ဖူးတတ်သည်။ ကျမတို့နေသော ပန်းစုံတောအုပ်ကလေးမှာလည်း သင်္ကြန်ပန်းရနံ့တွေ သင်းပျံ့လာမြဲ။ အဲဒီအချိန်ဆို ကျမတို့ ရထားတွဲလေးဟာ လှုပ်နှိုးခံလိုက်ရသလို မြို့ကလေးရဲ့ အနီးဆုံး ပင်လယ်ဆီ ဦးတည် ခုတ်မောင်းတော့သည်။ သားကြီး နဲ့ သမီးက စင်ရော်လေးတွေလို ပင်လယ်လှိုင်းတွေဆီမှာ ပျော်သည်။ ပင်လယ်ရေဟာ ပက်လို့မကုန်တဲ့ သင်္ကြန်ရေပဲ..။

(ဒီက ပန်းချီ)

ပင်လယ်ရဲ့ မနက်ခင်းမှာဆို ပိတောက်ကြွေတွေကလည်း လှိုင်းတွေစီးလို့၊ နေရောင်ခြည်က ပိတောက်ပွင့်တွေကို ရွှေရောင် ပိုရင့်စေပြီး လှိုင်းတွေကိုကျတော့ သက်တံ့ရောင် ဆိုးသည်။ အဲသည် မြင်ကွင်းတွေဟာ ကျမတို့အတွက်တော့ ဘယ်တော့မှ ငြီးငွေ့စရာ မကောင်း။ ပိတောက်တွေကို မောင်ကိုယ်တိုင် အပင်ပေါ် တက်ခူးပြီး အခန်းလေးထဲ ဝေနေအောင် ထားပေးလျှင် အဲသည် ပိတောက်တွေကမှ အမွှေးဆုံး ဖြစ်သည်။ ရင်ထဲထိ အေးစေတဲ့ မွှေးရနံ့ဟာ သိပ်လည်း လတ်ဆတ်သည်။ တကယ်တော့ အဲဒါဟာ နှစ်စဉ် မောင် ပေးနေကျ မေတ္တာတွေပဲ မဟုတ်လားကွယ်။ ထိုအခါ တစ်နှစ်မှ မပျက်ကွက်ဖူးသော ပိတောက်ဦးတွေကပင်လျှင် မောင့်ကို လွမ်းချင် လွမ်းနေနိုင်ပါ သေးသည်။

+++++

လူတွေက ပျော်လို့။ ညံလို့၊ သွက်လို့၊ သင်္ကြန် ကျပြီတဲ့။ သားကြီးက “ရေပက်မဏ္ဍပ် သွားမယ်နော်မေမေ” တဲ့ ။ သမီးကတော့ “အိမ်ရှေ့မှာပဲ ရေစည်ချပေး” တဲ့။ သားငယ်ထွေးလေးကတော့ လက်တွန်းလှည်းလေးထဲမှာပဲ တခစ်ခစ်ရယ်နေမှာပေါ့။ မေမေကတော့ သည်အတိုင်းပဲ ကလေးတွေကို ထိုင်စောင့်မှာပေါ့ကွယ်။ သားကြီးက နောက်တတ်ပြီ။ ‘မေမေကို ဒီနှစ်တော့ သားပဲ ရေလောင်းမယ်’ လို့ ပြုံးစစနဲ့ ပြောတတ်ပြီ။ သမီးကတော့ ‘ဖေဖေရှိရင် သမီးကို ရေပိုက်ဆင်ပေးမှာ’ လို့ သတိရရှာတယ်။ ပိတောက်ပန်းတွေ တွေ့တော့ လိုချင်လိုက်တာ တဲ့။ မေမေကတော့ မလိုချင်ပါဘူးကွယ်။ သမီးဝယ်လိုက်တဲ့ ပိတောက်ပန်းတွေက အ၀ါဖျော့လိုက်တာ။ ရနံ့က လည်း လျော့သေး။ ဟိုး နှစ်တွေတုန်းက ပိတောက်တွေကဖြင့် သင်္ကြန်ရက် ကုန်တာတောင် သူ့ရနံ့က ဝေ့၀ဲ လွင်ပျံ့ ကျန်နေသေးသလို။ ခူးပေးတဲ့သူကြောင့် ပိုမွှေးတာ ဖြစ်မှာနော်။

လတ်ဆတ်တဲ့ရနံ့က လေပြေနှင့်အတူ မျောလွင့်လာသည်။ သမီးက ပိတောက်တွေ ချွေကစား။ ရေစည်ထဲမှာ ပိတောက်ပွင့်ကြွေတွေ... ရေဘောင်ဘင်ထဲမှာ ဝေလို့။ လှိုင်းခေါင်းဖြူသံ တ၀ုန်းဝုန်းကို ကြားသည်။ ပိတောက် ပွင့်ကြွေတွေက တငြိမ့်ငြိမ့် တလိမ့်လိမ့်။ ကိုယ့်ဆံပင်ပွပွမှာ ပိတောက်ခက်တွေ ထိုးစိုက်ပေးတတ်တဲ့ လက်အစုံ ကို သတိရတယ်။ ဟော သမီးလေးရဲ့ ခိုးခိုးခစ်ခစ် ရယ်သံ။ မောင့်ခမျာလည်း လွမ်းရှာမှာပဲ။ ဟော… သားကြီးက ဖေဖေရေ သောင်ပြင်မှာ ဘောလုံးလုအောင်… တဲ့။ သားငယ်လေးကတော့ အဖေ့လက်ကို အားကိုးတကြီး ဖမ်းဆုပ်ရင်း လှိုင်းကြားမှာ ရာဘာလှေကလေး စီးလိမ့်မည်။ သုံးနှစ်အတွင်း သားသမီးတွေ အဖေကို စိမ်းသွား မှာလည်း စိုးတယ်တဲ့။ ‘အားတင်းထားနော်… မောင်ရယ်။ နှစ်နှစ်ပဲ ကျန်တော့တာပါ’ ကျမ ဘယ်သူ့ကို နှစ်သိမ့် နေတာလဲ။ မောင့်ကိုလား။ သားသမီးတွေကိုလား။ ဒါမှမဟုတ် ကိုယ့်ကိုယ်လား။ အမှန်အတိုင်း ၀န်ခံရလျှင်တော့ အားငယ်စွာ ငိုကြွေးပစ်လိုက်ချင်တာပါ။

ဟော… ပိတောက်တွေ လတ်ဆတ်သောမွှေးရနံနဲ့၊ မိုးစက်တွေ စိုစွတ်နေသလို လန်းလို့။ အရွက်စိမ်းတွေက ဖားဖား ဝေေ၀ ၀န်းရံလို့။ မောင်က ပိတောက်ဆို အရွက်စိမ်းတွေ တွဲနေမှ လှသတဲ့။ ခေါင်းတွဲ ရှိမနေသေးတဲ့ ရထားတွဲလေးကရော ပြည့်ပြည့်စုံစုံ လှပါ့မလား ……

အို… ကျမ ရင်ထဲကို ပိတောက်စိမ်းစိမ်းတွေ အဆုပ်လိုက် အခဲလိုက် ဘယ်သူ ပစ်ထည့်လိုက်တာလဲ…ဟင်။ အဲသည့် အချိန်လေးမှာ ခေါင်းတွဲလာ မချိတ်သေးတဲ့ ရထားအိမ်ကလေး လေးတွဲကတော့ အချင်းချင်း တင်းကျပ် သိပ်သည်းအောင် ချိတ်လို့ ပကတိ ငြိမ်သက်စွာ…။

+++++

အသေချာဆုံးကတော့ ကျမအတွက် ၂၀၀၄ ခုနှစ်မှာ သင်္ကြန် မကျပါ။

မေငြိမ်း
Empress မဂ္ဂဇင်း။
၂၀၀၄-ဧပြီလ ။